މިިދިޔަ ހުކުރު ދުވަހު އެމްޑީޕީން ބޭއްވި އެއްވުމުގެ ތެރެއިން ބޭނުންކުރި ތޫނު އަޑު އިއްވާ ޑިވައިސް ނުވަރަ އެލްރާޑް ރާއްޖޭގައި ބޭނުންކުރީ އަލަށް ނޫން ކަމަށާއި، 2013 ގައި އެ ހަތިޔާރު ބޭނުންކުރި ކަމަށް ދާޚިލީ ސަލާމަތާއި ބެހޭ ވަޒީރު އަލީ އިޙްސާން ވިދާޅުވެއްޖެއެވެ.

އެމްޑީޕީގެ އެ އެއްވުމުގެ ތެރެއިން އެލްރާޑް ބޭނުންކުރުމުން އެކަމުގެ ކަންބޮޑުވުން ވަރަށް ގިނަ ފަރާތްތަކުން ވަނީ ފާޅުކޮށްފައެވެ. އެގޮތުން ރާއްޖޭގައި މީގެ ކުރިން ބޭނުންނުކުރާ ޑިވައިސްއެއް އެރޭ ބޭނުންކޮށް އެ މުޒާހަރާ ރޫޅާލުމަށް ފުލުހުން މަސައްކަތްކުރި ކަމަށް އެމީހުން ދިޔައީ ބުނަމުންނެވެ.

އެކަމާ ގުޅިގެން ރޭ އެކްސްގައި ކުރެއްވި ޕޯސްޓެއްގައި ވަޒީރު އިޙްސާް ވިދާޅުވީ، އެލްރާޑް ރާއްޖޭގައި އެންމެ ފުރަތަމަ ބޭނުންކޮށްފައިވަނީ 2013 ވަނަ އަހަރު ކަމަށާއި، އޭރު ބޭނުންކުރީ LRAD 300 Xގެ މޮޑެލްގެ ހަތިޔާރެއް ކަމަށް ވަޒީރު ވިދާޅުވިއެވެ. އަދި އޭރު އެލްރާޑް ބޭނުންކުރީ ފުލުހުންގެ ވެހިކަލުގައި މައުންޓްކޮށްގެންކަމަށް ވެސް ވަޒީރު ވިދާޅުވިއެވެ.

ވަޒީރު ވިދާޅުވީ އެލްރާޑްއަކީ 100 އަށް ވުރެ ގިނަ ޤައުމުތަކުގައި މުޒާހަރާތައް ކޮންޓްރޯލްކުރުމާއި، ދުރަށް އަޑުއިއްވުމާއި، ކަނޑުމަތީގެ ރައްކާތެރިކަން ކަށަވަރުކުރުން ފަދަ ކަންކަމަށް މިހާރު ވެސް ގެންގުޅޭ ހަތިޔާރެއް ކަމަށެވެ. އެ ހަތިޔާރު ގެންގުޅެނީ އެޤައުމެއްގެ މިލިޓަރީ ނުވަތަ ޤާނޫނު ތަންފީޒުކުރާ އިދާރާތަކުން ކަމަށް ވެސް ވަޒީރު ވިދާޅުވެފައިވެއެވެ.

ވަޒީރު އެހެން ވިދާޅުވިއިރު، އެރޭ އެލްރާޑް ބޭނުންކުރުމުގެ ސަބަބުން ވަރަށް ގިނަ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައެވެ.

އެގޮތުން އެ އަޑާއި ގުޅިގެން ރޭ ފުލުހުން ދިން އިންޒާރުތައް އަޑުނީވުމާއި އަދި ކަންފަތުގައި ރިއްސުން ފަދަ ކަންކަން ކުރިމަތިވިކަމަށް އެރޭގެ މުޒާހަރާގެ ބައިވެރިން ވަނީ ބުނެފައެވެ.

"އެލް-ރާޑް" ނުވަތަ ލޯންގް ރޭންޖް އެކޯސްޓިކް ޑިވައިސްއަކީ ތަންފީޒީ އިދާރާތަކުން ފޯރު ކޮށްދޭންޖެހޭ މުހިންމު މައުލޫމާތުތައް ދުރު ސަރަހައްދަކަށް ފޯރުކޮށްދިނުމަށްޓަކައި ބޭނުންކުރާ މުވާސަލާތީ ވަސީލަތެކެވެ. އެ ވަސީލަތަކީ ލައުޑްސްޕީކަރުން އަޑު ފޯރާ މިންވަރަށްވުރެ ދުރަށް އަޑު ފޯރާނެކަންޔަގީންކުރެވޭ ފަދަ، ބާރުގަދަ ވަސީލަތެކެވެ.