ހުޅުމާލޭގެ ފިތިރޯނު މަގުގައި ކާރަކާއި ސައިކަލެއް ޖެހި ހިނގި އެކްސިޑެންޓެއްގައި މީހަކު ހޮސްޕިޓަލަށް ގެންދިޔަ ނަމަވެސް، އެ އެކްސިޑެންޓު ފުލުހުންނަށް ރިޕޯޓުކޮށްފައި ނުވާކަމަށް ފުލުހުން ބުނެފިއެވެ.
ފުލުހުން މައުލޫމާތުދިން ގޮތުގައި މި ހާދިސާ ހިނގާފައިވަނީ މިދިޔަމަހުގެ 12 ވަނަ ދުވަހުގެ ރޭ1:00 ހާއިރުއެވެ. އެކްސިޑެންޓު ހިނގީ ފުލުހެއްގެ ގޮތުގައި މަސައްކަތްކުރާ 33 އަހަރުގެ ދިވެހި ފިރިހެނަކު ދުއްވަމުން ދިޔަ ކާރަކާއި އެހެން ސައިކަލެއް ޖެހިގެންނެވެ.
އެކްސިޑެންޓުގައި ސައިކަލު ދުއްވި ފަރާތަށް އަނިޔާވެ، އޭނާ ވަނީ ޖެހުނު ކާރުގައި ހޮސްޕިޓަލަށް ގެންގޮސްފައެވެ. ނަމަވެސް މި އެކްސިޑެންޓު ފުލުހުންނަށް ރިޕޯޓު ނުކުރުމުގެ ސަބަބުން ކާރު ދުއްވި ފުލުހުންގެ އޮފިސަރު ވަނީ ހައްޔަރުކޮށްފައެވެ.
ފުލުހުންގެ ތަހުގީގުގައި އޭނާ ވަނީ އެކްސިޑެންޓު ރިޕޯޓު ނުކުރާކަމަށް ބުނެ އެއްބަސްވެފައެވެ. އޭނާ ކްރިމިނަލް ކޯޓަށް ހާޒިރުކުރުމުން، ވަކި ޝަރުތުތަކަކާއެކު ދޫކޮށްލުމަށް ކޯޓުން ވަނީ ނިންމާފައެވެ.
އޭނާ ދޫކޮށްލުމަށް ކޯޓުން ނިންމީ، އިތުރަށް ބަންދުގައި ބަހައްޓަން ޖެހޭ ސަބަބެއް ނެތުމުންނެވެ. މި މައްސަލައިގެ ތަހުގީގު ފުލުހުން ދަނީ ކުރިއަށް ގެންދަމުންނެވެ.
Advertisement
This content is created and paid for by advertisers and does not involve Voice Journalists
