މިސްރުން ޣައްޒާއަށް ވަދެވޭ ގޮތަށް އޮންނަ ރަފަޙް ބޯޑަރު އަންނަ ހޯމަ ދުވަހު ހުޅުވަން ނިންމައިފައިވާކަން ފަލަސްތީނުގައި ހުންނަ މިސްރުގެ އެމްބަސީން ހާމަކޮށްފިއެވެ.

މިދިޔަ އަހަރުގެ މޭއި މަހުން ފެށިގެން ބަންދުކޮށްފައިވާ ރަފާހް ބޯޑަރު ހުޅުވަން ނިންމައިފައިވަނީ، އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ޤަތުލްއާންމުގެ ހަމަލާތައް ހުއްޓާލަައިފައިވާ ދަނޑިވަޅުގައެވެ.

އެގޮތުން ބޭރުގެ ނޫސްތަކުން ރިޕޯޓުކުރާ ގޮތުގައި ޣައްޒާގެ އެމްބަސީން އެކަމާއި ގުޅިގެން ނެރުނު ބަޔާނުގައި ވަނީ މިސްރުގައި ދިރިއުޅޭ ޣައްޒާގެ ރައްޔިތުންނަށް، އެނބުރި ޣައްޒާއަށް އެތެރެވެވޭނެ ކަން ފާހަގަކޮށްފައެވެ.

އެކަމާއި ގުޅިގެން ރާއްޖެއިން ޣައްޒާއަށް އެހީތެރިކަން ފޯރުކޮށްދޭ އައިއޭސީގެ ޑިރެކްޓަރު މުޙައްމަދު އަލީ (އަދީން) ރޭ ވަނީ، ޣައްޒާ ބޯޑަރު ހުޅުވުމާއެކު ރާއްޖެއިން ޣައްޒާއަށް ފޯރުކޮށްދޭންޖެހޭ އެހީތެރިކަން ފޯރުކޮށްދިނުމަށް ތައްޔާރަށް އޮތްކަން ހާމަކޮށްފައެވެ.

އެގޮތުން ޣައްޒާއަށް އެހީތެރިކަން ފޯރުކޮށްދޭނެ ޕްލޭނެއްގެ މަސައްކަތް މިހާރު ވެސް އެކި ޖަމިއްޔާތަކާއި ޣައްޒާގެ އިސްވެރިންނާއި ގުޅިގެން ކުރަމުންދާ ކަމަށް އަދީން ފާހަގަކުރިއެވެ.

މިހާރު ވެސް އައިއޭސީން ދަނީ ޣައްޒާ އާރާސްތުކުރުމަށް އަދި ޣައްޒާއަށް ކާބޯތަކެއްޗާއި އެހީތެރިކަން ވެއްދުމަށް ބޭނުންވާ ފައިސާ ހޯދަން ޢާންމުންގެ ކިބައިން އެހީތެރިކަމަށް އެދެމުންނެވެ. އަދި އެކަމަށް ވަރަށް ގިނަ ދިވެހީން އެހީތެރިކަން ފޯރުކޮށްދެމުންދާކަން ވެސް ފާހަގަކުރެވެއެވެ.

އައިއޭސީ މެދުވެރިކޮށް ޣައްޒާއަށް އެހީތެރިކަން ފޯރުކޮށްދޭން ބޭނުންވާ ފަރާތްތަކުން އައިއޭސީގެ އެކައުންޓް ނަންބަރުތަކަށް ޓްރާންސްފާކުރުމުން ވެސް ފުދޭނެއެވެ.