އައްޑޫސިޓީގައި ވަކި ކައުންސިލްތަކެއް ހަދަން ފެނޭތޯ ބެލުމަށް ފޭދޫ، ހުޅުދޫ އަދި މީދޫގެ ރައްޔިތުންގެ ހިޔާލު ހޯދުމަށް ނަގާ އާންމު ވޯޓުލުން ފަށައިފިއެވެ.
ސިޓީކައުންސިލުން ވަކިވެ، ވަކިވަކި ރަށްތަކުގައި ކައުންސިލް ހަދަން ފެނޭތޯ ނެގުމަށް ކުރިއަށްދާ ހިޔާލު ހޯދުމުގެ މި ވޯޓުލުން ފަށާފައިވަނީ މިއަދު ހެނދުނު 8 ޖެހިއިރުއެވެ. އިލެކްޝަންސް އިން ބުނެފައިވަނީ މި ވޯޓުގައި 9576 މީހުން ތިބިއިރު، ޖުމްލަ 18 ފޮއްޓަށް ވޯޓު އެޅުމުގެ މަސައްކަތް ކުރިއަށްދާނެ ކަމަށެވެ.
އޭގެ ތެރޭގައި ހިމެނެނީ މީދު އާއި ހުޅުދޫ މިއިން ކޮންމެ ރަށެއްގައި 3 ފޮއްޓާއި، ފޭދޫގައި ބަހައްޓާ ފަސް ފޮށީގެ އިތުރުން މާލޭގައި ބަހައްޓާ 7 ފޮއްޓެވެ. އިލެކްޝަނުން ބުނީ ހެނދުނު 9 ޖެހިއިރު 3.34 އިންސައްތަ މީހުން ވޯޓުލާފައިވާކަމަށެވެ.
ހިޔާލު ހޯދުމަށް ހުށައަޅާ ސުވާލަކީ އައްޑުއަތޮޅު ހުޅުދޫއަށް ޚާއްޞަކުރެވިގެން، އައްޑުއަތޮޅު ހުޅުދޫ ކައުންސިލް އުފައްދަން ފެނޭތޯ އާއި އައްޑުއަތޮޅު މީދޫއަށް ޚާއްޞަކުރެވިގެން، އައްޑުއަތޮޅު މީދޫ ކައުންސިލް އުފައްދަން ފެނޭތޯ އާއި އައްޑުއަތޮޅު ފޭދޫއަށް ޚާއްޞަކުރެވިގެން، އައްޑުއަތޮޅު ފޭދޫ ކައުންސިލް އުފައްދަން ފެނޭތޯ އެވެ.
Advertisement
This content is created and paid for by advertisers and does not involve Voice Journalists
