މާލޭގެ އުތުރު ފަރާތު ބޮޑުތަކުރުފާނު މަގުގައި ތާރު އެޅުމުގެ މަސައްކަތްކުރުމަށް, އާންމު ޓްރެފިކަށް ބަދަލުތަކެއް ގެންނަން ފުލުހުން ނިންމައިފިއެވެ.

އެކްސްގައި ކުރި ޓްވީޓެއްގައި ފުލުހުން ބުނީ މި މަސައްކަތްކުރުމަށް ރޭގެ 08:00 އިން ފެށިގެން މަގު ބަންދުކުރެވޭނެ ކަމަށެވެ. 

މި މަސައްކަތްތަކަށް ޝަހީދު ޙުސައިން އާދަމް ބިލްޑިންގ އިން ފެށިގެން ޖުމްހޫރީ މައިދާނާއި މަސްމާރުކޭޓު ހިމެނޭ ސަރަޙައްދުން ހުސައިނީ ގޯޅިއާއި ހަމައަށް ބޮޑުތަކުރުފާނު އެއްކޮށް ބަންދުކުރުމަށް ހަމަޖެހިފައިވެއެވެ.

މީގެ އިތުރުން ޖުމްހޫރީ ހިނގުމާއި، ޗާންދަނީ މަގާއި، އިބްރާހީމް ހަސަން ދީދީ މަގާއި އެއްކޮށް ބަނދުވެ، މުހަންމަދު އިސްމާއީލް ދީދީ ގޯޅިއާއި، ކަނޑި ދޮން މަނިކު ގޯޅީގެ ވަކި ހިސާބަކުން އާއްމު ޓްރެފިކަށް ބަންދުވާނެއެވެ. އަދި އެސްޓީއޯ ޓްރޭޑު ސެންޓަރާއި ހަމައަށް ހުސައިނީ ގޯޅިއާއި އޯކިޑު މަގުގައި ޕާކުކުރުން ވެސް މަނާވާނެއެވެ. ނަމަވެސް މި ސަރަހައްދުގައި އުޅަނދުފަހަރު ދުއްވާ އުޅެވޭނެއެވެ. 

ބޮޑުތަކުރުފާނު މަގު ހަތަރު ލޭނަށް ފުޅާކޮށް، ޒަމާނީ ފެންވަރަކަށް ތަރައްގީކުރުމުގެ މި އަމަލީ މަސައްކަތް ފަށާފައިވަނީ އޮގަސްޓު 22 ގައެވެ. މިއީ އެއް އަހަރާއި ތިން މަހުގެ ތެރޭ ނިންމާ ގޮތަށް، ސަރުކާރުން 144.5 މިލިއަން ރުފިޔާ ހަރަދުކޮށް، މިދިޔަ އޭޕްރިލް މަހުގެ ނުވަ ވަނަ ދުވަހު އެމްޓީސީސީއާ ހަވާލުކޮށްފައިވާ މަޝްރޫއެކެވެ. 

މި މަޝްރޫއުގެ ދަށުން ހުޅުމާލޭ ފެރީ ޓާމިނަލުން ފެށިގެން މަސް މާރުކޭޓު ސަރަހައްދާ ހަމައަށް 830 މީޓަރުގައި ތާރު އަޅާ، އެ ސަރަހައްދުގައި ފެން ހިންދާ ނިޒާމެއް ގާއިމުކޮށް، ފެންބޮޑުވާ މައްސަލައަށް ވެސް ހައްލު ލިބޭނެ ކަމަށް އެމްޓީސީސީން ބުނެފައިވެއެވެ. އަދި 737 މީޓަރުގެ ސަރަހައްދެއްގައި ޝީޓް ޕައިލްގެ މަސައްކަތް ކުރިއަށް ދާނެ ކަމަށް ވެސް، އެކުންފުނިން ބުނެފައިވެއެވެ.