ރާއްޖެ ސަރަހައްދަށް ގަވާއިދާހިލާފަށް ވަދެގެން އުޅެނިކޮށް ދިވެހި އަސްކަރިއްޔާއިން ޑްރޯން ބޭނުންކޮށްގެން މިދިޔަ ބުދަދުވަހުގެ ރޭ އަތުލައިގަތީ ލަންކާގެ ޑްރަގް ބޯޓެއްކަމަށް އެޤައުމުގެ ނޫސްތަކުން ރިޕޯޓްކޮށްފިއެވެ.

މިކަމާ ގުޅިގެން އަވައްޓެރި ލަންކާގެ ބައެއް ނޫސްތަކުން ބުނެފައިވަނީ ދިވެހި ސިފައިން އަތުލައިގަތީ ލަންކާއަށް ނިސްބަތްވާ އުޅަނދެއްކަމަށެވެ. އެ ބޯޓުގައި 300 ކިލޯގެ މަސްތުވާތަކެތި ހުރިކަމަށް ލަންކާގެ ބައެއް ނޫސްތަކުން ވަނީ ރިޕޯޓްކޮށްފައެވެ. މީގެ އިތުރުން އަތުލައިގަތް އެ އުޅަނދުގައި 6 މީހުން ތިބިކަމަށްވެސް ވަނީ ބުނެފައެވެ.

މިކަމާ ގުޅޭގޮތުން ދިވެހި ފުލުހުންވެސް ވަނީ އަތުލައިގަތް ބޯޓުގައި މަސްތުވާތަކެތި ހުރިކަމަށް ބުނެފައެވެ. ނަމަވެސް މިކަމާ ގުޅޭގޮތުން އިތުރު ތަފްސީލެއް ހާމައެއް ނުކުރެއެވެ.

އެ އުޅަނދު އަތުލައިގަތްކަން ހާމަކުރަމުން އެމްއެންޑީއެފުން އިއްޔެ ބުނެފައިވަނީ ރާއްޖޭގެ ކަނޑުގެ ސަރަހައްދުގައި ގަވާއިދާހިލާފަށް ވަދެއުޅުނު އެ ބޯޓު އަތުލައިގަނެފައިވަނީ، އެމްއެންޑީއެފް އެއަރކޯރއިން ޑްރޯން ބޭނުންކޮށްގެން ހިންގި ސަވެއިލަންސެއްގައިކަމަށެވެ. އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެނެސްފައިވަނީ ބުދަދުވަހުގެ ރޭ ވ.ފޮއްތެޔޮމުލީގެ އިރުން 137 ނޯޓިކަލް މޭލު ބޭރުގައި ހަރަކާތްތެރިވަމުން ދަނިކޮށެވެ. 

ރާއްޖެ ސަރަހައްދުން ޑްރަގް ބޯޓެއް އަތުލައިގަނެފައިވާއިރު، ލަންކާ ސިފައިންވެސް ވަނީ މިފަހަކުން ޑްރަގް ބޯޓެއް އަތުލައިގަނެފައެވެ. ލަންކާގެ ނޫސްތަކުން ބުނީ އެ ބޯޓުގައި 251 ކިލޯ 18 ގްރާމް ކްރިސްޓަލް މެތާއި 85 ކިލޯ ހެރޮއިން ހުރިކަމަށެވެ.