ހޯކްސްގެ ތެއޮ ޓޭންކަރެއްގައި ވަގަށް ސިނގިރޭޓްތަކެއް އެތެރެކުރި މައްސަލާގައި ވަކިކުރި މޯލްޑިވްސް ކަސްޓަމްސް ސާވިސްގެ ޑެޕިއުޓީ ކޮމިޝަނަރު މަހްމޫދު ރިޔާޒުގެ މަގާމު އިޔާދަ ކުރަން ރައީސް ޑރ. މުހައްމަދު މުއިއްޒަށް ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ލަފާ އެރުވުމާއި ގުޅިގެން އޭނާގެ ވަޒީފާ އަލުން އިއާދަކޮށްފި އެވެ.
ރައީސް އޮފީހުގެ ތަރުޖަމާން ހީނާ ވަލީދު ކުރެއްވި ޕޯސްޓެއްގައި ވިދާޅުވީ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީން ކުރިއަށް ގެންދިޔަ ތަޙްޤީޤަކާ ގުޅިގެން މަޤާމުން ވަކިކުރެއްވި ކަސްޓަމްސްގެ ޑެޕިއުޓީ ކޮމިޝަނަރު މަޙްމޫދު ރިޔާޒްގެ މައްސަލަ، އެ ކޮމިޓީން އިތުރަށް ތަޙްޤީޤު ކުރެއްވުމަށްފަހު އެ މައްސަލައިގައި މަޙްމޫދު ރިޔާޒްގެ ބައިވެރިވުމެއް ނެތްކަމަށް ނިންމަވައި، ވަޒީފާ އަލުން އިއާދަކޮށްދޭން ކޮމިޓީން ރައީސުލްޖުމްހޫރިއްޔާއަށް ލަފާ އަރުވާފައިވާތީ، މަޙްމޫދު ރިޔާޒްގެ ވަޒީފާ ރައީސުލްޖުމްހޫރިއްޔާ އަލުން އިއާދަކުރައްވައިފި ކަމަށެވެ.
ކަސްޓަމްސްގެ ޑެޕއިުޓީ ކޮމިޝަނަރުކަމުން ރިޔާޒާއި އެކު ވަކިކުރަން ނިންމީ ޑެޕިއުޓީ ކޮމިޝަނަރު އަބްދުﷲ ވަހީދެވެ. އެކަން އިއުލާނު ކުރެއްވީ މިދިޔަ މަހުގެ 29 ވަނަ ދުވަހު ރައީސް ޑރ. މުހައްމަދު މުޢިއްޒުއެވެ.
އެގޮތުން އެ މައްސަަލައިގައި ކަސްޓަމްސް ގެ އިތުރު 3 މުވައްޒަފަކަށް ވެސް ފިޔަވަޅުތައް އެޅުމަށް އެ އިދާރާއަށް އަންގަވައިފައިވާނެ ކަމަށް ވެސް ރައީސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
