ދައުލަތުގެ ދަރަނި ކުޑަކުރުމަށްޓަކައި ބޮންޑު ވިއްކުމުގެ ބަދަލުގައި ވެލާނާ އިންޓަނޭޝަނަލް އެއާޕޯޓުގެ (ވީއައިއޭ) ހިއްސާގެ ބައެއް ވިއްކާލުން މާ ބުއްދިވެރިކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނުގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ނަޝީދު ވިދާޅުވީ، ބޮޑު އިންޓަރެސްޓް ރޭޓެއްގައި ކާގިލް ފައިނޭންޝަލް ސަރވިސަސް އިންކްއަށް ބޮންޑެއް ވިއްކުމަށް މަސައްކަތް ކުރުމަށްވުރެ، އެއާޕޯޓުގެ ހިއްސާ ވިއްކާލުން މާ ފައިދާ ބޮޑުވާނެ ކަމަށެވެ.
އަދި ވީއައިއޭގެ ހިއްސާގެ ބައެއް ވިއްކާލައިގެން ލިބޭ ފައިސާ، ދައުލަތުގެ ދަރަނި ކުޑަކުރުމަށްޓަކައި ސުކޫކް ބޮންޑުގެ ދަރަނި އަދާކުރުމަށް ބޭނުންކުރެވިދާނެ ކަމަށް ނަޝީދު ވިދާޅުވިއެވެ. އެގޮތުން، މިހާރު ދައުލަތަށް އޮތް ބޮޑު ދަރަނި ކުޑަކުރުމަށް މިފަދަ ފިޔަވަޅެއް އެޅުން މުހިންމު ކަމަށް ވެސް ނަޝީދު ފާހަގަކުރެއްވިއެވެ.
ވެލާނާ އެއާޕޯޓުގެ ހިއްސާ ވިއްކުމުން ދައުލަތަށް ލިބޭނެ ފައިދާ އިތުރުވާނެ ކަމަށް ރައީސް ނަޝީދު ވިދާޅުވެފައިވާއިރު، އެމަނިކުފާނުގެ ވެރިކަމުގައި ވެލާނާ އެއާޕޯޓުގެ ހިންގުން އިންޑިޔާގެ ޖީއެމްއާރް ކުންފުންޏަށް 25 އަހަރަށް ހަވާލުކުރިއެވެ.
ރައީސް ނަޝީދުގެ ވެރިކަން ނިމުމާއި އެކު ރާއްޖޭގެ ސަރުކާރުން އެ އެއްބަސްވުން ބާތިލްކުރުމުން، އޭގެ ބަދަލެއްގެ ގޮތުގައި 271 މިލިއަން ޑޮލަރު ނުވަތަ 4.1 ބިލިއަން ރުފިޔާ ދައްކަން ޖެހުނެވެ.
Advertisement
This content is created and paid for by advertisers and does not involve Voice Journalists
