އޭއެފްސީ އޭޝިއަން ކަޕުގެ ކޮލިފައިންގައި ވާދަކުރާ ފަލަސްތީނުގެ 17 އަހަރުން ދަށުގެ ޒުވާން ޤައުމީ ފުޓްބޯޅަ ޓީމު ރާއްޖެ އައުމުން ވެލާނާ އިންޓަރނޭޝަނަލް އެއާޕޯޓުގެ ވީއައިޕީން އެޓީމަށް ހޫނު މަރުހަބާއެއް ކިޔައިފިއެވެ.

ފަލަސްތީނުގެ ޤައުމީ ޒުވާންޓީމު ރާއްޖެ އައުމުން ޓީމަށް މަރުހަބާ ދެންނެވުމަށް ކުޅިވަރާބެހޭ ވަޒީރު ޢަބްދުﷲ ރާފިޢު އާއި ފުޓްބޯޅާ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙުމަދު ޠާރިޤުގެ އިތުރުން ފުޓްބޯޅަ އާއިލާގެ ގިނަ އަދަދެއްގެ ބަޔަކު ގޮސް ތިއްބެވެ.

ފަލަސްތީނުގެ ޓީމް ރާއްޖެ އައިސްފައިމިވަނީ އޭޝިއަންކަޕް ކޮލިފައިންގައި އެޓީމް ކުޅެންޖެހޭ މެޗްގެ ކުރިން ތަމްރީނުތައް ހަދައި ރާއްޖޭގެ ޤައުމީޓީމާއެކު އެކުވެރިކަމުގެ މެޗްތަކެއް ކުޅުމަށެވެ. އޭއެފްސީ ކަޕް ކޮލިފައިން މެޗްތައް އޮންނާނީ މިމަހުގެ 22 އިން 30 އަށް ތައިލޭންޑްގެ ޗޮންބުރީގައެވެ.

ފަލަސްތީނު ޓީމުގެ ދެ ކުޅުންތެރިއަކު ވީއައިއޭގެ ވީއައިޕީ ލައުންޖުގައި..

ފަލަސްތީނު ޓީމް ރާއްޖެއަށް ކުރާ ދަތުރުގައި އެޓީމް ކުޅޭ އެކުވެރިކަމުގެ މެޗްތައް އޮންނާނީ މިމަހުގެ 13 ވާ ބްރާސްފަތި އަދި 15 ވާ ހޮނިހިރުދުވަހުއެވެ. އެފްއޭއެމުން ވަނީ ފަލަސްތީނު ޓީމަށް އެހީތެރިވުމަށްޓަކައި މިމެޗްތަކަށް ހާއްސަ ސްވެނިއަރ ޓިކެޓްތަކެއް ވިއްކުމަށް ނިންމާފައެވެ.އެގޮތުން ސްވެނިއަރ ޕްލެޓިނަމް ޓިކެޓް 1000 ރުފިޔާއަށް ވިއްކުމަށް ނިންމާފައިވާއިރު، މީގެ ތެރޭގައި ހިމެނެނީ ވީވީއައިޕީ (ރޮސްޓްރަމް) ގެ 50 ޓިކެޓެވެ. މީގެ އިތުރުން ދެން ހިމެނެނީ 200 ސްވެނިއަރ ގޯލްޑް ޓިކެޓެވެ. މި ޓިކެޓްތައް ވިއްކުމަށް ނިންމާފައިވަނީ، 500 ރުފިޔާއަށެވެ.

ފަލަސްތީނު ޓީމް ރާއްޖޭގައި ހޭދަކުރާ ދުވަސްތަކުގައި އެޓީމްގެ ހުރިހާ ހަރަދެއް ބަލަހައްޓާނީ ރާއްޖެއިންނެވެ. އެޓީމް ރާއްޖޭގައި ކޭމްޕްކުރުމުެގ ހުއްދަ ދިނުމަށް ރައީސް ޑރ.މުހައްމަދު މުއިއްޒު ނިންމެވީ އިސްރާއީލުން ޣައްޒާގައި ހިންގަމުންގެންދާ ގަތުލު އާއްމުތަކުގެ ސަބަބުން ފަލަސްތީނުގެ ބިމުގައި ޓީމަށް ތަމްރީނުތައް ހެދުމުގެ ފުރުސަތު ނެތުމުންނެވެ. ފަލަސްތީނު ޓީމް ރާއްޖޭގައި ކޭމްޕްކުރުމަކީ ދިވެހިންވެސް އެދިއެދިތިބި ކަމެއްކަން ފާހަގަކޮށްލެވެއެވެ.