އެމެރިކާއިން ދިވެހި އަސްކަރިއްޔާގެ ހިދުމަތުގައި ބޭނުންކުރުމަށް ރިބާއި، ރިބް ޝެލްޓަރާއި ރޭމްޕު ހަދިޔާކޮށްފިއެވެ.
ކަލާސީނުކޮށީގައި އިއްޔެ ބޭއްވި ރަސްމިއްޔާތުގައި މި ތަކެތި އެމްއެންޑީއެފާ ހަވާލުކޮށްދެއްވީ އެމެރިކާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ހޫގޯ ޔޫ-ހޯ ޔޮންއެވެ. މި ތަކެއްޗާ އެމްއެންޑީއެފްގެ ފަރާތުން ހަވާލުވެލެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ.
މި ރަސްމިއްޔާތުގައި، ވާހަކަފުޅު ދައްކަވަމުން ޗީފް އޮފް ޑިފެންސް ފޯސް ވަނީ، އެމެރިކާއިން ދިވެހިރާއްޖޭގެ ދިފާޢީ ދާއިރާ ހަރުދަނާކޮށް ދިވެހި ސިފައިންގެ ކެޕޭސިޓީ ބިލްޑްކޮށް، ޤާބިލުކަން އިތުރުކުރުމުގެ ގޮތުން، ފޯރުކޮށްދެއްވާ އެހީތެރިކަން ފާހަގަކުރައްވައި، އެމެރިކާގެ ރައްޔިތުންނަށް ޝުކުރު އަދާކުރައްވާފައެވެ.
މި ތަކެއްޗަކީ އެމެރިކާގެ ފޮރިން މިލިޓަރީ ފަންޑް (އެފްއެމްއެފް)އާއި ބިލްޑިންގ ޕާޓްނަރޝިޕް ކެޕޭސިޓީ (ބީޕީސީ) ޕްރޮގްރާމްގެ ދަށުން އެމެރިކާއިން ދެއްވާ ގްރާންޓް އެހީއެކެވެ. އެމެރިކާއިން ދިވެހި އަސްކަރިއްޔާއަށް މިއަދު ހަދިޔާކުރެއްވި ތަކެތީގެ ތެރޭގައި ހިމެނެނީ، 4 ރިބާއި، ރިބް ޝެލްޓަރެއްގެ އިތުރުން 2 ރޭމްޕެވެ.
މި ރަސްމިއްޔާތުގައި ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަޙްމަދު ޣިޔާޘްއާއި އެމްއެންޑީއެފްގެ ޖެނެރަލް އޮފިސަރުންނާއި، ސީނިއަރ އޮފިސަރުން ބައިވެރިވެވަޑައިގެންނެވިއެވެ.
އެމެރިކާއިން ދިވެހިއަސްކަރިއްޔާގެ އިންސާނީ ވަސީލަތްތައް ތަރައްޤީކުރުމުގެ އިތުރުން، އެކިއެކި މިލިޓަރީ ތަމްރީނުތައްވެސް ހިންގައެވެ.
Advertisement
This content is created and paid for by advertisers and does not involve Voice Journalists
