ޒެމްބިއާ އިންޓަނޭޝަނަލް ބެޑްމިންޓަން މުބާރާތުގެ ފައިނަލުގައި ވާދަކޮށް ރާއްޖޭގެ ހުސައިން ޒަޔާން ޝަހީދު ޒަކީ އާއި ފާތިމަތު ނަބާހާ އަބްދުއްރައްޒާގްގެ ޕެއާ ޗެމްޕިއަންކަން ހޯދައިފިއެވެ.

ޒެމްބިއާގެ ވެރިރަށް ލޫސަކާގައި ނިންމާލި މުބާރާތުގެ މިކްސްޑް ޑަބަލްސް ފައިނަލުގައި ނަބާހާ އާއި ޒަޔާންއާ ދެކޮޅަށް ނުކުތީ މިސްރުގެ އިއްޒަތު ކަރީމް މަހްމޫދާއި ނޫރު އަހްމަދު ޔޫސްރީގެ ޕެއާއާ ދެކޮޅަށެވެ.

ރިވައިވަލް ސްޕޯޓްސް ތަމްސީލު ކުރި ނަބާހާ އާއި ޒަޔާންގެ ޕެއާ މި މެޗު ކާމިޔާބު ކުރީ ސީދާ ދެ ސެޓުންނެވެ. ސެޓްތައް ގެންދިޔައީ 21-18 އަދި 22-20 ންނެވެ.

މިއީ ދުނިޔޭގެ ބެޑްމިންޓަން ފެޑެރޭޝަން (ބީޑަބްލިއުއެފް) ގެ މުބާރާތަކުން ނަބާހާ އާއި ޒަޔާންގެ ޕެއާއިން ހޯދި ދެވަނަ ރަން މެޑަލް އެވެ. އަދި ބީޑަބްލިއުއެފްގެ ސީރީޒް މުބާރަތަކުން ރާއްޖޭގެ އެތުލެޓީން ހޯދި ފަސްވަނަ ރަން މެޑަލް އެވެ.

މި މުބާރާތުގެ އަންހެން ޑަބަލްސް ފައިނަލުގައި ނަބާހާ އާއި ނަބީހާ ވަނީ ވާދަކޮށްފަ އެވެ.

ފައިނަލުގައި އެ ދެ ކުޅުންތެރިންނާ ދެކޮޅަށް ކުޅުނީ ދެކުނު އެފްރިކާގެ އޭމީ އާކަމަން އާއި ޖޯހަނީޓާ ޝޯޓްޒް އެވެ.

އެމީ އާއި ޝޯޓްޒްގެ ޕެއާ މެޗު ކާމިޔާބު ކުރީ ސީދާ ދެ ސެޓުން، 21-16 އަދި 21-14 އިންނެވެ.

ބެޑްމިންޓަން އެސޯސިއޭޝަންގެ ހިންގުމުގެތެރެއަށް ސަރުކާރުން ވަދެފައިވާ ކަމަށް ބުނެ ބީޑަބްލިއުއެފުން ވަނީ ރާއްޖޭގެ ގައުމީ ޓީމު، އެ ފެޑެރޭޝަންގެ މުބާރާތްތަކުގައި ބައިވެރިވުން މަނާކޮށްފަ އެވެ. ނަމަވެސް ވަކިވަކި އެތުލީޓުން އަމިއްލަ ގޮތުން ބައިވެރިވުން ވަނީ ހުއްދަކޮށްފައެވެ. އެގޮތުން ބްރޭކަކަށް ފަހު ރާއްޖޭގެ ކުޅުންތެރިން ބީޑަބްލިއުއެފްގެ މުބާރާތްތަކުގައި ވާދަކުރާ މިއީ ފުރަތަަމަ ފަހަރެވެ.