ޒެމްބިއާ އިންޓަރނޭޝަނަލް ބެޑްމިންޓަން ސީރީޒް 2025 ގައި ނަބާހާ އާއި ނަބީހާ އަދި ޒަޔާން ހޯދި ކާމިޔާބީއަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތަހުނިޔާ ވިދާޅުވެއްޖެއެވެ.

އެކްސްގައި ކުރެއްވި ޕޯސްޓްގައި ރައީސް ވަނީ ރިވައިވަލް ސްޕޯޓްސް އެކަޑެމީގެ ފާޠިމަތު ނަބާހާ ޢަބްދުއްރައްޒާޤު އާއި ނަބީހާ ޢަބްދުއްރައްޒާޤު އަދި ހުސައިން ޒަޔާން ޝަހީދު ޒަކީ ހޯދި ޝަރަފްވެރި ކާމިޔާބީތައް ފާހަގަކުރައްވައި އެ ކުޅުންތެރިންނަށް މަރުހަބާ ދަންނަވާފައެވެ.

ވަނަތައް ހޯދި ކުޅުންތެރިން.. 

ޒެމްބިއާގެ ވެރިރަށް ލޫސަކާގައި ނިންމާލި މުބާރާތުގެ މިކްސްޑް ޑަބަލްސް ފައިނަލުގައި ވާދަކޮށް ނަބާހާ އާއި ޒަޔާން ވަނީ ރަން މެޑަލް ހޯދާފައެވެ. މި މެޗުގައި ދެކޮޅަށް ނުކުތީ މިސްރުގެ އިއްޒަތު ކަރީމް މަހްމޫދާއި ނޫރު އަހްމަދު ޔޫސްރީގެ ޕެއާއެވެ. މި މެޗު ރާއްޖޭގެ 2 އެތްލީޓުން ކާމިޔާބުކޮށްފައިވަނީ ސީދާ ދެ ސެޓުންނެވެ. ސެޓްތައް ގެންދިޔައީ 21-18 އަދި 22-20 ންނެވެ.

އަދި މި މުބާރާތުގެ އަންހެން ޑަބަލްސް ފައިނަލުގައި ނަބާހާ އާއި ނަބީހާ ވަނީ ވާދަކޮށް ރިހި މެޑަލް ހޯދާފައެވެ. ފައިނަލުގައި އެ ދެ ކުޅުންތެރިންނާ ދެކޮޅަށް ކުޅުނީ ދެކުނު އެފްރިކާގެ އޭމީ އާކަމަން އާއި ޖޯހަނީޓާ ޝޯޓްޒް އެވެ. އެމީ އާއި ޝޯޓްޒްގެ ޕެއާ މެޗު ކާމިޔާބު ކުރީ ސީދާ ދެ ސެޓުން، 21-16 އަދި 21-14 އިންނެވެ.