މަދީނާގައި ހިނގާދިޔަ ނުރައްކާތެރި އެކްސިޑެންޓެއްގައި އުމްރާއަށް ގޮސް އުޅުނު 42 އުމްރާވެރިން ނިޔާވެއްޖެއެވެ.

މި ހާދިސާ ހިނގާފައިވަނީ ރޭގެ ދަންވަރު މައްކާއިން މަދީނާއަށް ދަތުރުކުރަމުން ދިޔަ ބަހަކާއި ޑީސަލް ޓޭންކަރަކާ ޖެހިގެން ކަމަށް މީޑިއާ ރިޕޯޓްތައް ބުނެފައިވެއެވެ. އިންޑިއާގެ މީޑިއާތަކުން ބުނެފައިވަނީ މި އެކްސިޑެންޓުގައި ނިޔާވި އެންމެންނަކީ ވެސް އިންޑިއާގެ ހައިދަރްއާބާދަށް ނިސްބަތްވާ މީހުންކަމަށެވެ. މި އެކްސިޑެންޓު ހިނގި އިރު ބަހުގައި އަންހެނުންނާއި ކުޑަކުދިން ވެސް ތިބިކަމަށް މައުލޫމާތު ލިބިފައިވެއެވެ. 

މި އެކްސިޑެންޓް ހިނގާފައިވަނީ ރޭ މެންދަމުން އަލިވެ ރާއްޖޭ ގަޑިން 1:00 ހާއިރު، މަދީނާގެ ބޭރުގައި އޮންނަ މުފްރީހަތު ވިލެޖް ކައިރީގަ އެވެ. މި އެކްސިޑެންޓު ހިނގުމާ އެކު ބަހުގައި އެއްކޮށް އަލިފާން ރޯވިއެވެ.

މައުލޫމާތު ލިބޭ ގޮތުގައި މި އެކްސިޑެންޓު ހިނގާފައިވަނީ މައްކާގައި އުމްރާގެ އަޅުކަން އަދާކުރުމަށް ފަހު މަދީނާއަށް ދިޔަ މަގުމަތީގައެވެ. ބައެއް ރިޕޯޓްތައް ބުނާ ގޮތުގައި މި އެކްސިޑެންޓުގައި ބަހުން ސަލާމަތްވީ އެންމެ މީހެކެވެ.

އިންޑިއާގެ އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު ވިދާޅުވީ މި ހާދިސާއާ ގުޅިގެން، އިންޑިއާގެ އޮފިޝަލުން ސައުދީ ކަމާ ބެހޭ ފަރާތްތަކާ ގުޅިގެން އެހީތެރިކަން ފޯރުކޮށްދެމުން އަންނަ ކަމަށެވެ.