"އައިވީއެފް" ފަރުވާއަށް ޚަރަދު ކުރުމަށް ދަތިވާ ފަރާތްތަކަށް އެންސްޕާ ދަށުން 50 ޖާގަ ދޭން ނިންމާ، މި އެހީއަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.

ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން އިއްޔެ ކުރި އިއުލާނެއްގައި ވަނީ މި ޕްރޮގްރާމަށް ޝަރުތު ހަމަވާ ފަރާތްތަކުގެ ތެރެއިން މިއަހަރު "އައިވީއެފް"ގެ ފަރުވާއަށް އެހީ ހަމަޖައްސައިދިނުމަށް ހަމަޖެހިފައިވަނީ، އެންމެ މަތިން ޕޮއިންޓް ލިބޭ 50 ދެމަފިރިންނަށް ކަމަށެވެ. 

އައިވީއެފްއަށް ދެވޭ މި ހަރަދަކީ ދައުލަތުގެ "ފާޓިލިޓީ ކެއާ ފަންޑު" ގެ ދަށުން ކުރެވޭ ހަރަދެކެވެ. 

އައިވީއެފް ހަދަން ބޭނުންފުޅުވާ ފަރާތްތަކުން މި ފުރުސަތަށް އެދި 'ވަންގަވް ޕޯޓަލް' މެދުވެރިކޮށް އޮންލައިންކޮށް ފޯމް ހުށަހެޅޭނެއެވެ. އެންސްޕާ އިން ބުނާ ގޮތުގައި މި ޚިދުމަތަށް އެދި ހުށަހެޅޭނީ ބުރާސްފަތި ދުވަހުން ފެށިގެން ޑިސެންބަރު 20 ވަނަ ދުވަހުގެ 14:00 ގެ ނިޔަލަށެވެ. 

މާލީ ފުދުންތެރިކަން ނެތް މީހުންނަށް ދައުލަތުގެ ޚަރަދުގައި އައިވީއެފް ހެދުމުގެ އިންތިޒާމު ފަހިކޮށްދިނީ މިދިޔަ އަހަރުގެ ކުރީކޮޅުގައެވެ. އެގޮތުން، ސަރުކާރުގެ ޚަރަދުގައި އައިވީއެފް ފަރުވާ ދިނުމަށް ހަމަޖެހިފައިވާ ފުރަތަމަ ބެޗުގެ 100 މީހުންނަށް 30 މިލިއަން ރުފިޔާ ކަނޑައަޅައިފައިވެއެވެ. އަދި ދައުލަތުގެ ހަރަދުގައި އައިވީއެފް އަދި އައިޔޫއައި ގެ ފަރުވާގެ ހިދުމަތްތަކަށް އަހަރުގެ މިހާތަނަށް 7.13 މިލިއަން ރުފިޔާ ހޭދަކޮށްފައެވެ.

އެންސްޕާ އިން މި މަހު އާންމުކުރި ތަފާސްހިސާބުގައިވާ ގޮތުން، ފާޓިލިޓީ ކެއާ ފަންޑު މެދުވެރިކޮށް މި ދެ އަހަރުގެ ތެރޭގައި 93 މީހަކަށް އައިވީއެފް ހެދުމަށް އެހީތެރިވެދީފައިވެއެވެ. އޭގެ ތެރެއިން 23 މީހުން ފަރުވާ ކާމިޔާބުކޮށްފައިވެއެވެ. އެންމެ ފުރަތަމަ އައިވީއެފް ފަރުވާގެ އެހީއަށް އެދުނު 215 ދެމަފިރިންގެ ތެރެއިން ޝަރުތު ހަމަވީ 63 ދެމަފިރިންނެވެ.

މިވަގުތު ރާއްޖެއިން އައިވީއެފްގެ ޚިދުމަތް ފޯރުކޮށްދެނީ ޓްރީޓޮޕް ހޮސްޕިޓަލާއި އައިޖީއެމްއެޗް އަދި ދަރުމަވަންތަ ހޮސްޕިޓަލުގައެވެ.

ދަރިމައިވުމުގެ މައްސަލަތައް ހުންނަ ގިނަ ދިވެހީން، އައިވީއެފްގެ ފަރުވާ އާންމުކޮށް ހޯދަނީ ބޮޑެތި ޚަރަދުތައް ކޮށްގެން ރާއްޖެއިން ބޭރަށް ގޮސްގެންނެވެ. އެހެންކަމުން ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅާއި އެއްގޮތުން ދަރިމައިވުމުގައި ދަތިތައް ހުންނަ ފަރާތްތަކަށް ފޯރުކޮށްދޭ އައިވީއެފްގެ ޚިދުމަތް އާސަންދަ ދައުލަތުގެ ހަރަދުގައި ލިބޭނެގޮތް ހަމަޖައްސައިދިނުމަކީ މުހިންމު ކުރިއެރުމެކެވެ.