މިދިޔަ މެއި މަހު އިންޑިއާއިން ޕާކިސްތާނަށް ދިން ހަމަލާތަކުގައި ބޭނުންކުރި ރަފޭލް މަރުކާގެ ހަނގުރާމަމަތީ ޖެޓްތަކުގެ އަގު ވެއްޓޭ ގޮތަށް ދޮގު މައުލޫމާތު ޗައިނާއިން ފެތުރިކަމަށް އެމެރިކާއިން ތުހުމަތުކޮށްފިއެވެ.
އޮޕަރޭޝަން ސިންދޫރަކީ މިއަހަރުގެ އެޕްރީލް މަހު ކަޝްމީރުގެ އިންޑިއާ ފަޅީގައި ހަނގުރާމަވެރިން ދިން ހަމަލާގެ ރައްދުގައި އިންޑިއާއިން ޕާކިސްތާނަށް ހަމަލާދިން އޮޕަރޭޝަނެވެ. އިންޑިއާއިން ވަނީ ޕާކިސްތާނުގެ އަސްކަރީ އަދި ހަނގުރާމަވެރިންގެ އަމާޒުތަކަށް ހަމަލާދީފައެވެ. އަދި އިންޑިއާއިން ވައިގެ މަގުން ދިން ހަމަލާތަކުގައި ފަރަންސޭސީވިލާތުގައި އުފައްދާ ރަފޭލް މަރުކާގެ ޖެޓްތައް ބޭނުންކުރިއެވެ. މި ހަމަލާތަކަށް ޕާކިސްތާނުންވެސް ރައްދު ހަމަލާދިނެވެ. އަދި ރަފޭލް ޖެޓްތަކުގެ ބޭނުން މި ހަމަލާތަކުގައި އެކަށީގެންވާ ގޮތެއްގައި ނުހިފުނުކަމުގެ އަޑުތަކެއް އޭރު އެރިއެވެ. އިންޑިއާއިން ވަނީ އޭރުވެސް އެކަން ދޮގުކޮށްފައެވެ.
އިންޑިއާއާ ދެކޮޅަށް ޕާކިސްތާނުން ބޭނުންކުރީ ޗައިނާގައި އުފައްދާ ޖޭ-10 މަރުކާގެ ޖެޓްތަކެވެ.
އެމެރިކާގެ ޔޫ.އެސް-ޗައިނާ އިކޮނޮމިކް އެންޑް ސެކިއުރިޓީ ރިވިއު ކޮމިޝަނުން ނެރުނު ރިޕޯޓެއްގައި ބުނީ ރަފޭލް ޖެޓްތަކުގެ ވިޔަފާރިއަށް ގެއްލުންދިނުމަށް، ހާލަތުގެ ބޭނުން ހިފައިގެން ޗައިނާއިން ޑިސްއިންފޮމޭޝަން ކެމްޕޭނެއް ހިންގިކަމަށެވެ. އެގޮތުން ޖޭ-10 ގެ ޖެޓްތަކުން ދިން ހަމަލާގައި ހަލާކުވެފައިވާކަމަށް ބުނާ ރަފޭލް ޖެޓްތަކެއް ދައްކުވައިދޭ އޭ.އައި ވީޑިއޯތަކަކާއި، ވީޑިއޯ ގޭމެއްގެއް މަންޒަރުތަކެއް ހިމެނޭ ކްލިޕްތަކެއް، ފޭކް ސޯޝަލް މީޑިއާ އެކައުންޓްތަކެއް ބޭނުންކޮށްގެން ފަތުރާފައިވާކަމަށް އެމެރިކާގެ ރިޕޯޓުގައި ވެއެވެ.
ޗައިނާއިން ވަނީ އާއްމު އުސޫލުގެ މަތިން އެމެރިކާގެ ތުހުމަތުތައް ދޮގުކޮށްފައެވެ. އަދި އެމެރިކާގެ މި ކޮމިޝަނަކީ އަބަދުވެސް ޗައިނާއާއި ދެކޮޅު ރިޕޯޓްތައް ނެރޭ ބައެއްކަމަށް ޗައިނާގެ ފޮރިން މިނިސްޓްރީއިން ވަނީ ބައެއް މީޑިއާތަކަށް ކޮމެންޓް ކޮށްފައެވެ.
Advertisement
This content is created and paid for by advertisers and does not involve Voice Journalists
