ވިލިމާލޭގައި ހުންނަ ދެ ނިކަގަސް ކަނޑާލުމަށްފަހު، އެ އަވަށުގައި 300 ގަސް އިންދުމަށް ތިމާވެއްޓާ ބެހޭ ވަޒީރަށް މިހާރު އަންގަވާފައިވާނެ ކަން ރައީސް މުހައްމަދު މުޢިއްޒު ރޭ އިއުލާންކުރައްވައިފިއެވެ.
މިދިޔަ އާދިއްތަ ދުވަހު ވިލިމާލޭ ރައްޔިތުންނާ ރައީސް ބައްދަލުކުރެއްވުމަށް ބޭއްވި ޖަލްސާގައި، ޖަލްސާއަށް ހާޒިރުވި އަވަށުގެ ރައްޔިތުންވަނީ، ވިލިމާލޭ ދެ ނިކަގަހުގެ ސަބަބުން ގިނަ އަނދަގޫތަކެއް އެ ގަސް ހުންނަ ސަރަހައްދުގައި ދިރިއުޅޭ މީހުންނަށް ވަމުންދާކަން ފާހަގަކޮށްފައެވެ.
އެއާއެކު ރައީސްވަނީ އެ ޖަލްސާއަށް ދިޔަ މީހުންގެ މެދުގައި އަތް އުފުލައިގެން ވޯޓެއް ނަގައި އެ ދެ ގަސް ކަނޑާލަން ނިންމެވިކަން އިއުލާން ކުރެއްވާފައެވެ.
އެކަމާ ގުޅިގެން ތިމާވެއްޓަށް ލޯބިކުރާ ބައެއް ފަރާތްތަކުގެ ފާޑުކިޔުންތައް ރައީސްއަށް ވަނީ އަމާޒުވެފައެވެ.
ރޭ މައްޗައްގޮޅީ ރައްޔިތުންނާއެކު ބޭއްވި ބައްދަލުވުމުގައި އެފަރާތްތަކަށް ރައްދުދެއްވަމުން ރައީސް ވިދާޅުވީ، މި ސަރުކާރަކީ ތިމާވެއްޓާމެދު އެންމެ ބޮޑަށް ވިސްނާ، ތިމާވެށި ރައްކާތެރިކުރަން މަސައްކަތްކުރާ ސަރުކާރެއް ކަމަށެވެ. އެގޮތުން ފަސް މިލިއަން ގަސް ފަސް އަހަރު ތެރޭގައި އިންދުމަކީ މީގެ ކުރިން އެއްވެސް ސަރުކާރަކުން ކުރި ކަމެއް ނޫން ކަމަށެވެ. އަދި އެ ޕްރޮގްރާމްގެ ދަށުން ގާތްގަނޑަކަށް އެއް މިލިއަން ގަސް މިހާރުވެސް އިންދާފައިވާ ކަމަށް ވިދާޅުވިއެވެ.
ކުރިއަށް މި އޮތް ތިން އަހަރު ތެރޭ އަޅުގަނޑުމެން ސްޕީޑްއަޕް ކޮށްގެން މި ފަސް މިލިއަން މި ހަމަކުރަނީ. ޕްލެޖް ކޮށްފައި އެބަހުރި 6 މިލިއަން. ބޭރުގެ ދޭދޭ ގައުމުތަކުންނާ އެކި އެންޖީއޯތަކުންނާ. ސަރުކާރުގެ ބަޖެޓް ތެރެއިން ޚަރަދުކޮށްގެންވެސް ފަސްމިލިއަން ގަސް އެބަ އިންދަން. ފެހި ކުރުމުހެ ޕްރޮގްރާމެއް އެއީ.
ރައީސް މުހައްމަދު މުޢިއްޒު
ރައީސް ވިދާޅުވީ، ދެމެހެއްޓެނިވި ތަރައްގީއާއި ތިމާވެއްޓަކީ މުހިއްމު އެއްޗެއް އެކަން ސަރުކާރުން ގަބޫލު ކުރާ ކަމަށެވެ.
"އަޅުގަނޑުމެންނަކީ ފެހިކަމަށް ލޯބި ކުރާ، ގަސްތަކަށް ލޯބި ކުރާ ބައެއް. އަޅުގަނޑުމެންނެއް ގަސް ކެނޑުމާ މިކަންކަމަކީ އަޅުގަނޑުމެންގެ ސިޔާސަތެއް ނޫން.“
ރައީސް މުހައްމަދު މުޢިއްޒު
މިއާއެކު ރައީސް ވިދާޅުވީ، ތަނެއްގެ ޒަރޫރީ ބޭނުމަކަށް ނުވަތަ، ގަހުގެ ސަބަބުން މީހުންނަށް ތަކުލީފްތަކެއް ކުރިމަތިވާނަމަ، އޮންނަ ހަމަތަކާއި އުސޫލުތަކުގެ މަތީން، ގާނޫނީ އިޖުރާޢަތްތައްވެސް ފުރިހަމަ ކޮށްގެން، ގަހެއް ނެގުމަކީ ގަސް އިންދުމާ ދެކޮޅު ހެދުމެއްނޫން ކަމަށެވެ. އަދި ޒަރޫރީ ބޭނުމަށް ކަނޑާލާ ގަހުގެ ބަދަލުގައި އިތުރު ގަސްތަކެއް އިންދަން ޖެހޭނެ ކަމަށްވެސް ވިދާޅުވިއެވެ.
"އެއް ގަސް ނަގައިފިއްޔާ މަދުވެގެން ތިން ގަސް ޖަހަން ޖެހޭނެ. މިހާރު ވިލިމާލެއިން ނަގާ ދެ ނިކަގަހުގެ ބަދަލުގައި، އަޅުގަނޑު އޮންނާނީ އެންވަޔަރަމެންޓް މިނިސްޓަރަށް ދަންނަވާފައި މުޅި ވިލިމާލޭގައި މަދުވެގެން 300 ގަސް ޖަހަން ވާނެއޭ، މަދުވެގެން 300 ގަސް. މިހާރު އެބޭފުޅުން އެ ޕްރޮގްރާމް އެ ފަށަނީ،"
ރައީސް މުހައްމަދު މުޢިއްޒު
”އަޅުގަނޑުމެންނަކީ ފެހި ކުރުމަށް ލޯބިކުރާ ބައެއް. ރިނިޔުވަބަލް އެނާޖީއަކީ އަޅުގަނޑުމެންގެ އެންމެ ބޮޑު އެއް ސިޔާސަތު.“ ރައީސް ވިދާޅުވިއެވެ.
ރައީސް ވިދާޅުވީ 2028 ވަނަ އަހަރަށް ދާއިރު ރާއްޖޭގެ ކަރަންޓަށް ކުރާ ޚަރަދުގެ 33 އިންސައްތަ އަކީ ރިނިޔުވަބަލް އެނާޖީއަށް ހެދުމުގެ މަސައްކަތް ފަށާފައިވާ ކަމަށާ، އެކަމުގެ ސަބަބުން ދައުލަތުގެ ބަޖެޓުން ކުރާ ޚަރަދުވެސް ބޮޑުތަނުން ކުޑަވެގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
