އަންނަ އަހަރުގެ މާރިޗު މަހަށް ރަސްމާލެ ހިއްކުމުގެ މަޝްރޫޢުގެ މަސައްކަތް ނިނަމާލެވޭނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވި މައްޗަންގޮޅީގެ ރައްޔިތުންނާ ބައްދަލުކުރެއްވުމަށް ރޭ ބޭއްވި ޖަލްސާގައި ވާހަކަފުޅުދައްކަވަމުންނެވެ. މި ޖަލްސާގައި ރައީސް ވިދާޅުވީ ރަސްމާލެ ހިއްކުމުގެ މަސައްކަތް އަވަސްކުރުމަށް އަންނަ މަހުގެ ތެރޭގައި ބޮޑު ޑްރެޖަރެއް އަންނާނެކަމަށެވެ. މި ޑްރެޖަރަކީ ހުޅުމާލޭ ފޭސް 3 ހިއްކުމުގެ މަސައްކަތަށް ގެނައި ޑްރެޖަރަށް ވުރެ ބޮޑު ޑްރެޖަރަކަށް ވުމުން ބިން ހިއްކުމުގެ މަސައްކަތް އިތުރަށް އަވަސްވާނެކަމަށް ވެސް ރައީސް ވިދާޅުވިއެވެ. އަދި މިހާރުވެސ ރަސްމާލޭގެ 3 ސަރަހައްދަކުން އެއްފަހަރާ ބިން ހިއްކަމުން އަންނަ ކަމާއި، ރަސްމާލޭގެ ބިން ދެން އަންނަ އަހަރުގެ މާރިޗު މަސް ނުވަތަ އޭޕްރީލް މަހާއި ހަމައަށް އެއްކޮށް ނިންމާލެވޭނެކަމަށް ވެސް ރައީސް ވިދާޅުވިއެވެ.
މި ބައްދަލުވުމުގައި ރައީސް އިތުރަށް ވިދާޅުވީ ރަސްމާލެ ބިން ހިއްކާ ނިމޭއިރު އެސަރަޙައްދުން ގޯތި ލިބޭ ފަރާތްތައް ކަނޑައަޅާ ނިންމުމަށް އުސޫލުގެ ތެރެއިން މިހާރުވެސް އެމަސައްކަތްތައް ކުރެވެމުންދާކަމަށެވެ. ރަސްމާލެއިން ޖުމްލަ 25000 ގޯތި ދޫކުރުމަށް ހަމަޖެހިފައިވާއިރު ފުރަތަމަ ބުރުގައި ސަރުކާރުންވަނީ ރަސްމާލެއިން 15000 ގޯތިދޫކުރުމަށް ނިންމަވާ އެކަން ޢިއުލާންކުރައްވާފައެވެ.
"ރަސްމާލެ ހިއްކާ ނިމޭނެ އަންނަ މާރިޗު ނުވަތަ އޭޕްރީލް މަހާހިސާބަށް، އެއީ ހުޅުމާލެއަށްވުރެ ތިންގުނަ ބޮޑު ސަރަޙައްދެއް. ޖުމްލަ 25000 ގޯތިދޫކުރުމަށް ނިންމާފައިވަނީ. ފުރަތަމަ ބުރުގައި 15000 މިހާރުވާނީ ޢިއުލާން ކުރެވިފައި."
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު
ރައީސް ވިދާލުވީ ކުރީގެ ސަރުކާރުން ނުހިއްކާ ހުރި ތަންތަނުން ގޯތިތައް ދީފައި ހުރުމުން އެތަންތަން ހިއްކުމުގެ މަސައްކަތް ވެސް މިސަރުކާރުން ފަށައިގެން ކުރިއަށްދާ ކަމަށެވެ. އެގޮތުން މި މަސައްކަތްތައް އަވަސްކުރުމަށް އިތުރު ޑްރެޖަރު ގެނެސްފައިވާ ކަމަށާއި އެޑްރެޖަރު ބޭނުންކޮށްގެން ހުޅުމާލޭ ފޭސް ތިނެއް ހިއްކުމުގެ މަސައްކަތް މާދަމާ ފަށާނެ ކަމަށާއި، އަންނަމަހުގެ ނިޔަލަށް ފޭސް 3ގެ މަސައްކަތް އެއްކޮށް ނިމޭނެ ކަމަށް ރައީސް ވިދާޅުވިއެވެ. އަދި އޭގެ ފަހުން ގިރާވަރު ހިއްކުމުގެ މަސައްކަތެއް ފަށާ، އެ މަސައްކަތް ވެސް 2 މަސް ދުވަހުގެ ތެރެ ނިންމާލެވޭނެ ކަމަށް ރައީސް ވިދާޅުވިއެވެ.
ރަސްމާލެ ހިއްކުމުގެ މަޝްރޫއަކީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހިންގަމުން އަންނަ އެންމެ ބިޔަ މަޝްރޫޢެވެ. މިދިޔަ އަހަރުގެ ތެރޭގެައި ފެށި މި ބޮޑު މަޝްރޫޢުގެ ބޮޑުބައެއް މިހާރު ވަނީ ނިންމާލާފައެވެ. އަދި އެ ސަރަހައްދުން ގެދޮރު ދޫކުރުމުގެ މަސައްކަތްވެސް ބާރު ދުވެލީގައި ސަރުކާރުން ކުރިއަށް ގެންދެއެވެ.
Advertisement
This content is created and paid for by advertisers and does not involve Voice Journalists
