ނައިބު ރައީސުންގެ އިނާޔަތަށް ޝަރުތު ހަމަވަނީ ފައިސަލް އެކަނި
ރައީސުލްޖުމްހޫރިއްޔާގެ ނައިބުކަން ކޮށްފައިވާ ފަރާތްތަކަށް ދައުލަތުގެ ބަޖެޓުން އިނާޔަތެއް ދޭގޮތަށް ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި ޢިނާޔަތްތަކާބެހޭ ޤާނޫނު އިސްލާހްކުރަން ހުށަހަޅާފައިވާއިރު، އެ އިނާޔަތަށް ޝަރުތު ހަމަވަނީ، ނިމިދިޔަ ދައުރުގައި ނައިބު ރައީސްކަން ކުރެއްވި ފައިޞަލް ނަސީމެވެ.
ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި ޢިނާޔަތްތަކާބެހޭ ޤާނޫނަށް އިސްލާހް ގެނައުމުގެ މަޖިލީހަށް ހުށަހެޅުއްވީ، ޕީއެންސީއަށް ނިސްބަތްވެވަޑައިގަންނަވާ ހުޅުދޫ ދާއިރާގެ މެންބަރު މުޙައްމަދު ޝާހިދެވެ.
މީގެ ކުރިން ގާނޫނު އޮތް ގޮތުން ނާއިބު ރައީސުންނަށް އެއްވެސް އިނާޔަތެއް ނުލިބުނަސް ސަރުކާރުގެ ފަރާތުން ހުށަހެޅި ބިލުގައި ނާއިބު ރައީސުންނަށް އިނާޔަތެއްގެ ގޮތުގައި މަހަކު 25،000 ދިނުމަށާ، ރާއްޖެ އާއި ރާއްޖެއިން ބޭރުން ދައުލަތުގެ ޚަރަދުގައި ސިއްޙީ ޚިދުމަތްތައް ލިބިދޭނެ އިންތިޒާމް ހަމަޖެއްސުމަށް ވަނީ ހިމަނާފައެވެ.
ނަމަވެސް ނައިބު ރައީސްކަން ކުރައްވާފައިވާ ބޭފުޅެއް ކަމަށް ބަލާނީ ގާނޫނުއަސާސީގައިވާ ގޮތުގެ މަތިން ފަސް އަހަރުގެ ރިޔާސީ ދައުރެއް ފުރިހަމަ ކޮށްފައިވާ ނަމަ ކަމަށް އިސްލާހުގައި ވެ އެވެ.
އެހެންކަމުން އެ އިނާޔަތް ލިބިވަޑައިގަންނަވާނީ މިހާތަނަށް ފަސް އަހަރުގެ ރިޔާސީ ދައުރެއް ފުރިހަމަ ކުރެއްވި ހަމައެކަނި ނައިބު ރައީސް ފައިސަލަށް އެކަންޏެވެ.
އެނޫން އެއްވެސް ބޭފުޅަކަށް ނައިބު ރައީސްކަމުގައި ފަސް އަހަރުގެ ދައުރެއް ފުރިހަމަ ކުރެއްވިފައެއް ނުވެ އެވެ.
Advertisement
This content is created and paid for by advertisers and does not involve Voice Journalists
