2025 ވަނަ އަހަރުގެ 2 މިލިއަން ވަނަ ފަތުރުވެރިޔާ، ބެތަނީ ސާރާ ކާސްވެލް މިއަދު ރާއްޖެ އަތުވެއްޖެއެވެ. މިއީ އިންގްލޭންޑަށް ނިސްބަތްވާ ރައްޔިތެކެވެ. 

ވެލާނާ އިންޓަނޭޝަނަލް އެއާޕޯޓުން އެނާއަށް ވަނީ ހޫނު މަރުހަބާއެއް ކިޔާފައެވެ. ޓޫރިޒަމް މިނިސްޓްރީ އާއި އެމްއޭސީއެލްގެ އިތުރުން އެމްއެމްޕީއާރުސީއާ ފަތުރުވެރިިކަމުގެ ސިނާއަތުގައި ހަރަކާތްތެރިވާ ފަރާތްތަކުން ވަނީ އެ ފަތުރުވެރިޔާއަށް މަރުހަބާކިޔާފައެވެ. މިކަމަށްޓަކައި ވެލާނާ އިންޓަރނޭޝަނަލް އެއާޕޯޓްގައި ހަފްލާއެއް ބާއްވާފައިވާއިރު، މި ހަފްލާ ޝަރަފްވެރިކޮށަްދެއްވީ ޓޫރިޒަމް މިނިސްޓަރު ތޯރިޤު އިބްރާހިމް އެވެ.

މިއީ ބެތަނީއާއި އޭނާގެ ފިރިމީހާ ރާއްޖެ އައި ފުރަތަމަ ފަހަރެވެ. މި ފެމަފިރިން ރާއްޖެ އައިސްފައިމި ވަނީ ހަނީމޫނަށް ކަމަށް ބެތަނީ ވަނީ ބުނެފައެވެ. އެނާ ބުނީ ދިވެހިންނަކީ ހިތްހެޔޮ އެކުވެރި ބައެއްކަމަށާއި ރާއްޖެއަށް އޭނާ ދޭނީ 10އަކުން 10 އެއްކަމަށެވެ. މި ދަތުރުގައި އެމީހުން ތިބުމަށް ހަމަޖެހިފައިފަނީ އައުޓްރިގާ ރިސޯޓުގައެވެ.

ރާއްޖެއަށް ފުރަތަމަ ފަހަރަށް 2 މިލިޔަން ފަތުރުވެރިން އައިސްފައިވަނީ މިދިޔަ އަހަރެވެ. އެ އަހަރު 2 މިލިޔަން ފަތުރުވެރިން ހަމަވީ ޑިސެމްބަރ 26 ވަނަ ދުވަހުއެވެ. މިއަހަރު 2 މިލިޔަން ފަތުރުވެރިން ހަމަވީ މިދިޔަ އަހަރާއި އަޅާބަލާއިރު 1 މަސްދުވަހު ކުރިންނެވެ. އަދި ސަރުކާރުން ވަނީ ދެން ކުރިއަށް އޮތް އަހަރުތަކުގައި ދެ މިލިއަން އަށް ވުރެ ގިނަ ފަތުރުވެރިން ރާއްޖެ އަންނާނެކަމަށް ލަފާކުރެވޭ ކަމަށް ވިދާޅުވެފައެވެ.

މިހާރު އެވްރެޖްކޮށް ރާއްޖެއަށް ދުވާލެއްގެ މައްޗަށް 6000 އަށްވުރެ ގިނަ ފަތުރުވެރިން އާދެއެވެ. މިހާރު ރާއްޖެއަށް އެންމެ ގިނައިން ފަތުރުވެރިން އަންނަނީ ޗައިނާއިންނެވެ. މިއަހަރުގެ މިހާތަނަށް ޗައިނާއިން 3 ލައްކައަށްވުރެ ގިނަ ފަތުރުވެރިން ވަނީ ރާއްޖެ އައިސްފައެވެ.