ކުރީގެ ރައީސް މުހައްމަދު ނަޝީދަށް މަރުގެ އިންޒާރު ދިންކަން ސާބިތުވެ، ހ. ލައިޓްނައިޓް، އިސްމާޢީލް ޔާފިސް، 10 އަހަރަށް ޖަލަށްލާން އިއްޔެ ކްރިމިނަލް ކޯޓުން ބުދަ ދުވަހު ހުކުމް ކޮށްފިއެވެ. 

ޕީޖީ އޮފީހުން މިއަދު ބުނީ، 2021 ވަނަ އަހަރު ސޯޝަލް މީޑިއާގެ އެކި ވަސީލަތްތައް މެދުވެރިކޮށާއި، ފުލުހުންގެ ޚިދުމަތުގެ ތަޙުޤީޤުގައާއި، ކްރިމިނަލް ކޯޓުގެ ޝަރީޢަތުގެ މަޖިލީހުގައި ރައީސް މުޙައްމަދު ނަޝީދު މަރަން ޙަމަލާދޭނެކަމަށް ބުނެ އިންޒާރުދީފައިވާ މައްސަލާގައި އިސްމާޢީމް ޔާފިސްއާއި ދައުލަތާ ދެމެދު ވެފައިވާ އިޢުތިރާފުގެ އެއްބަސްވުމުގެ ދަށުން އޭނާ 10 އަހަރަށް ޖަލަށްލުމަށް ކްރިމިނަލް ކޯޓުން ހުކުމް ކޮށްފައިވާ ކަމަށެވެ. 

މި މައްސަލާގައި އޭނާގެ މައްޗަށް ކޮށްފައިވާނީ އަންނަނިވި ދަޢުވާތައް:

- ޓެރަރިސްޓް ޖަމާޢަތަކަށް ތާއީދުކުރުން (2 އަހަރު)

- ޓެރަރިޒަމްގެ ޢަމަލެއް ހިންގާނެކަމުގެ އިންޒާރުދިނުން (3 އަހަރު)

- ޓެރަރިޒަމްގެ ޢަމަލެއް ކުރުމަށް ހިތްވަރު ދިނުން (5 އަހަރު)

ނަޝީދަށް އިންޒާރުދިން މައްސަލާގައި ޔާފިސް ހައްޔަރު ކިރެވުނީ 2021 ވަނަ އަހަރުގެ އޮގަސްޓު މަހުގައެވެ. އޭރު އޭނާ ހުރީ ރ. މީދޫ ގައެވެ.  

ނަޝީދަށް އިންޒާރު ދެމުން ޔާފިސް ބުނީ، ނަޝީދު ރާއްޖެ ވަޑައިގެންފި ނަމަ "އަބޫ ޖަހުލަށް ހަދާލި ގޮތް ހަދާނެ" ކަމަށާއި، އެއަހަރު މޭ މަހުގެ ހަވަނަ ދުވަހު ދިން ހަމަލައަށްވުރެ ވަރުގަދަ ހަމަލައެއް ދޭނެ ކަމަށް ބުނެއެވެ.

އެފަދައިން އޭނާ އިންޒާރުދީފައިވަނީ، ފޭސްބުކްގައި ކުރި ޕޯސްޓެއްގައެވެ.