ގަވާއިދާ ހިލާފަށް ރާއްޖޭގައި ވިޔަފާރިތައް ހިންގާ ބިދޭސީން ގެ މައުލޫމާތު ރިޕޯޓްކުރުމަށް ހުޅުވާލިތާ 41 ގަޑިއިރުގެ ތެރޭގައި ގިނަ އަދަދެއްގެ ބިދޭސީން ވިޔަފާރި ހިންގާކަމުގެ މައުލޫމާތު ލިބިފައިވާކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ރާއްޖޭގެ އެއްވެސް ސަރަހައްދެއްގައި ބިދޭސީއަކު ޤަވާއިދާ ހިލާފަށް ވިޔަފާރިއެއް ކުރާކަން ފާހަގަކުރެވިއްޖެ ނަމަ އެކަން ރިޕޯޓްކުރަން މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން ވަނީ މިދިޔަ ބްރާސްފަތިދުވަހު އެދިފައެވެ. މިކަމާ ގުޅޭގޮތުން އިކޮނޮމިކް މިނިސްޓަރު ސައީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ފުރަތަމަ 41 ގަޑިއިރު ތެރޭ، ބިދޭސީން ޤަވާޢިދާ ޚިލާފަށް ހިންގާ ކަމަށް ފާހަގަ ކުރެވޭކަން ފާހަގަކޮށް 29 ވިޔަފާރިއެއްގެ ރިޕޯޓު އާއްމުންގެ ފަރާތުން ލިބފައިވާކަމަށެވެ. 

މިނިސްޓަރު ވިދާޅުވީ މިކަމާ ގުޅިގެން ރައީސުލްޖުމްހޫރިއްޔާ އުފައްދަވާފައިވާ ނޭޝަނަލް ޓާސްކް ފޯސްގެ އޮޕަރޭޝަންތައް މިއަދު މެންދުރުފަހުން ފެށިގެން ކުރިއަށްދާނޭކަމަށެވެ. އަދި ރިޕޯޓު ކުރާ ވަރަކުން އެފަދަ ތަންތަން ބަލައި ފާސްކޮށް، ޤާނޫނުގައިވާ ގޮތުގެ މަތީން ފިޔަވަޅު އަޅަމުންދާނެ ކަމުގެ ޔަގީންކަންދޭކަމަށް މިނިސްޓަރު ވިދާޅުވިއެވެ.

މިދިޔަ އޮކްޓޯބަރުމަހުގެ ތެރޭގައި ފޮރިން އިންވެސްޓްމަންޓް ޤާނޫނަށް އަމަލުކުރަން ފަށާފައިވާއިރު، އެ ޤާނޫނު ބުނާގޮތުން ބިދޭސީންނަށް ވަނީ ބައެއް ކަހަލަ ވިޔަފާރިތައް ހިންގުން މަނާކޮށްފައެވެ. އޭގެ ތެރޭގައި ހޯލްސޭލް އަދި ރީޓެއިލް ވިޔަފާރި ފާހަގަކޮށްލެވެއެވެ.

އިކޮނޮމިކް މިނިސްޓްރީން ބުނީ ބިދޭސީންނަށް ރާއްޖޭގައި ވިޔަފާރި ކުރުން މަނާ ދާއިރާއެއްގައި ހަރަކާތްތެރިވާކަން ފާހަގަކުރެވޭނަމަ އެކަމުގެ މަޢުލޫމާތު އެ މިނިސްޓްރީގެ ވެބްސައިޓާއި ހޮޓްލައިން 3333199 އަށް ގުޅައިގެން ރިޕޯޓްކުރެވޭނޭކަމަށެވެ. އަދި އިމުގަ ޕޯޓަލް މެދުވެރިކޮށްވެސް ރިޕޯޓް ކުރެވޭނެއެވެ.

އެގޮތަށް ފޯރުކޮށްދޭ މައުލޫމާތު ސަރުކާުގެ ކަމާބެހޭ މުއައްސަސާތައް ގުޅިގެން ގާއިމްކޮށްފައިވާ "ނެޝަނަލް ޓާސްކްފޯރސް އޮން ކޮމްބެޓިންގ އިލީގަލް އެކްސްޕެޓްރިއޭޓް އޮޕަރޭޝަންސް އެންޑް ބިޒްނަސަސް" މެދުވެރިކޮށް، އަވަސް ފިޔަވަޅު އަޅާނެކަމުގެ ޔަގީންކަން ދޭކަމަށްވެސް މިނިސްޓްރީން ވަނީ ބުނެފައެވެ.