ލަންކާއަށް އަރާފައިވާ ތޫފާން ދިތުވާގެ ސަބަބުން ކުރިމަތިވަމުންދާ ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިޘާތަކުގެ ސަބަބުން އެގައުމުގައި ކުއްލި ނުރައްކަލުގެ ހާލަތު އިއުލާންކޮށް ބައިނަލްއަޤުވާމީ އެހީތެރިކަމަށް އެދިއްޖެއެވެ.
ނޮވެމްބަރު މަހުގެ 18 ވީ ހުކުރު ދުވަހުން ފެށިގެން އެ ޤައުމުގައި ވަނީ ކުއްލި ނުރައްކަލުގެ ޙާލަތު އިޢުލާނުކޮށްފައެވެ.
ލަނކާއަށް ކުރިމަތުވެފައިވާ ތޫފާނުގެ ސަބަބުން މަރުވި މީހުންގެ ޢަދަދު 159 އަށް އުފުލި، ގެއްލިފައިވާ މީހުންގެ ޢަދަދު ވެސް ވަނީ 200 އަށް ވުރެ މައްޗަށް ގޮސްފައެވެ. ސްރީ ލަންކާގެ ބައި މިލިޔަނެއްހާ މީހުންނަށް ތޫފާނުގެ އަސަރުކޮށްފައިވާއިރު، އެކި ސަރަޙައްދުތަކުގައި 20،000 އަށްވުރެ ގިނަ ގެދޮރު ވަނީ ސުންނާފަތިވެފައެވެ. އެގޮތުން 108،000 އަށްވުރެ ގިނަ މީހުން ވަނީ އެކި ސަރަޙައްދުތަކުގައި ޤާއިމްކޮށްފައިވާ އެހީދޭ މަރުކަޒުތަކަށް ގެންގޮސްފައެވެ.
އެހެންކަމުން ސްރީ ލަންކާއަށް ކުރިމަތިވެފައިވާ މި އުނދަގޫ ޙާލަތުގައި އެ ޤައުމަށް ބައިނަލްއަޤްވާމީ ދުނިޔެއިން އެހީތެރިކަން ފޯރުކޮށްދިނުމަށް އެ ޤައުމުން ވަނީ އެދިފައެވެ. އަދި ޤައުމުން ބޭރުގައި ދިރިއުޅޭ ސްރީ ލަންކާގެ ރައްޔިތުން ޤައުމުގެ ރައްޔިތުންނަށް އެހީތެރިވުމަށް ވެސް ސަރުކާުރުން ވަނީ ގޮވާލައިފައެވެ. ސްރީ ލަންކާގެ ބޮޑުވަޒީރު ހަރީނީ އަމާރަސޫރިޔާ ވެސް ވަނީ ކޮލޮމްބޯގައި ތިއްބަވާ ބޭރުގެ ޑިޕްލޮމަޓުންނާ ބައްދަލުކުރައްވައި ޙާލަތު ޙިއްޞާކުރައްވައި، އެ ޤައުމުތަކުގެ އެހީތެރިކަމަށް ވެސް އެދިވަޑައިގެންފައެވެ.
ލަންކާއަށް އެހީތެރިވުމުގެ ގޮތުން ދިވެހި ސަރުކާރުން ވަނީ 50،000 ޑޮލަރާއި 25،000 މަސްދަޅުކޭސް އެގައުމަށް ހަދިޔާކުރަން ނިންމާފައެވެ. އަދި އަވަށްޓެރި އިންޑިޔާއިން ވެސް ވަނީ ސްރީ ލަންކާއަށް 6.5 ޓަނުގެ ކާބޯތަކެތި ވައިގެ މަގުން ފޮނުވާފައެވެ. ކޮލޮމްބޯ ސަރަޙައްދުގައި އޮތް އިންޑިޔާގެ މަނަވަރަކުން ވެސް ވަނީ އެ މަނަވަރުގައި ހުރި ކާބޯތަކެތި ސްރީ ލަންކާއަށް ހަދިޔާކޮށްފައެވެ. އިންޑިޔާގެ ރައީސް ނަރެންދްރާ މޯދީ ވަނީ ސްރީ ލަންކާއަށް ތައުޒިޔާ ފޮނުއްވަވައި އެ ޤައުމަށް އިތުރު އެހީތެރިކަން ފޯރުކޮށްދިނުމަށް އިންޑިޔާއިން ތައްޔާރަށް އޮތް ކަމަށްވެސް ވިދާޅުވެފައެވެ.
އާދަޔާ ޚިލާފަށް ގިނަ ޢަދަދަކަށް ވާރޭވެހުމުގެ ސަބަބުން ސްރީ ލަންކާގެ ކޯރުތައް ބަންޑުންވަމުންދާއިރު، އެ ކޯރުތަކާއި ކައިރި ސަރަޙައްދުތަކުގައި ހުންނަ ގޭގެ ހުރީ ފެނު އަޑީގައެވެ. އަދި މި ކާރިސާގެ ސަބަބުން އެ ސަރަހައްދުތަކުން ވަނީ ކަރަންޓުވެސް ކެނޑިފައެވެ.
ސްރީ ލަންކާގެ ފުލުހުންނާއި ކަނޑުމަތީ ސިފައިންނާއި އަސްކަރިއްޔާއިން ދަނީ ޙާލުގައި ޖެހިފައިވާ މީހުން ސަލާމަތްކޮށް، ޢާންމުންނަށް އެހީތެރިކަން ފޯރުކޮށްދެމުންނެވެ. އަދި ކާބޯތަކެތި ބަހައި މަގުުތައް ސާފުކުރުމުގެ މަސައްކަތް ވެސް ދަނީ ކުރަމުންނެވެ.
ނަމަވެސް ކުރިއަށް އޮތް ދެ ދުވަހު ވެސް އެ ޤައުމަށް އަދިވެސް ބޯކޮށް ވާރޭ ވެހޭނެ ކަމަށް މޫސުމާ ބެހޭ އިދާރާތަކުން ބުނެފައިވާއިރު، ސްރީ ލަންކާގެ ޙާލަތު އިތުރަށް ގޯސްވާނެ ކަމުގެ ބިރު އޮތީ ހީވެފައެވެ.
Advertisement
This content is created and paid for by advertisers and does not involve Voice Journalists
