ދެކުނު އޭޝިޔާ ސަރަޙައްދަށް ކުރަމުންދާ ގަދަ ވިއްސާރައިގައި އުފެދިފައިވާ ބާރުގަދަ ތޫފާން ދިތުވާ މިއަދުގެ ވަގުތެއްގައި އިންޑިޔާގެ އިރުދެކުނު އައްސޭރިފަށުގެ ސަރަޙައްދުތަކަށް އަރާނެ ކަމަށް އެ ޤައުމުގެ މޫސުމާ ބެހޭ އިދާރާއިން އިންޒާރުދީފިއެވެ. 

އިންޑިޔާގެ މޫސުމާ ބެހޭ އިދާރާއިން ބުނީ، މިއަދުގެ ހެނދުނުގެ ވަގުތެއްގައި ތޫފާން ދިތުވާ އެ ސަރަޙައްދުތަކަށް އަރާނެ ކަމުގައެވެ. އަދި، ތޫފާނުގެ ބާރު އިތުރަށް ގަދަވަމުންދާނެ ކަމުގައި ވެސް އެ އިދާރާއިން ވަނީ އަންގާފައެވެ. 

މި ތޫފާނުގެ ނުރައްކާ އެންމެ ބޮޑަށް ކުރިމަތިވާނީ އިންޑިޔާގެ އިރުދެކުނުގައި އޮތް ތަމިލް ނާޑޫ ސްޓޭޓްގެ އުތުރާއި، ޕުދުޗެރީގެ ސަރަޙައްދުތަކުގެ އިތުރުން އަންދްރަ ޕްރަދޭޝް ސްޓޭޓްގެ ދެކުނުގެ ސަރަޙައްދުތަކަށް ކަމަށް ލަފާކޮށްފައިވެއެވެ. މި ތޫފާނާ ގުޅިގެން ތަމިލް ނާޑޫގެ އައްސޭރިފަށުގެ ސަރަޙައްދުތަކަށް މިހާރު ވެސް ދަނީ ބޯކޮށް ވާރޭވެހެމުންނެވެ. އަދި، އެ ސަރަޙައްދުގައި އާދަޔާ ޚިލާފަށް ވައި ބާރުވެފައިވާ ކަމުގައި ވެސް ރިޕޯޓުކޮށްފައިވެއެވެ.

އާދަޔާއި ހިލާފަށް ބޯކޮށް ވާރޭވެހި، ވައިގަދަވެ، ތަމިލް ނާޑޫން މި ވަގުތު ތޫފާނުގެ އަސަރު އެންމެ ބޮޑަށް ކުރަމުން ދަނީ ވޭދާރާނިޔަމްގައި އޮތް ކޯޑީއާކްރާއީ ގޮނޑުދޮށް އޮތް ސަރަޙައްދަށެވެ.

މި ތޫފާން އިންޑިޔާގެ އިރުދެކުނުގެ ސަރަޙައްދުތަކަށް އަރާނެ ކަމުގެ އިންޒާރު ދިނުމާ އެކު، އެ ސަރަޙައްދުތަކުގެ އިދާރާތަކުން ވަނީ ރައްކާތެރި ކަމުގެ ފިޔަވަޅުތައް އަޅަން ފަށާފައެވެ. އެގޮތުން ކުއްލި ހާލަތްތަކުގައި ހަރަކާތްތެރިވެ އެހީތެރިވާ ޓީމުތައް ތައްޔާރީ ހާލަތަކަށް ގެނެސް، ތަމިލް ނާޑޫގެ އިތުރުން އަންދްރަ ޕްރަދޭޝާއި ޕުދުޗެރީއަށް ރަތް ސަމާލު ވަނީ އިޢުލާނު ކޮށްފައެވެ. މީގެ އިތުރުން، ރައްކާތެރި ކަމުގެ ފިޔަވަޅުތައް އެޅުމަށް އެ ސަރަހައްދުތަކުގެ އައްސޭރިފަށުގައި ދިރިއުޅޭ ރައްޔިތުންނަށް ވަނީ އިރުޝާދު ދީފައެވެ. އެގޮތުން ގެއިން ބޭރަށް ނުދިޔުމަށް ޢާންމު ރައްޔިތުންނަށް އަންގައި، އެ އިދާރާއިން ވަނީ ކަނޑު މައްޗަށް ނޭރުމަށް މަސްވެރިންނަށް އިރުޝާދު ދީފައެވެ.  

ސްރީލަންކާއަށް އެރި މި ނުރައްކާތެރި ތޫފާން ދިތުވާގައި 150 އަށް ވުރެ ގިނަ މީހުން މިހާރު ވަނީ މަރުވެފައެވެ. އަދި ގެއްލިފައިވާ މީހުންގެ ޢަދަދު ވެސް ވަނީ 200 އަށް ވުރެ މައްޗަށް ގޮސްފައެވެ. ސްރީ ލަންކާގެ ބައި މިލިޔަނެއްހާ މީހުންނަށް ތޫފާނުގެ އަސަރުކޮށްފައިވާއިރު، އެކި ސަރަޙައްދުތަކުގައި 20،000 އަށްވުރެ ގިނަ ގެދޮރު ވަނީ ސުންނާފަތިވެފައެވެ.