ދިވެހިރާއްޖެއާއި ތައިލެންޑާއި ދެމެދު ކުޅިވަރުގެ ދާއިރާއިން ގުޅުން ބަދަހިކުރުމާ ބެހޭ އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ މިމަހުގެ 27 ވަނަ ދުވަހު ތައިލެންޑްގެ ކުޅިވަރު ވުޒާރާގައި ބޭއްވުނު ރަސްމިއްޔާތެއްގައެވެ. މި ރަސްމިއްޔާތުގައި ދިވެހި ސަރުކާރުގެ ފަރާތުން މިއެއްބަސްވުމުގައި ސޮއިކުރެއްވީ ރާއްޖޭގެ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ. އަދި ތައިލެންޑް ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ އެގައުމުގެ ފަތުރުވެރިކަމާއި ކުޅިވަރާއި ބެހޭ ވަޒީރު ޕަތުޕޮންގު ޕޮންގުސަކުލްއެވެ.

މިރަސްމިއްޔާތުގައި ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރު ފުވާދު ތައުފީޤު ހިމެނޭހެން ރާއްޖޭގެ ވަފުދަކުންވެސް ބައިވެރިވެވަޑައިގެންފަވެއެވެ. އަދި ތައިލެންޑުގެ ފަރާތުން މިރަސްމިއްޔާތުގައި ބައިވެރިވެވަޑައިގެންނެވި ވަފުދުގައި ހިމެނެނީ އެގައުމުގެ ޚާރިޖީ ވުޒާރާގެ ބޭފުޅުންނާއި، ޑިޕާޓްމަންޓު އޮފް ފިޒިކަލް އެޑިއޭޝަންގެ އިސްފަރާތްތަކުގެ އިތުރުން، ނެޝަނަލް ސްޕޯޓްސް ޔުނިވަރސިޓީ އަދި ތައިލެންޑްގެ ކުޅިވަރު އޮތޯރިޓީގެ ބޭފުޅުންނެވެ.

މިއެއްބަސްވުމުގެ ދަށުން ތައިލެންޑްގެ ޑިޕާޓްމަންޓް އޮފް ފިޒިކަލް އެޑިއުކޭޝަނާއި ސްޕޯޓްސް އޮތޯރިޓީ އޮފް ތައިލެންޑް އަދި އެގައުމުގެ ނެޝަނަލް ސްޕޯޓްސް ޔުނިވަރސިޓީގެ ފަރާތުން ރާއްޖެއަށް އެހީތެރިކަން ފޯރުކޮށްދިނުމަށްވަނީ ހަމަޖެހިފައެވެ. އަދި ދެ ގައުމުގެ ގުޅުން ބަދަހިކުރުމަށާއި ކުޅިވަރުގެ ދާއިރާއިން އެއްބާރުލުން ދިނުމުގެ އިތުރުން މިދާއިރާއިން މީހުން ތަމްރީނުކުރުމަށް އެއްބާރުލުން ދިނުމުގެ ގޮތުން، ކުޅިވަރުގެ ދާއިރާގެ މުވައްޒަފުން ކުރިއެރުވުމާއި، ތަމްރީނުދިނުމުގެ އިތުރުން، ކުޅިވަރުގެ ތަމްރީނާއި ކުޅިވަރުގެ ދާއިރާއިން ޒުވާނުން ކުރިއެރުވުމުގެ ޕްރޮގްރާމްތައް ހިންގުމަށް ވަނީ ހަމަޖެހިފައެވެ. އަދި ކުޅިވަރުގެ ވަސީލަތްތަކާއި ފެސިލިޓީތައް ތަރައްޤީކުރުމަށް ވެސް މިއެއްބަސްވުމުގެ ދަށުން އެހީތެރިކަން ލިބިގެންދާނެއެވެ.

މި ރަސްމިއްޔާތުގައި އެގައުމުގެ ފަތުރުވެރިކަމާއި ކުޅިވަރާއި ބެހޭ ވަޒީރު ވިދާޅުވެފައިވަނީ ތައިލެންޑާއި ރާއްޖެއާއި ދެމެދު މި ސޮއިކުރެވުނު އެއްބަސްވުމުގެ ދަށުން ދެ ގައުމުގެ ރައްޔިތުންގެ މެދުގައި އެކުވެރިކަމާއި އެއްބައިވަންތަކަން އާލާވެގެންދާނެކަމަށް ގަބޫލުކުރައްވާކަމަށެވެ.