ދެކުނު އޭޝިޔާ ސަރަޙައްދުގައި އުފެދިފައިވާ ބާރުގަދަ ތޫފާން ދިތުވާ، އިންޑިޔާގެ އިރުދެކުނުން ތަމިލް ނާޑޫގެ އައްސޭރިފަށުގެ ސަރަޙައްދުތަކަށް އެރުމާ ގުޅިގެން ހިނގި ނުރައްކާތެރި ހާދިސާތަކެއްގައި ތިން މީހުން މަރުވެއްޖެއެވެ.

ސްރީ ލަންކާގެ ސަރަޙައްދުތަކަށް ބޮޑެތި ގެއްލުންތަކެއް ދިނުމަށް ފަހު މިއަދުގެ ހެނދުނުގެ ވަގުތެއްގައި ތޫފާން ދިތުވާ ވަނީ އިންޑިޔާގެ ސަރަޙައްދުތަކަށް ވެސް އަރާފައެވެ. އެގޮތުން ތަމިލް ނާޑޫގެ އިތުރުން އިންޑިޔާގެ އިރުދެކުނުގައި އޮތް ޕުދުޗެރީގެ ސަރަޙައްދުތަކާއި އަންދްރަ ޕްރަދޭޝް ސްޓޭޓްގެ ދެކުނުގެ ސަރަޙައްދުތަކަށް ވެސް ތޫފާނުގެ އަސަރު ދަނީ ކުރަމުންނެވެ.

މި ތޫފާނުގެ ނުރައްކާ އިތުރުވަމުން ދިޔުމާ އެކު ތަމިލް ނާޑޫ ސްޓޭޓްގެ ވެރިރަށް ޗެންނައިގައި އޮރެންޖު ސަމާލު އިޢުލާނު ކޮށްފައިވާއިރު، ރައްކާތެރި ކަމުގެ ފިޔަވަޅުތައް އެޅުމަށް އިންޑިޔާގެ މޫސުމާ ބެހޭ އިދާރާއިން ވަނީ އައްސޭރިފަށުގައި ދިރިއުޅޭ ރައްޔިތުންނަށް އިރުޝާދު ދީފައެވެ. ތަމިލް ނާޑޫން މި ވަގުތު ތޫފާނުގެ އަސަރު އެންމެ ބޮޑަށް ކުރަމުން ދަނީ ވޭދާރާނިޔަމްގައި އޮތް ކޯޑީއާކްރާއީ ގޮނޑުދޮށް އޮތް ސަރަޙައްދަށެވެ.  

މި ތޫފާނާ ގުޅިގެން ހިނގި ހާދިސާތަކުގައި ތަމިލް ނާޑޫގެ އައްސޭރިފަށުގެ ސަރަހައްދުތަކުން މިހާތަނަށް ތިން މީހަކު މަރުވެފައިވާ ކަން އެ ސްޓޭޓްގެ އާމްދަނީއާއި ކާރިސާތަކާ ބެހޭ ވަޒީރު ކޭކޭއެސްއެސްއާރް ރާމްޗަންދްރަން ވަނީ ކަށަވަރު ކޮށްދެއްވާފައެވެ. އޭގެ ތެރެއިން ދެ މީހަކު މަރުވީ ތަންޖާވުރާއި ތޫތުކުޑީގައި ފުރާޅުތަކެއް ވެއްޓި، އޭގެ ދަށުވެގެންނެވެ. ތިންވަނަ މީހާ މަރުވީ މައިލާދުތުރައީގައި ކަރަންޓުގައި ޖެހިގެންނެވެ. އަދި މި ކާރިސާގައި މިހާތަނަށް 149 ޖަނަވާރުވެސް މަރުވެފައިވާކަމަށް ރިޕޯޓުކޮށްފައިވެއެވެ. މީގެ އިތުރުން، މި ހާދިސާއާއި ގުޅިގެން 57,000 ހެކްޓަރުގެ ދަނޑުބިން ވެސް ހަލާކުވެފައިވާ ކަމުގެ މައުލޫމާތު ލިބެއެވެ. 

މި ތޫފާނުގައި ބާރު ވަޔާ އެކު މެދުކެނޑުމެއް ނެތި ބޯކޮށް ވާރޭވެހެމުން ދިޔުމާ ގުޅިގެން ގެދޮރުގައި ފެންބޮޑުވެ، ގިނަ އަދަދެއްގެ ބަޔަކު ހާލުގައި ޖެހުމުން އެފަރާތްތައް ވަނީ އެ ގައުމުގެ ސަލާމަތީ ބާރުތަކުގެ އެހީގައި ރައްކާތެރި ހިސާބުތަކަށް ބަދަލު ކޮށްފައެވެ. އެގޮތުން ރާމްޗަންދްރަން ވިދާޅުވީ، މިހާތަނަށް 2,300އަށްވުރެ ގިނަ މީހުން ވަގުތީ ހިޔާތަކަށް ބަދަލު ކޮށްފައިވާ ކަމުގައެވެ. 

ތޫފާން ދިތުވާ ސްރީ ލަންކާއަށް އަރާ، ކުރިމަތި ކުރުވި ގުދުރަތީ ކާރިސާގެ ސަބަބުން އެ ގައުމުގައި މަރުވި މީހުންގެ އަދަދު ވަނީ 190ށްވުރެ މައްޗަށް އުފުލިފައެވެ.