ޕީއެންސީގެ ކައުންސިލް އިންތިޚާބު ޕްރައިމަރީ ޑިސެމްބަރު 27 ގައި؛ ވާދަކުރުމުގެ ފުރުސަތު މާދަން ހުޅުވާލަނީ

ޕީއެންސީން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން: ފޮޓޯ/ ވޮއިސް

ކުރިއަށް ކައުންސިލް އިންތިޚާބުގައި ވެރިކަންކުރާ ޕީއެންސީގެ ޓިކެޓްގައި ވާދަކުރާ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީ އަންނަ މަހުގެ 27ގައި ބާއްވަން ނިންމައި ވާދަކުރަން ބޭނުންވާ ފަރާތްތަކަށް މާދަމާ ފުރުސަތު ހުޅުވާލާނެ ކަމަށް ބުނެފިއެވެ. 

މިކަން އިއުލާން ކޮށް، ޕީއެންސީން މިއަދު ބޭއްވި ނޫސްވެރިންގެ ބައްދަލުވުމުގައި، ކައުންސިލް އިންތިޚާބުގެ ޕީއެންސީގެ ތަރުޖަމާނު، އަދި އެޕާޓީގެ ޕީޖީ ގްރޫޕްގެ ލީޑަރު އިބްރާހިމް ފަލާޙް ވިދާޅުވީ، ޕީއެންސީ ޕްރައިމަރީގައި ވާދަކުރުމުގެ ފުރުސަތު މާދަމާއިން ފެށިގެން ޑިސެމްބަރު މަހުގެ 15 ވަނަ ދުވަހުގެ ނިޔަލަށް އޮންނާނެ ކަމަށެވެ. 

އަދި ޕްރައިމަރީއަށް ހުޅުވާލާފައިވާ މުއްދަތުގައި ޕާޓީއަށް އަލަށް ގުޅޭ މީހުންނަށް ވެސް އެ ޕްރައިމަރީގައި ވާދަކުރެވޭނެ ކަމަށެވެ. 

ފަލާޙް އިތުރަށް ވިދާޅުވީ، އިންތިޚާބަކީ ދެފުށްފެންނަ އިންތިޚާބަކަށް ހެދުމަށް މާލޭގައި ރަށްރަށުގެ ވޯޓު ފޮށިތައް ނުބަހައްޓަން ނިންމާފައިވާ ކަމަށެވެ. އަދި ޕްރައިމަރީގައި ވޯޓުލެވޭނީ އެ މީހަކު ނިސްބަތްވާ ރަށެއްގައި ބަހައްޓާފައި ހުންނަ ވޯޓު ފޮއްޓަށް އެކަނި ކަމަށެވެ.

އެވެސް މި އިންތިޚާބުގެ ސައްޙަކަން ކަށަވަރުކުރުމަށާ އެތެރޭގެ އިދާރީ ކަންކަން ވީހާވެސް ފުރިހަމައަށް ކުރިއަށް ގެންދިޔުމަށް. ބައެއް ފަހަރަށް ޕްރައިމަރީގައި ވޯޓުލާއިރުގައި މާލޭގައި ބަހައްޓާފައި ހުންނައިރު، ދެކޮޅަށް ދަތުރުކޮށް، ވޯޓު އޮޅޭ ކަހަލަ ކަންކަން ވެފައި ހުންނާތީ

ފަލާޙް

ފަލާޙް ވިދާޅުވީ، މިހާރު ރާއްޖޭގައި އޮތް އެންމެ ބޮޑު ޕާޓީ އަކީ ޕީއެންސީ ކަމަށް ވުމާއެކު، މި ޕްރައިމަރީ ވެގެންދާނީ ޕާޓީއަކުން މިހާތަނަށް ބޭއްވޭ އެންމެ ބޮޑު ޕްރައިމަރީ ކަމަށެވެ. އެގޮތުން މިހާތަނަށްވެސް މި ޕްރައިމަރީގައި 1400އަށް ވުރެ ގިނަ މީހުން ކުރިމަތިލާން ޝައުގުވެރިކަން ފާޅުކޮށްފައިވާ ކަމަށް ވިދާޅުވިއެވެ. 

"އަޅުގަނޑުމެންގެ މި ޕްރައިމަރީއަކީ ވަރަށް ބޮޑު ޕްރައިމަރީއަކަށްވާނެ. މިހާ ގިނަ މެންބަރުންތިބި ޕާޓީއެއްގައި ރާއްޖޭގެ ހުރިހާ ރަށަކުންވެސް މިހާރު މިތިބީ ވާދަކުރަން ފުރުސަތަކަށް އެދި، އެބޭފުޅުން އެކަމުގެ ޝައުގުވެރިކަން ފާޅުކޮށްފައި. އެހެންވީމާ ވަރަށް ބޮޑު ޕްރައިމަރީއަކަށް ވެގެންދާނެ. އުންމީދު މިކުރަނީ މިހާތަނަށް ރާއްޖޭގައި ބޭއްވޭ އެންމެ ބޮޑު ޕްރައިމަރީ އަށޭ މި ޕްރައިމަރީ ވާނީ،" ފަލާހު ވިދާޅުވި އެވެ.

ޕްރައިމަރީގައި ވާދަކުރަން ބޭނުންވާ މީހުން ފޯމު ލުމުގެ ކަންކަން ކުރިއަށްދާނީ ޕޯޓަލްއެއް މެދުވެރިކޮށް އޮންލައިން ކޮށް ކަމަށް ޕީއެންސީން މައުލޫމާތު ދެއެވެ. 

ކޮމެންޓް