ފާއިތުވި ހަފްތާގައި އިންޑޮނޭޝިޔާއަށް ކުރިމަތިވި ބޮޑު ތޫފާނުފަދަ ތޫފާނެއް ޙަޔާތުގައިވެސް ނުދެކޭ ކަމަށާ، ތޫފާން އައިއިރު ހީވީ ”ސުނާމީއެއް“ އައިހެން ކަމަށް އިންޑޮނޭޝިޔާގެ އުމުރުން ދުވަސްވީ ރައްޔިތަކު ބުނެފިއެވެ.

އޭޝިޔާ ސަރަހައްދުގައި އުފެދިފައިވާ ވަރުގަދަ ތޫފާނުގައި އިންޑޮނޭޝިޔާއަށްވެސް ބޯކޮށްވާރޭވެހި ފެންބޮޑުވުމުގެ ސަބަބުން މިހާތަނަށް މަރުވި މީހުންގެ އަދަދު 500 އަށް ވަނީ އަރާފައެވެ.

އަދި ރެސްކިޔު ވޯކާސް އަދިވެސް އެންމެ ބޮޑަށް އަސަރުކޮށްފައިވާ ސަރަހައްދުތަކަށް ދިއުމަށް މަސައްކަތް ކުރަމުންދާއިރު، 500 އަށްވުރެ ގިނަ މީހުން ގެއްލިގެން ހޯދަމުންދާ ކަމަށް ރިޕޯޓްތައް ބުނެއެވެ.   

އިންޑޮނޭޝިޔާގެ ކާރިސާ އެޖެންސީން ބުނާ ގޮތުގައި، ތޫފާނުގެ ސަބަބުން އިންޑޮނޭޝިޔާގެ ތިން ޕްރޮވިންސަކަށް އަސަރުކޮށްފައިވެއެވެ. އަދި، ގާތްގަނޑަކަށް 1.4 މިލިއަން މީހުންނަށް އޭގެ އަސަރުކޮށް، އެތައް ހާސް ބަޔަކަށް އަނިޔާވެފައިވެއެވެ. އެންމެ ބޮޑަށް އަސަރުކޮށްފައިވަނީ އާޗޭ، ނޯތު ސުމަތުރާ، އަދި ވެސްޓު ސުމަތުރާގެ ޕްރޮވިންސްތަކަށެވެ. މި ސަރަހައްދުތަކުގެ އެތައް ހާސް ރައްޔިތުންނަށް އަދިވެސް ތިބީ އަސާސީ ޚިދުމަތްތައް ނުލިބިއެވެ.

އާޗޭގެ ޕިޑީ ޖަޔާ އަވަށުގެ ރައްޔިތެއް ކަމަށްވާ އަރިނީ އަމާލިއާ ބީބީސީއަށް ބުނީ، ފެން ބޮޑުވިއިރު ހީވީ "ސުނާމީއެއްހެން" ކަމަށެވެ.

"އަހަރެންގެ މާމާ ބުނި ގޮތުގައި، މިއީ މާމަގެ ޙަޔާތުގައި ދުވަހަކުވެސް ނުދެކޭހާ ބިރުވެރި ބޮޑު ތޫފާނެއް ކަމަށް،" އަމާލިއާ ބުންޏެވެ. 

އެހީގެ މަސައްކަތްތެރިން މަސައްކަތް ކުރަމުންދަނީ ފައިމަގުންނާއި ސައިކަލްގައި ގިނަ ހިސާބުތަކަށް ދެވޭތޯއެވެ.

އާއްމު ވެފައިވާ ވީޑިއޯތަކުން ބްރިޖުތައް ވެއްޓި އޮޔާދާ މަންޒަރުތަކާއި، މަގުތައް އެއްކޮށް ފެންބޮޑުވެފައި ހުރި މަންޒަރުތައް ފެނެއެވެ. އަދި ބޮޑެތި ގަސްތައްވެސް ވެއްޓި ފައިހުރި މަންޒަރުތައް ފެނެއެވެ. 

އެގޮތުން ވެސްޓު ސުމަތުރާގައި ހުންނަ ޓްވިން ބްރިޖްސް ކައިރިއަށް ގިނަ އަދަދެއްގެ ގަސްތައްވެއްޓި ކުނިތައް ޖަމާވެފައިވާއިރު، ސަރަހައްދުގެ ރައްޔިތެއް ކަމަށްވާ މަރިޔާނާއަށް، ގެއްލިފައިވާ އޭނާގެ އާއިލާގެ މެންބަރުންގެ ހަށިގަނޑުތައްވެސް އަދި ނުފެންނަ ކަމަށް ބުނެފައިވެއެވެ. ގެއްލުނު މީހުންގެ ތެރޭގައި 15 އަހަރުގެ ދަރިފުޅުވެސް ހިމެނެއެވެ.

އާއިލާގެ މީހުންގެ ހަށިގަނޑު ފެނޭތޯ މަގުތައް ސާފުކުރުމުގެ މަސައްކަތުގައި އެކްސްކަވޭޓަރުތައް ހަރަކާތްތެރިވާ މަންޒަރު ބަލަން ހުންނަކަމަށް އޭނާ ބުނެފައިވެއެވެ.

ފާއިތުވި ދުވަސްތަކުގައި މި ތޫފާންގެ އަސަރުކޮށްފައިވަނީ އިންޑޮނޭޝިޔާ އެކަންޏެއް ނޫނެވެ. އޭގެ އިތުރުން، އޭޝިޔާގެ އެހެން ގައުމުތައް ކަމަށްވާ ތައިލެންޑް، މެލޭޝިޔާ، އަދި ސްރީލަންކާއަށް ވެސް ބޯކޮށް ވާރޭވެހި ތޫފާންތަކުގެ ސަބަބުން މީހުން މަރުވެފައިވާ ކަމަށް ރިޕޯޓުތައް ބުނެއެވެ.