ޔޫއޭއީއާއެކު އޮތް ގުޅުން އިތުރަށް ބަދަހިކުރަން ތައްޔާރު: ރައީސް މުޢިއްޒު
އެކުވެރި ޢަރަބި ޢިމާރާތް، ޔޫއޭއީއެކު އޮތް ގުޅުން އިތުރަށް ބަދަހިކުރުމަށް ރާއްޖެއޮތީ ތައްޔާރަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ޔޫއޭއީގެ ޤައުމީ ދުވަހާ ގުޅުވައި، މިއަދު އެކްސްގައި ކުރެއްވި ޕޯސްޓެއްގައި ރައީސް މުޢިއްޒު ވަނީ ޤައުމީ ދުވަހުގެ ތަހުނިޔާ، އެ ޤައުމުގެ ރައީސް ޝެއިޚް މުޙައްމަދު ބިން ޒަޔެދް އަލް ނަޙްޔާނަށާއި ރައްޔިތުންނަށް ފޮނުއްވާފައެވެ.
ރައީސް ވިދާޅުވީ، ޔޫއޭއީގެ ގައުމީ ދުވަސް ހަނދާންކޮށްދެނީ، އެކުވެރިކަމާއި އީޖާދީ ވިސްނުމާއި ކުރިއެރުމުގެ ތެރެއިން އެ ޤައުމަށް ލިބުނު ތަރައްޤީ ކަމަށެވެ.
އަދި ޔޫއޭއީއާއި ރާއްޖެއާ ދެމެދު އޮތް ގާތް ރަޙުމަތްތެރި ގުޅުން ފާހަގަކުރައްވައި އެމަނިކުފާނު ވަނީ ކުރިއަށް އޮތްތަނުގައިވެސް މި ގުޅުން އިތުރަށް ބަދަހިކުރަން މަސައްކަތްކުރަން ރާއްޖެ ތައްޔާރަށް އޮތްކަމަށް ވިދާޅުވެފައެވެ.
ދެގައުމުގެ ގުޅުން ބަދަހިކުރައްވަން ތައްޔާރަށް ހުންނެވިކަން ރައީސް ފާހަގަކުރައްވާފައިވާއިރު، މިދިޔަ އަހަރުގެ ފެބްރުއަރީ އެމަނިކުފާނު ޔޫއޭއީއަށް ކުރެއްވި ދަތުރުފުޅުގެ ތެރެއިން ވަނީ ދިވެހިރާއްޖެއާއި އެކުވެރި ޢަރަބި އިމާރާތާ ދެމެދު ވިޔަފާރީގެ ދާއިރާއިންނާއި، ފަތުރުވެރިކަމާއި ތަރައްޤީގެ އެހެނިހެން ދާއިރާތަކުން ގުޅުން ބަދަހިކުރަން މަޝްވަރާކުރައްވާފައެވެ.
ޔޫއޭއީއާއެކު ރާއްޖެއިން ސިޔާސީ ގޮތުން ގުޅުން ޤާއިމުކުރީ 1978 ވަނަ އަހަރުގެ މާރޗް މަހުގެ 15 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
