ސައްހަ ލިޔެކިޔުންނެތި ކާބޯތަކެތި އެތެރެކުރަން ހުއްދަދިން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ފީލްޑް އޮފިސަރުންތަކަކަށް ދައުވާކުރަން ފޮނުވައިފިއެވެ.

މި މައްސަލާގައި ދައުވާކުރަން ފޮނުވާފައިވަނީ، ދަފްތަރު ރސ 9244، އަޙްމަދު ހާޝިމް، އަދި ގދ. ތިނަދޫ، ޢަރަފާތު، އަޙްމަދު ޒާހިިރުގެ މައްޗަށެވެ. 

ޕީޖީ އޮފީހުން ބުނީ، މާރިޗު މަހުގެ ތެރޭގައި ޕޯޓް ކްލިއަރަންސްގައި މަސައްކަތްކުރާ އެމްއެފްޑީއޭގެ ފީލްޑް އޮފިސަރުންތަކެއް، ދިވެހިރާއްޖެއަށް ކާބޯތަކެތި އެތެރެކުރުމަށް ބޭނުންވާ ހެލްތް ސެޓްފިކެޓާ ނުލައި، ކަނޑުމަގުންނާއި، ވައިގެ މަގުން ދިވެހިރާއްޖެއަށް އެތެރެކޮށްފައިވާ ޝިޕްމަންޓްތަކެއް އެތެރެކުރުމަށް ކްލިއަރެންސް ދީފައިވާކަމަށް ތުހުމަތުކުރެވޭ މައްސަލާގައި ދައުވާ ކޮށްދިނުމަށްއެދި އިއްޔެ ކްރިމިނަލް ކޯޓަށް ހުށަހަޅައިފައިވާ ކަމަށެވެ. 

ދަފްތަރު ރސ 9244، އަޙްމަދު ހާޝިމްގެ މައްޗަށް ކުރާ ދައުވާ:

- ރަސްމީ ވާޖިބު އަދާކުރުމުގައި އެކަށީގެންނުވާ ޢަމަލެއް ހިންގުމުގެ ކުށުގެ 03 (ތިނެއް) ދަޢުވާ.

ގދ. ތިނަދޫ، ޢަރަފާތު، އަޙްމަދު ޒާހިިރުގެ މައްޗަށް ކުރާ ދައުވާ:

- ރަސްމީ ވާޖިބު އަދާކުރުމުގައި އެކަށީގެންނުވާ ޢަމަލެއް ހިންގުމުގެ ކުށުގެ 03 (ތިނެއް) ދަޢުވާ.

އަދަބު: 4 (ހަތަރެއް) މަހާއި 24 (ސައުވީސް) ދުވަސް (ކޮންމެ ދަޢުވާއަކަށް)

ޕީޖީ އޮފީހުން ބުނީ، ދަޢުވާލިބޭ މީހުންގެ ފަރާތުން އެ އޮފީހާއެކު ނަސޭހަތުގެ އެއްބަސްވުމެއް ވުމަށް އެދި ހުށަހަޅާފައިވެލާ ކަަމަށެވެ.

ނަމަވެސް މި ކުށަކީ ދިވެހިރާއްޖޭގެ ކާބޯތަކެތީގެ ސަލާމަތާއި ރައްކާތެރިކަމާ ސީދާ ގުޅުންހުރި ކުށަކަށްވެފައި، ކާބޯތަކެތީގެ ސަލާމަތާއި ރައްކާތެރިކަން ކަށަވަރުކުރުމަށް ހެދިފައިވާ ޤާނޫނުތަކާ އުޞޫލުތަކާ ޚިލާފަށް ޢަމަލުކޮށްފައިވާތީ، ޢާންމު މަސްލަޙަތު ވަޒަން ކުރުމަށްފަހު ނަސޭހަތުގެ އެއްބަސްވުމެއް ނުހެދުމަށް ނިންމާފައިވާ ކަމަށް ބުނެފައިވާ ކަމަށެވެ.