އަންނަ ދިރާސީ އަހަރަށް ދަރިވަރުންނަށް ބޭނުންވާ ޓެކްސްޓް ފޮތްތައް ރަށްރަށުގެ ސްކޫލުތަކަށް ފޮނުވުމުގެ މަސައްކަތް ތަޢުލީމީ ވުޒާރާއިން ފަށައިފިއެވެ.

ދައުލަތުގެ މީޑިއާ އާ ވާހަކަދައްކަމުން ތަޢުލީމީ ވުޒާރާއިން ބުނެފައިވަނީ، ދިރާސީ އައު އަހަރަށް ތައްޔާރުވުމުގެ ގޮތުން އަތޮޅޫތެރޭގެ ރަށްތަކަށް ފޮތްތައް ފޮނުވުމުގެ މަސައްކަތް ފަށާފައިވާކަމަށެވެ. އެގޮތުން ސްކޫލްތަކާއި އެ ވުޒާރާއާ ގުޅިގެން، ދިރާސީ އައު އަހަރު ފެށުމުގެ ކުރިން ހުރިހާ ދަރިވަރުންނަށް ބޭނުންވާ ޓެކްސްޓް ފޮތްތައް ފުރިހަމައަށް ލިބިފައިވާކަން ކަށަވަރު ކުރުމަށްޓަކައި، ދުރާލާ ގިނަ މަސައްކަތްތަކެއް ކުރަމުންދާކަން މިނިސްޓްރީން ވަނީ ފާހަގަކޮށްފައެވެ. އަދި އެ ވުޒާރާގެ އަމާޒަކީ ސްކޫލުތަކުގެ ކިޔެވުން ފެށުމުގެ ކުރިން ހުރިހާ ދަރިވަރުންނަށް ޓެކްސްޓް ފޮތްތައް ލިބުނުކަން ކަށަވަރުކުރުން ކަމަށްވެސް ވުޒާރާއިން ބުންޏެވެ.

ދަރިވަރުންނަށް ބޭނުންވާ ޓެކްސްޓް ފޮތްތައް ފޮނުވުމުގެ އިތުރުން ދިރާސީ އައު އަހަރަށް ސްކޫލްތަކަށް ބޭނުންވާ މުދައްރިސުން ހަމަކުރުމުގެ މަސައްކަތްވެސް މިނިސްޓްރީން ވަނީ ފަށާފައެވެ. މީގެ އިތުރުން ސުކޫލުތައް އާބާތުރަ ފިލުވުމުގެ މަސައްކަތައް ކުރުމަށް ނިންމާފައިވާއިރު އެ މަސައްކަތްތަކަށްވެސް 40 މިލިޔަން ރުފިޔާ ޚަރަދުކުރުމަށް ވަނީ ހަމަޖެހިފައެވެ. ސަރުކާރުން ވަނީ ކުރިއަށްއޮތް ދިރާސީ ކިޔެވުން ފެށުމުގެ ކުރިން ރާއްޖޭގެ ހުރިހާ ސްކޫލްތަކުގެ ކްލާސްރޫމްތައް އޭސީކޮށް ނިންމުމަށް އަމާޒު ހިފާފައެވެ.

ކުރިއަށްއޮތް ދިރާސީ އައު އަހަރުގެ ކިޔެވުން ފެށުމަށް ހަމަޖެހިފައިވަނީ އަންނަ ޖެނުއަރީމަހުގެ 27 ވަނަ ދުވަހެވެ. މިހިނގާ ދިރާސީ އަހަރުގެ ބޮޑުޗުއްޓީ ފެށޭނީ ޑިސެމްބަރުމަހުގެ 25 ވަނަ ދުވަހުއެވެ.