ސްރީލަންކާއަށް އެރި ތޫފާން ދިތްވާއާ ގުޅިގެން ހިނގި ހާދިސާތަކުގައި މަރުވި މީހުންގެ އަދަދު 627 އަށް އަރައިފިއެވެ. 

އެގައުމުގެ ޑިޒާސްޓަރ މެނޭޖްމަންޓް ސެންޓަރ (ޑީއެމްސީ) އިން ރިޕޯޓްކޮށްފައިވާ ގޮތުގައި، ނޮވެންބަރު 27 ވަނަ ދުވަހުން ފެށިގެން މިހާތަނަށް މި ތޫފާނުގެ ސަބަބުން 627 މީހުން މަރުވެ، 190 މީހުން ގެއްލިފައިވެއެވެ.

ލަންކާއަށް ކުރިމަތިވި ތޫފާން ދިތްވާގެ ސަބަބުން އެ ގައުމުގެ 2 މިލިއަނަށްވުރެ ގިނަ ރައްޔިތުންނަށް ވަނީ އެކަމުގެ ސަބަބުން ގެއްލުންތައް ލިބިފައެވެ. އެއީ އެގައުމުގެ އާބާދީގެ 10 އިންސައްތަ މީހުންނެވެ.

ހާލުގައި ޖެހުނު ރައްޔިތުންނަށް އެހީތެރިކަން ފޯރުކޮށްދިނުމަށް 38,500 ސިފައިން ހަރަކާތްތެރި ވަމުންދާއިރު، މިހާތަނަށް 31,116 މީހުން ސަލާމަތް ކުރެވިފައިވާކަމަށް އެގައުމުގެ ސަލާމަތީ ބާރުތަކުން މައުލޫމާތު ދީފައިވެއެވެ. 

ރިޕޯޓުތައް ބުނާގޮތުން ލަންކާއަށް ކުރިމަތިވި ގުދުރަތި ކާރިސާތަކުގައި ޖުމުލަ 75,000 އަށްވުރެ ގިނަ ގެދޮރަށް ގެއްލުން ލިބިފައިވެއެވެ. މިކަމާއި ގުޅިގެން އެގައުމުގެ ސަރުކާރުން ބުނީ މި ގެއްލުންތަކުން އަރައިގަތުމަށް 7 ބިލިއަން ޑޮލަރަށް ވުރެ ގިނަ ފައިސާ ހޭދަވާނެކަމަށެވެ. 

އެގައުމަށް މި ނުރައްކާތެރި ކާރިސާ ކުރިމަތިވެފައިވަނީ އީސްޓާ ބޮމުގެ ހަމަލާ އާއި އެނޫންވެސް ކުރިމަތިވި ކަންތައްތަކާއި ގުޅިގެން ޤައުމުގެ އިގްތިސާދު ބޮޑު އަނދަވަޅަކަށް ވެއްޓިފައި ވަނިކޮށެވެ. ލަންކާ ސަރުކާރުން ބައިނަލްއަޤްވާމީ އެހީތެރިކަމަށް އެދިފައިވާއިރު، ދުނިޔޭގެ އެކި ގައުމުތަކުން ދަނީ ލަންކާއަށް އެކި ގޮތަގޮތުން އެހީތެރިކަން ފޯރުކޮށްދެމުންނެވެ.