”ރައްޓެއްސަކު“ ބުނެގެން ހަވާލުވި ފޮށިގަނޑަކުން މަސްތުވާތަކެތި ފެނުނު މައްސަލައެއްގައި، ފޮށިގަނޑާ ހަވާލުވި މީހާ 75،000 ރުފިޔާއިން ޖޫރިމަނާކޮށް 18 އަހަރަށް ޖަލަށްލުމަށް ހުކުމް ކޮށްފިއެވެ. 

މި މައްސަލާގައި ދައުވާކޮށްފައިވަނީ ހދ. ކުމުންދޫ ނަރުގިސްވިލާ އަހްމަދު އައްފާން އަދި، ވ. ސިނަމާލެ، ޝާހިލް މުހައްމަދުގެ މައްޗަށެވެ. 

އެމީހުންގެ މައްޗަށް ކޮށްފައިވަނީ، ޖަދުވަލު އެކެއްގައިވާ މަސްތުވާ އެއްޗެއް ދިވެހިރާއްޖެއަށް އެތެރެކުރުމުގައި ބައިވެރިވުމުގެ ކުށުގެ ދައުވާއެވެ.

އެތަނުން އައްފާނުގެ މައްސަލަ ނިމި، މިދިޔަ ހަފްތާގައި ކްރިމިނަލް ކޯޓުން އޭނާގެ މައްޗަށް ހުކުމް އިއްވާފައިވާއިރު، އޭގައިވާގޮތުން މި ހާދިސާ ހިނގީ މިދިޔަ އަހަރުގެ ޖުލައި މަހުއެވެ.

އެގޮތުން ޖުލައި 25 ވަނަ، އިއްތިހާދު އެއާވޭސްއިން ރާއްޖެއަށް ޒިޔާރަތްކުރި ޕާކިސްތާނު މީހަކު ކަމަށްވާ މޮލްވި މުހައްމަދު ހާރޫން ގެނައި ފޮއްޓަކާ ހަވާލުވާން އައްފާން ދިޔައީ ކީއްވެތޯ ސުވާލުކުރުމުން އޭނާ ބުނީ އެކަން ކުރީ ރަށްޓެއްސެއް ބުނެގެން ކަމަށެވެ. 

އެގޮތުން އެ ރަށްޓެހިމީހާ އޭނާއަށް ގުޅައި ހެންވޭރު އޯސީސީ ކައިރީގައި ހުރި މީހަކު ތަނަކަށް ލައިދޭން އެދުމުން، އެތަނަށް، ދިޔައިރު، އެ ތަނުގައި މީހަކު ހުރިކަމަށާއި، އެއީ އޭނާ ކުޅެންދާއިރު ފެންނަ މީހެއްކަމަށާއި އޭނާގެ ނަމަކީ، 'އައްމަޑޭ' ކަމަށް ބުނެފައިވާ ކަމަށް ހުކުމުގައި ވެއެވެ.

އެތަނުގައި، މަޑުކުރުމަށާއި، އޭނާއާ، ހަވާލުކުރަން މީހަކު އެއްޗެއް ގެންނަ ކަމަށާއި އެ، ހިފައިގެން ދާން މަޑުކުރުމަށް 'އައްމަޑޭ' ބުނުމުން އެތަނުގައި، މަޑުކޮށްގެން، ހުއްޓާ 'އައްމަޑޭ' ފާޚާނާއަކަށް ދާންޖެހިގެން އޭނާގެ ގެ އެ ހިސާބުގައި ހުރުމުން ފާޚާނާކުރުމަށް ގެއަށް ދިޔަކަމަށާއި، ދަމުން، އަޙްމަދު، ޢައްފާނުއަށް. 50/- (ފަންސާސް) ރުފިޔާ ދިން ކަމަށްވެސް ވެއެވެ.

އަދި ފޮށިގަނޑު ހިފައިގެން އައުމުން އެ، ފައިސާ ދިނުމަށް 'އައްމަޑޭ' ބުނިކަމަށާ، އިރުކޮޅަކުން މީހަކު ފޮށްޓެއް ހިފައިގެން އައުމުން، އެ، ފައިސާ އެ މީހާއަށް، ދިނުމަށްފަހު ޢައްފާނު ފޮށްޓާ ހަވާލުވިކަމަށް ތަހުގީގުގައި ބުނެފައިވާ ކަމަށް ހުކުމުގައިވެއެވެ. 

ޢައްފާނު ފޮށްޓާ ހަވާލުވާން ދިޔުމުން ފުލުހުން އޭނާ ހިފަހަށްޓައި ސުވާލުކުރުމުން ޢައްފާނު ފުލުހުންގެ ގާތުގައި ބުނެފައިވަނީ 'މާޒިން" ނަމަކަށް ކިޔާ މީހަކު އޭނާއަށް، މެސެޖުކޮށް، އެތަނަށް، އައިސް، އައްމަޑޭއާ ބައްދަލުކުރުމަށް ބުނިކަމަށާ، އަދި، އައްމަޑޭ ގޮވައިގެން، އޭނާ ބުނާ ތަނަކަށް ދިޔުމަށް، ބުނިކަމަށް ބުނެފައިވާ ކަމަށެވެ. 

އެގޮތުން އައްފާން އައްމަޑޭއާ ބައްދަލުކުރަން ދިޔައީ ”MR“ ނުވަތަ 'މާޒިން' ބުނެގެން ކަމަށާ އެއީ އޭނާގެ ރައްޓެއްސެއްކަމަށް ތަހުގީގު ބަޔާނުގައި ބުނެފައިވާ ކަމަށް ހުކުމުގައި ވެއެވެ. ނަމަވެސް 'މާޒިން' އެ ފޮށި ބަލައިދިއުމަށް އެދި ޢައްފާނުއަށް މެސެޖުކުރިކަމަށް އޭނާ ބުނި ނަމަވެސް އެ މެސެޖު ފޯނުން ފެނިފައި ނުވާ ކަމަށް ފުލުހުންގެ ތަހުގީގުން އެނގޭކަމަށްވެސް ބުނެފައިވެއެވެ.  

އަދި މާޒިން އަކީ ރައްޓެއްސެއްކަމަށް ތަހުގީގުގައި ބުނެފައިވާއިރު، ތަހުގީގުގައި ވެސް، އަދި ޝަރީއަތުގައި ވެސް، އެއީ ކާކުކަން އެނގޭނެ އެއްވެސް، އިތުރު މައުލޫމާތެއް ދީފައި ނުވާކަން ހުކުމުގައި ފާހަގަކޮށްފައިވެއެވެ.

މީގެ އިތުރުން، އައްފާނުގެ ފޯނުގެ ތަހްލީލުކޮށް އެނގުނު މައުލޫމާތު ތަކުން ޢައްފާނު ހަވާލުވި ފޮށީގައި މަސްތުވާތަކެތި ހުރިކަން އޭނާއަށް އެނގޭކަން، ބަޔާންކޮށްދޭ ހެކިތަކެއް ފެންނަން ނެތް ނަމަވެސް އައްފާނުއަކީ މަސްތުވާތަކެތީގެ ވިޔަފާރިކުރާ މީހެއްކަން ކޮށްފައިހުރި މެސެޖުތަކުން އެނގޭކަން ހުކުމުގައި ފާހަގަކޮށް، އެކަމުގެ ތަފްސީލްވެސް ބަޔާންކޮށްފައިވެއެވެ.

މައްސަލައިގައި އައްފާންގެ ދިފާއުގައި އެއްވެސް ހެއްކެއް ހުށަހަޅާފައިނުވާކަން ޝަރީއަތުން ފާހަގަކޮށްފައިވާއިރު މައްސަލަ ބެއްލެވި ކްރިމިނަލް ކޯޓުގެ ގާޒީ އިސްމާއިލް ޝަފީއު ވަނީ އައްފާން 18 އަހަރަށް ޖަލަށްލުމާ އެކު 75،000 ރުފިޔާއިން ޖޫރިމަނާ ކުރުމަށް ހުކުމް ކޮށްފައެވެ.