ރާއްޖޭގައި ގަވާއިދާ ޚިލާފަށް ހިންގާ ބިދޭސީ ވިޔަފާރިތައް ބަލައިފާސްކުރުމަށް އިމިގްރޭޝަނާއި ފުލުހުން ގުޅިގެން ކުރިއަށް ގެންދާ އިންސްޕެކްޝަންތަކުގެ ތެރެއިން ގަވާއިދާ ޚިލާފަށް ހިންގާ 35 ބިދޭސީ ވިޔަފާރިއެއް އިންސްޕެކްޓްކޮށް، އޭގެ ތެރެއިން 11 ވިޔަފާރިއެއް ވަނީ ބަންދުކޮށްފައެވެ.

އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން މިކަން ހާމަކޮށް ނެރުނު ބަޔާނެއްގައިވާ ގޮތުން، މި އިންސްޕެކްޝަންތަކުގެ މައިގަނޑު މަޤްޞަދަކީ ދިވެހިން ނިވާފަތްގަނޑަކަށް ހަދައިގެން ބިދޭސީން ހިންގާ ވިޔަފާރިތަކާއި، ބިދޭސީންނަށް ހުއްދަ ނުދޭ ދާއިރާތަކުގައި ހަރަކާތްތެރިވާ ވިޔަފާރިތައް ހުއްޓުވުމާއި އެފަދަ، ޤާނޫނާ ޚިލާފު ހަރަކާތްތައް ހުއްޓުވައި، އެފަރާތްތަކަށް ފިޔަވަޅު އެޅުމެވެ.

އެގޮތުން، ގަވާއިދާ ޚިލާފު ވިޔަފާރިތަކާ ގުޅޭގޮތުން ރިޕޯޓުކުރުމަށް ހުޅުވާލުމަށްފަހު މިހާތަނަށް 125 ރިޕޯޓު ލިބިފައިވާ ކަމަށާ، އެ ލިބުނު ރިޕޯޓުތަކާ ގުޅިގެން 35 ތަނެއް ބަލައިފާސްކުރެވިފައިވާ ކަމަށް ބުންޏެވެ.

އަދި، އޭގެ ތެރެއިން 11 ވިޔަފާރިއެއް ބަންދުކުރެވުނު ކަމަށާ، އެތަންތަން ބަންދުކުރެވުނީ، ވިޔަފާރިކުރުމުގެ ހުއްދަ ނެތުމާއި ދުންފަތުގެ ބާވަތް ވިއްކުމުގެ ހުއްދަ ނެތި ވިޔަފާރި ކުރަމުންދާތީ ކަމަށް ބުންޏެވެ.

ގަވާއިދާ ޚިލާފު ވިޔަފާރިތަކާ ގުޅޭ މަޢުލޫމާތު ރަސްމީ ބަންދު ނޫން ކޮންމެ ދުވަހެއްގެ ހެނދުނު 8:00 އިން ރޭގަނޑު 8:00 އާ ދެމެދު 3333199 އަށް ގުޅައިގެން ނުވަތަ trade.gov.mv މެދުވެރިކޮށް ރިޕޯޓުކުރެވޭނެ އިންތިޒާމު ވަނީ ހަމަޖައްސާފައެވެ.