'ވޯލްޑްސް ލީޑިންގ ޑެސްޓިނޭޝަން'ގެ ލަގަބު އަނެއްކާވެސް ދިވެހިރާއްޖެއަށް ލިބިއްޖެއެވެ. 

މި ލަގަބު ލިބިފައިވަނީ ރޭ ބަޙުރައިންގެ އެގްޒިބިޝަން ވޯލްޑްގައި ބޭއްވުނު ވޯލްޑް ޓްރެވަލް އެވޯޑްސްގެ ގްރޭންޑް ފައިނަލްގައެވެ. މިއީ ދިވެހިރާއްޖެއަށް މި މަގާމު ލިބުނުތާ ވިދިވިދިގެން 6 ވަނަ ފަހަރެވެ. 

މި ހަފްލާގައި ވޯލްޑްސް ލީޑިންގ ގްރީން ޑެސްޓިނޭޝަންގެ މަގާމުވެސް ރާއްޖެއަށް ވަނި ލިބިފައެވެ. މިއީ މި މަގާމު ވިދިވިދިގެން ހޯދުނު  2 ވަނަ އަހަރެވެ. 

1993 ވަނަ އަހަރު އުފައްދާފައިވާ ވޯލްޑް ޓްރެވަލް އެވޯޑްސްއަކީ ދުނިޔޭގެ ފަތުރުވެރިކަމާއި ދަތުރުފަތުރުގެ ސިނާއަތުގައި ދެވޭ އެންމެ މަތިވެރި އިނާމުގެ ގޮތުގައި މުޅި ދުނިޔޭގައި ބަލައިގަންނަ އެވޯޑެކެވެ. މި އެވޯޑްތަކުން ފަތުރުވެރިކަމާއި ދަތުރުފަތުރުގެ ހުރިހާ ދާއިރާއެއްގައި ފާހަގަކޮށްލެވޭ ކާމިޔާބީތަކުގެ އަގު ވަޒަން ކުރެވެއެވެ. މި އެވޯޑްތަކުގެ ނަތީޖާ ނިންމަނީ ސިނާއަތުގެ ފަންނާނުންނާއި އާންމުންގެ ބައިނަލްއަޤުވާމީ ވޯޓުންނެވެ.

ވިދިވިދިގެން 6 އަހަރު ވޯލްޑްސް ލީޑިންގ ޑެސްޓިނޭޝަންގެ މަގާމު ހޯދުމަކީ ދިވެހިރާއްޖެއަށް ލިބުނު ތާރީޚީ ކާމިޔާބީއެކެވެ. މިއީ ދިވެހިރާއްޖެއަކީ ފެންވަރު ރަނގަޅު ހިދުމަތެއްދޭ މަންޒިލެއްކަން ސާބިތުކޮށްދޭކަމެކެވެ. އަދި ވޯލްޑްސް ލީޑިންގ ގްރީން ޑެސްޓިނޭޝަންގެ މަގާމު ވިދިވިދިގެން 2 ވަނަ ފަހަރަށް ހޯދުމަކީ، ތިމާވެށި ރައްކާތެރިކުރުމަށާއި، ދެމެހެއްޓެނިވި ފަތުރުވެރިކަން ތަރައްޤީކުރުމަށާއި، ރާއްޖޭގެ ކަނޑުގެ ވަސީލަތަތައް ހިމާޔަތްކުރުމަށް ދިވެހިރާއްޖެއިން ދެމިހުރެ ކުރަމުންދާ މަސައްކަތްތަކުގެ ހެއްކެކެވެ.

ބައިނަލްއަގުވާމީ ފެންވަރުގެ މި ދެ ޝަރަފުގެ އިތުރުން ރާއްޖެއަށް ވަނީ ސަރަހައްދީގޮތުންވެސް 3 ކާމިޔާބީއެއް ލިބިފައެވެ. އެއީ އިންޑިއަން އޯޝަންސް ބެސްޓް އެމްއައިސީ ޑެސްޓިނޭޝަން 2025، އިންޑިއަން އޯޝަންސް ބެސްޓް އިންސެންޓިވް ޑެސްޓިނޭޝަން 2025 އަދި އިންޑިއަން އޯޝަންސް ބެސްޓް ޓޫރިޒަމް އޮތޯރިޓީ ވެބްސައިޓް 2025 އެވެ. 

މި ޝަރަފުތައް ލިބިފައިވަނީ ރާއްޖެއިން އެއް އަހަރު ދުވަހު ހޯދި ކާމިޔާބީ ތަކުގެ މައްޗަށެވެ. މިއަހަރު ފަތުރުވެރިކަމުގެ ސިނާއަތުގައި ރާއްޖެއިން ވަނީ އެތައް ކުރިއެރުމެއް ހާސިލުކޮށްފައެވެ. އެގޮތުން އެންމެ ފާހަގަކޮށްލެވޭ ކުރިއެރުމަކީ އަހަރެއް ނިމުމުގެ ކުރިން 2 މިލިއަން ފަތުރުވެރިން ޒިޔާރަތްކުރުމެވެ.

އެގޮތުން މި ކާމިޔާބީއާއެކު، ދިވެހިރާއްޖެއަކީ ދުނިޔޭގެ ފަތުރުވެރިކަމުގެ ސިނާއަތުގައި އިސް ދައުރެއް އަދާކުރާ ޤައުމެއްކަން އަނެއްކާވެސް ސާބިތުވެގެންދެއެވެ.