އޭޝިއާ ސަރަހައްދަށް ކުރަމުންދާ ވިއްސާރައިގައި މޫސުން ގޯސްވެ، ކުރިމަތިވި ތޫފާންތަކުގެ ސަބަބުން ސްރީ ލަންކާއާއި، އިންޑޮނޭޝިއާ އަދި ތައިލެންޑުން މަރުވި މީހުންގެ އަދަދު 2000 އާއި ގާތްކޮށްފިއެވެ.
މި 3 ގައުމަށް ދިމާވެފައިވާ ގަދަ ވިއްސާރައާއި ފެންބޮޑުވުމާއި، ބިންގަނޑު ކަނޑައިގެން ދިޔުން ފަދަ ގުދުރަތީ ކާރިސާތަކުގެ ސަބަބުން ޖުމުލަ މަރުވި މީހުންގެ އަދަދު 1750 ކަމަށް ވަނީ ރިޕޯޓުކޮށްފައެވެ. އަދި އެތައް ބަޔަކު ވަނީ ހާލުގައި ޖެހިފައެވެ.
އެގޮތުން އިންޑޮނޭޝިއާގެ ސުމަޓްރާ ޖަޒީރާއަށް ކުރިމަތިވި ކާރިސާގައި 908 މީހުން މަރުވެފައިވާކަމަށް އަދި 410 މީހުން ގެއްލިފައިވާ ކަމަށް ހޮނިހިރު ދުވަހު ނެރުނު އެންމެ ފަހުގެ ތަފާސް ހިސާބުތަކުން ދައްކާފައިވެއެވެ.
ލަންކާގެ ތޫފާނުގައި 607 މީހުން މަރުވެފައިވާއިރު، އިތުރު 214 މީހަކު ގެއްލިގެން ރިޕޯޓުކޮށްފައިވެއެވެ.
މީގެ އިތުރުން ތައިލެންޑުގައި ވެސް މަދުވެގެން 276 މީހުން މަރުވެފައިވާއިރު، މެލޭޝިއާގައި ދެ މީހަކު އަދި ވިއެޓްނާމްގައި ވެސް ދެ މީހަކު މަރުވެފައިވާކަމަށް ރިޕޯޓުކޮށްފައިވެއެވެ.
މި ގުދުރަތީ ކާރިސާތަކުގެ ސަބަބުން މި ގައުމުތަކުގައި އެތައް ބަޔަކު ހާލުގައި ޖެހި، އިގްތިސާދީ ގޮތުންނާއި އެކި ގޮތަގޮތުން ބޮޑެތި ގެއްލުންތަކެއް ކުރިމަތިވެފައިވެއެވެ.
Advertisement
This content is created and paid for by advertisers and does not involve Voice Journalists
