އަންނަ މާރޗްމަސް ނިމުމުގެ ކުރިން ގިރާވަރުފަޅު ހިއްކައި ނިމޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ހެންވޭރުގެ ރައްޔިތުންނާ ބައްދަލުކުރުމަށް މިރޭ ކަލާފާން ސްކޫލްގައި ބޭއްވި ބައްދަލުވުމުގައި ވާހަކަދައްކަވަމުން ރައީސް ވިދާޅުވީ، ކުރީ ސަރުކާރުން ގިރާވަޅުފަޅުން ގޯތިދޫކުރުމަށް ނިންމައި އެކަން ކުރިއިރު އެތަން އޮތީ ހިއްކައި ނުނިންމާކަމަށެވެ. ގިރާވަޅުފަޅުން ކުޑަ ތަންކޮޅެއް ހިއްކާފައި އޮތްކަން ފާހަގަކުރައްވަމުން ރައީސް ވިދާޅުވީ، ހުޅުމާލޭ ފޭސް ތިނެއްގެ ބިން ހިއްކުން ނިމުނުހާ އަވަހަކަށް ގިރާވަރުފަޅު ހިއްކުމުގެ މަސައްކަތް ފަށާނޭކަމަށެވެ.
ރައީސް ވިދާޅުވީ ހުޅުމާލޭ ފޭސް ތިނެއް ހިއްކުމުގެ މަސައްކަތް އެންމެ ފަހުން ގެނައި ދެ ޑްރެޖަރުގެ އެހީގައި މިމަހުގެ ތެރޭގައި ނިމިގެންދާނޭކަމަށެވެ. އޭގެ ފަހުން އެ ދެ ޑްރެޖަރު ބޭނުންކޮށްގެން ގިރާވަޅުފަޅު ހިއްކަން ފަށައި ގިނަވެގެން ތިން މަސްދުވަހުގެ ތެރޭގައި އެތަން ހިއްކައި ނިމޭނޭކަމަށް ރައީސް ވިދާޅުވިއެވެ.
ރައީސް ޑރ.މުއިއްޒު ވިދާޅުވީ ގިރާވަރުފަޅު ހިއްކުމުގެ މަސައްކަތް ނިމުނުހާ އަވަހަށް އެތަންތަނުން ގެވަޅު ލިބުނު މީހުންނަށް ބިންތައް ހަވާލުކުރާނޭަކަމަށެވެ. މީގެ އިތުރުން ރައީސް މިރޭ ވިދާޅުވީ ފޭސް ތިނެއް ހިއްކުމުގެ މަސައްކަތް ނިމުމާއެކު އެތަނުން ގޯތި ލިބުނު މީހުންނަށް ބިން ހަވާލުކުރުމުގެ މަސައްކަތް ފަށާނޭކަމަށެވެ.
ރައީސް ސޯލިހުގެ ސަރުކާރުގައި ހުޅުމާލެ ފޭސް ތިނެއް ނުހިއްކައި އެތަންތަނުން ގޯތި ދޫކޮށްފައިވާއިރު، މިއީ ބިމެއް ނުހިއްކައި ސަރުކާރަކުން ރައްޔިތުންނަށް ގޯތި ދިން ފުރަތަމަ ފަހަރުކަން ފާހަގަކޮށްލެވެއެވެ.
ބޭރުން ގެނައި ދެ ޑްރެޖަރާއެކު ހުޅުމާލެ ފޭސް ތިނެއް ހިއްކުމުގެ މަސައްކަތުގެ ސްޕީޑް އަވަސްކޮށްފައިވާއިރު، އެތަނުން ހިއްކަންޖެހޭ ބިމުގެ ދެބައިކުޅަ އެއްބައި މިހާރު ވަނީ ހިއްކައި ނިންމާފައެވެ. ހުޅުމާލެ ފޭސް ތިނަކުްނ 63 ހެކްޓަރު ހިއްކަން ނިންމާފައިވާއިރު، އިއްޔެގެ ނިޔަލަށް 30 ހެކްތަރުގެ ބިން ވަނީ ހިއްކައި ނިންމާފައެވެ.
Advertisement
This content is created and paid for by advertisers and does not involve Voice Journalists
