ޕެންޝަން ފަންޑުން އިތުރު ކަންކަމަށް ފައިސާ ބޭނުންކުރެވޭ ގޮތް ހައްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިރޭ ވިދާޅުވެއްޖެ އެވެ.
އެެމަނިކުފާނު މިހެން ވިދާޅުވީ މާލޭ ސިޓީގެ، ހެންވޭރު ރައްޔިތުންނާއެކު ބޭއްވެވި މަޝްވަރާ ބައްދަލު ކުރެއްވުމުގައި ވާހަކަފުޅު ދައްކަވަމުންނެވެ.
ޕެންޝަންގެ ގާނޫނު މިހާރު އޮތްގޮތުން ޕެންޝަން ފައިސާ ބޭނުން ކުރެވޭން އޮތް ގޮތްތަކާމެދު އާންމުންގެ ބޮޑު ކަންބޮޑުވުމެއް އެބަ އޮތެވެ. އެ ޝަކުވާ ކުރީގެ ވެރީންނަށްވެސް ރައްޔިތުން ހުށައަޅާފައިވެ އެވެ.
މިރޭ ކަލާފާނުގައި އޮތް ހެންވޭރު ރައްޔިތުންގެ ބައްްދަލްވުމުގައިވެސް ވަނީ ޕެންޝަން ފަންޑު ބޭނުންކުރެވޭ މިންވަރު އިތުރުކުރެއްވުމާ ބެހޭގޮތުން ބައެއް އާންމުން ވާހަކަ ދައްކާފަ އެވެ. އަދި އެކަމުގައި ސަރުކާރުގެ ވިސްނުން ސާފުކޮށް ދިނުމާއި ގުޅޭގޮތުން ސުވާލުކުރި އެވެ.
އެ ސުވާލަކަށް ޖަވާބުދެއްވަމުން، ރައީސުލްޖުމްހޫރިއްޔާ ވިދާޅުވީ ބައެއް ހާއްސަ ހާލަތްތަކުގައި އެ ފަންޑުން އިތުރު ކަންކަމަށް ފައިސާ ބޭނުންކުރެވޭ ގޮތަށް ހަދަން ޖެހޭ ކަމަށެވެ. އަދި އެމަނިކުފާނު ވަނީ އެ ބަދަލު ގެންނެވުމަށް ދިވެހިރާއްޖޭގެ ޕެންޝަނާ ބެހޭ ގާނޫނަށް އިސްލާހު ގެންނެވުމަށް، ރައްޔިތުންގެ މަޖިލީހުގެ ކުރިއަށް އޮތް ދައުރަށް ހުށަހެޅުއްވުމަށް ނިންމަވާފައިވާ ކަމަށް ވިދާޅުވެފަ އެވެ.
"މިހާރު މަޖިލީސް އެވަނީ ޗުއްޓީއަށް ގޮސްފައި. ދެން ހުޅުވޭ ދައުރަށް އެބަ ހުށައަޅަން އިސްލާހުތަކެއް ޕެންޝަނާއި ބެހޭ ގާނޫނަށް. އޭގެ ތެރޭން ވަރަށް ގިނަ ކަންތައްތަކެއް ފުރުސަތު އެބަ ލިބޭ. [އެގޮތުން] ހާއްސަ ހާލަތުގައި ޕެންޝަން ފަންޑުން ފައިސާ ބޭނުންކުރެވޭނެ ގޮތަށް. އެ ހާއްސަ ހާލަތު ދެން ބަޔާން ކުރެވޭނެ. އެހެންވީމަ މިހާރަށް ވުރެ ގިނަ ފުރުސަތުތައް އެ މީހާގެ ޕެންޝަން ފައިސާ ބޭނުން ކުރެވޭ ގޮތަށް ގާނޫނަށް އިސްލާހު ގެންނަން އެބަ ހުށައަޅަން," ރައީސް ވިދާޅުވި އެވެ.
ނަމަވެސް އިތުރު ތަފްސީލެއް ނުދެއްވަ އެވެ.
Advertisement
This content is created and paid for by advertisers and does not involve Voice Journalists
