އާއްމު ތަނެއްގައި ކަނޑިއަކާއި ވަޅިއެއް ގެންގުޅުނު މީހަކު 6 މަސްދުވަހަށް ޖަލަށްލާން ހުކުމް ކޮށްފިއެވެ. 

މި މައްސަލާގައި ހުކުމް ކޮށްފައިވަނީ، ގދ.ހޯޑެއްދޫ ކެލާގެ މުޙައްމަދު ޢަރީފުގެ މައްޗަށެވެ.

އޭނާގެ މައްޗަށް ކޮށްފައިވަނީ މަގުބޫލު ސަބަބެއްނެތި އާއްމު ތަނެއްގައި ތޫނު އެއްޗެހި ގެންގުޅުމުގެ ދައުވާއެވެ.

ކްރިމިނަލް ކޯޓުން އިއްޔެ ޢަރީފުގެ މައްޗަށް ހުކުމް ކޮށްފައިވާއިރު ހުކުމުގައި ބުނެފައިވަނީ. މި އަހަރުގެ ޖުލައި 13 ވަނަ ދުވަހު 19:39 އެހައިކަށްހައިއިރު، ފުލުހުން މާލެތެރެ ޕެޓްރޯލްކުރަމުން ދަނިކޮށް، މާލެ ތެރޭގައި، ހަރަކާތްތެރިވާ ކުށްކުރާ ގްރޫޕަކަށް ނިސްބަތްވާ މީހުން ހަރަކާތްތެރިވާ ސަރަހައްދެއްގައި ޢަރީފުއާއި އިތުރު މީހަކު ހުއްޓާ ފެނުނުއިރު، ޢަރީފު ހުރީ ވަޅިއަކުން ޑަސްބިސް ޑަސްބިން ކޮތަޅެއް ނިއުޅުވަން މަސައްކަތް ކުރަމުން ކަމަށެވެ.

އަދި އެ ދެމީހުންގެ އަތުގައި، އަނިޔާވެރި، ޢަމަލެއް ހިންގުމަށް ގެންގުޅޭ ވަޅިއެއް ނުވަތަ އެ ބާވަތުގެ ނުރައްކާތެރި ތޫނު އެއްޗެއް އޮތްކަމަށް ތުހުމަތުކުރެވިގެން މި ދެ މީހުން ހުއްޓވައި ބަލައި ފާސްކުރިއިރު، މުޙައްމަދު ޢަރީފުގެ އަތުން، ތިލައިގައި ގާތްގަނޑަކަށް ދެ އިންޗި ހުރި ވަޅިއެއް ފެނިފައިވާ ކަމަށް ބުނެފައިވެއެވެ.

މީގެ އިތުރުން ބަލައި ފާސްކުރުމަށްޓަކައި އޭނާގެ ޖީބުގައި ހުރި ތަކެތި، ނެގުމަށް ފުލުހުން ބުނުމުން،  ޖީބުން، ތިލައިގައި، ދެ އިންޗި ހުރި ސާޖިކަލް ވަޅިއެއް ނަގައި ބިންމައްޗަށް، ވައްޓާލާފައިވާ ކަމަށާ، އޭނާގެ އަތުގައި އޮތް، ޑަސްބިން ކޮތަޅު ނިއުޅުވައި ބެލިއިރު، އޭގެ ތެރެއިން ތިލައިގައި ދެ ފޫޓު ހުރި ކަނޑިއެއް ފެނިފައިވާ ކަމަށްވެސް ބުނެފައިވެއެވެ. 

ހުކުމުގައި ވާގޮތުން، ދައުވާތަކާ ގުޅިގެން ބޭއްވުނު އިބްތިދާއީ އަޑުއެހުމުގައި، މުޙައްމަދު ޢަރީފު ވަނީ ދަޢުވާއަށް އިޢުތިރާފުވެފައެވެ. އަދި ދައުލަތާއެކު އިއުތިރާފުގެ އެއްބަސްވުމެއް ހަދާފައެވެ. 

އިއުތިރާފްގެ އެއްބަސްވުން ބަލައިގަތުމަށް ނިންމާފައިވާތީ، އެ ކުށަށް ކަނޑައެޅިފައި އޮންނަ އަދަބަކީ 6 މަސް ދުވަހުގެ ޖަލު ހުކުމެއް ކަމަށް ވާއިރު، މައްސަލައިގެ ތަޙްޤީޤު މަރުޙަލާގައި އަދި ޝަރީޢަތުގެ މަރުޙަލާގައި މުޙައްމަދު ޢަރީފު، 4 މަހާއި، 26 ދުވަސް ބަންދުގައި ހޭދަކޮށްފައިވާތީ، އެބައި އުނިކޮށް 1 މަހާއި 4 ދުވަހަށް ޖަލަށް ލުމަށް ގާޒީ އިބްރާހިމް ޒިހުނީ ވަނީ ހުކުމް ކުރައްވާފައެވެ.