ސްރީ ލަންކާއަށް ކުރިމަތިވި ގުދުރަތީ ކާރިސަތަކުގެ ސަބަބުން އެގައުމަށް ކުރިމަތިވި ގެއްލުންތަކުން އަރައިގަތުމަށް އެންމެން ގުޅިގެން މަސައްކަތް ކުރަން ޖެހޭކަމަށް އެގައުމުގެ ކުރީގެ ސިއްހަތާބެހޭ ވަޒީރު ރާޖިތާ ސެނަރަތުނަ ވިދާޅުވެއްޖެއެވެ.
އޭނާ ވިދާޅުވެފައިވަނީ އެގައުމަށް މިހާރު ކުރިމަތިވެފައިވާ ހާލަތު އެގައުމުގެ ސަރުކާރަށް އެކަނި ބެލެހެއްޓުމަކީ ނުކުރެވޭނެ ކަމެއް ކަމަށެވެ. އެހެންކަމުން ބައިނަލްއަގުވާމީ އެހީތެރިކަމަށް އޭނާ ވަނީ އެދިފައެވެ. އަދި މިފަދަ ހާލަތްތަކުގައި ތަޖުރިބާކާރު ލީޑަރުންނާއި އެންމެންގެ އެއްބާރުލުން މުހިންމު ކަމަށް ވެސް އޭނާ ވަނީ ފާހަގަކޮށްފައެވެ.
ތޫފާން ދިތްވާ އަކީ އެގައުމަށް 2019 ވަނަ އަހަރު ކުރިމަތިވި އީސްޓަރ ސަންޑޭގެ ނުރައްކާތެރި ބޮމުގެ ހާދިސާގެ ދެވަނަ ބާބެއް ކަމަށްވެސް ރާޖިތާ ވިދާޅުވިއެވެ. ނަމަވެސް މި ތޫފާނަކީ އެ ހާދިސާއަށްވުރެ ވެސް ނުރައްކާތެރި، ގެއްލުންބޮޑު ހާދިސާއެއްކަމަށާއި އެންމެންގެ އެއްބާރުލުން ބޭނުންވާކަމަށް ވެސް އޭނާ ވަނީ ވިދާޅުވެފައެވެ.
ލަންކާއަށް 2019 ވަނަ އަހަރުގެ 21 ވަނަ ދުވަހު ދިމާވި ނުރައްކާތެރި 'އީސްޓާ ސަންޑޭ' ގެ ބޮމުގެ ހާދިސާގައި 270 މީހުން މަރުވެފައިވެއެވެ. ނަމަވެސް ތޫފާން ދިތްވާގައި މަރުވި މީހުންގެ އަދަދު 460 އިން މައްޗަށް އަރާ، މި އަދަދު ވަނީ ދެ ގުނަ އަށް އިތުރުވެފައެެވެ. އަދި އެތައް ބަޔަކު ގެއްލި، 2 މިލިއަނެއްހާ މީހުން ހާލުގައި ޖެހިފައިވާކަމަށް ރިޕޯޓުކޮށްފައިވެއެވެ.
Advertisement
This content is created and paid for by advertisers and does not involve Voice Journalists
