މީގެ ދިހަވަރަކަށް އަހަރު ކުރިން ގޯބީ ސަހަރާއިން ފޭރިގަނެ، ފްރާންސްގެ ކަސްޓަމްސުން އަތުލި 70 މިލިއަން އަހަރުގެ ޑައިނަސޯ(ސާރު)ގެ ސްކެލެޓޮން (ކަށިގަނޑު)، ފްރާންސުން މޮންގޯލިއާއަށް އަނބުރާ ހަވާލުކުރުމުގެ މަސައްކަތް ފަށައިފިއެވެ.

މިއީ ބައިނަލްއަޤްވާމީ ފެންވަރުގައި ހިންގާ ފޮސިލްސް ވިޔަފާރި ހުއްޓުވުމަށް ކުރެވޭ މަސައްކަތުގެ މުހިންމު ފިޔަވަޅެއްކަމަށް ގިނަ ބަޔަކު ދެކެއެވެ.

މި ކަށިގަނޑަކީ ވަރަށް މަދުން ފެންނަ "ޓަރބޯސޯރަސް ބާޓަރ" ކިޔާ ޑައިނޯސޯރެއްގެ މި ކަށިގަނޑެވެ. އެއީ ޓައިރެނޯސޯރަސް ރެކްސް (ޓީރެކްސް)ގެ އޭޝިއާ ބައްރުގެ ދެބޭންކަމަށް ބުނެވެއެވެ. މި ކަށިގަނޑު 2015 ވަނަ އަހަރު ފްރާންސްގެ މެދުތެރޭގައި އޮންނަ ގަންނަޓް ކިޔާ ސަރަހައްދަކުން ފްރާންސްގެ ކަސްޓަމްސުން އަތުލާފައިވަނީ ދެކުނު ކޮރެއާއިން ޣައިރުޤާނޫނީ ގޮތެއްގައި އެތެރެކުރުމަށްފަހުގައެވެ.

ފްރާންސްގެ ޕަބްލިކް އެކައުންޓްސް މިނިސްޓަރ އެމެލީ ޑެ މޮންޗާލިން ވަނީ މި ކަށިގަނޑާއެކު ޑައިނަސޯ ބިސް ހިމެނޭ ގޮތަށް އިތުރު 30 ވަރަކަށް ފޮސިލްސް ރަސްމީކޮށް މޮންގޯލިއާއަށް ހަވާލުކުރުމަށް ހަމަޖެހިފައިވާ ކަމަށް އިއުލާންކޮށްފައެވެ.

"މިއީ ޓަރބޯސޯރަސްގެ ކަށިގަނޑު އެއްކޮށް. އޭތި އަތުލިއިރު އަގަކީ 700،000 ޔޫރޯ ނަމަވެސް، އެފަހުން މިފަދަ ތަކެތީގެ އަގުވަނީ ވަރަށް ބޮޑަށް އުފުލިފައި. އެގޮތުން، މިހާރު އޭގެ އަގު ދެގުނަ ތިންގުނަ މަތިވެފައި ހުރުން އެކަށީގެންވޭ،“ ފްރާންސްގެ ކަސްޓަމްސް އޮފިޝަލް ސޮފީ ހޮކެރެލް "ފްރާންސް 2" އަށް ދިނއ ބަސްދީގަތުމެއްގައި ބުނެފައިވެއެވެ. 

މީގެ 65 މިލިއަން އަހަރު ކުރިން ނެތިގެންދިޔުމުގެ ކުރިން، އޭޝިއާގައި ދިރިއުޅުނު ޓަރބޯސޯރަސް ބާޓަރގެ ކަށި އެއްވެސް އިރެއްގައި އޭޝިއާ ބައްރުން ބޭރުން ފެނިފައިނުވާތީ، މިއީ މޮންގޯލިއާއަށް ވަރަށް ޚާއްސަ ކަމެކެވެ. 

މޮންގޯލިއާ ސަރުކާރުން ވަނީ ގޯބީ ސަހަރާއިން ގެއްލިފައިވާ ފޮސިލްސް އަނބުރާ ހޯދުމަށް ގިނަ އަހަރުތަކެއް ވަންދެން މަސައްކަތްކޮށްފައެވެ. އެ ސަހަރާއަކީ ސައިންސްވެރިންނާއި ޣައިރުޤާނޫނީ ވިޔަފާރިކުރާ ފަރާތްތަކުގެވެސް ޓާގެޓެއްކަމަށް ވެފައިވަނީ، މީގެ ސަތޭކަ އަހަރު ކުރިން އެކްސްޕްލޯރަރ ރޯއީ ޗެޕްމަން އެންޑްރޫސް އެ ސަރަހައްދުން ޑައިނޯސޯރު ބިސް ހޯދިފަހުންނެވެ.

މޮންގޯލިއާގެ ޤާނޫނު ބުނާ ގޮތުން، ފޮސިލްސް އެކްސްޕޯޓްކުރެވޭނީ ހާއްސަ ހުއްދައެއްގެ ދަށުންނެވެ. ބޭރު ޤައުމުތަކުން މިފަދަ ތަކެތި އަތުލައިގަތުމުން އާންމުކޮށް އަނބުރާ މޮންގޯލިއާއަށް ރައްދުކުރެއެވެ.