ޚިޔާލުތަފާތުވެގެން، ވަކިމީހެއްގެ ފަހަތަށް އަރައިގެން ޕާޓީ ދޫކޮށް ދިޔުމަކީ ޕާޓީ ދޫކޮށް ދިޔުމަކީ އެންމެ ރަނގަޅު ގޮތް ނޫންކަމަށް އެމްޑީޕީގެ ވަގުތީ ޗެއާޕާސަން އަދި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ(ގަޕޯ) ވިދާޅުވެއްޖެއެމެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ގަޕޯ ވިދާޅުވީ، އެމްޑީޕީން އަބަދުވެސް ކަންކަން ކުރާނީ އިންސާފުގެ ތެރެއިން ކަމަށާ، އެހެންކަމުން ޕާޓީގެ އެއްވެސް މެންބަރަކު މާޔޫސްވާންޖެހޭ ކަމެއް ނޯންނާނެ ކަމަށެވެ. އަދި އެޕާޓީ، ”ގަދަކޮށް ބާރަށް“ ކުރިއަށް ގެންދަވާނެ ކަމަށްވެސް އޭނާ ވިދާޅުވިއެވެ.
ޕާޓީގައި ޚިޔާލުތަފާތުވުންތައް ކޮންމެސް ވަރަކަށް އެބައޮތް. އެއީ ޕާޓީ ބައިބައިވުމެއްނޫން. އެމްޑީޕީ އަކީ އަބަދުވެސް ފެށުނީއްސުރެ މި ޚިޔާލުތަފާތުވުމާއެއްކޮށް ދިރިދެމިއޮންނަ ޕާޓީއެއް. އެކަން އެގޮތުގައި ދެމިއޮންނާނެ.
އަބްދުލްޣަފޫރު މޫސާ(ގަޕޯ)
މިއާއެކު ގަޕޯ ވިދާޅުވީ، ޚިޔާލު ތަފާތުވި ނަމަވެސް، އެމްޑީޕީ އެންމެހައި މެންބަރުން އެޕާޓީގައި ތިބެންވާނެ ކަމަށާ، ”ވަކިމީހެއްގެ ފަހަތަށް އަރައިގެން ޕާޓީ ދޫކޮށްފައި ނޫނީ އެހެން ފިކުރެއްގައި ދިޔުމަކީ ޕާޓީގެ މަސްލަހަތަށްޓަކައި، އަދި މިކުރާ މަސައްކަތަށް އޮތް އެންމެ ރަނގަޅުގޮތެއް ނޫން.“ ކަމަށެވެ.
ގަޕޯ ވިދާޅުވީ، މެންބަރުންނަށް ފުރުސަތު ލިބެނީ ޕާޓީން ކުރާ މަސައްކަތުން ކަމަށާ، އެހެން ކަމުން، އެންމެހައި މެންބަރުންވެސް ތިބެންވާނީ ޕާޓީ ތެރޭގައި ކަމަށެވެ.
އަޅުގަނޑުމެން މިތިބީ ވަކިލީޑަރެއްގެ ފަހަތަކު ނޫން. މިތިބީ އެމްޑީޕީގައި. އެހެންވީމާ އެމްޑީޕީއަށް ރަނގަޅުވާނެ، އެމްޑީޕީއަށް ފަހިވާނެ، އެމްޑީޕީގެ މަސައްކަތާއިގެން ކުރިއަށް ދެވޭނެ ކޮންމެ ކަމެއްގައި ދެމިތިބޭނަން
އަބްދުލްޣަފޫރު މޫސާ(ގަޕޯ)
ގަޕޯ މިހެން ވާހަކަދައްކަވާފައިވާއިރު، 2023 ވަނަ އަހަރުގެ ރިޔާސީ އިންތިޚާބު ކައިރިވެފައި ވަނިކޮށް އެމްޑީޕީ ދޫކޮށް އައުޕާޓީއެއް އުފެއްދި، ކުރީގެ ރައީސް މުހައްމަދު ނަޝީދުގެ ސަޕޯޓަރުންނާއި އެމަނިކުފާނުވެސް މިހާރު ވަނީ އެމްޑީޕީއާ އަލުން ގުޅިފައެވެ.
ނަމަވެސް އެ މެންބަރުންނާއި އެމްޑީޕީގައި ތިބި މެންބަރުންގެ އިތުރުން ޕާޓީގެ ލީޑާޝިޕްގެ ތެރޭގައި އަދިވެސް ގިނަ ޚިޔާލުތަފާތުވުންތަކެއް ހުރިކަން ފާހަކަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
