ދިވެހިރާއްޖޭގެ އާންމު ޞިއްޙަތު ކުރިއެރުވުމަށް ބާއްވާ 'ޕަބްލިކް ހެލްތު ކޮންފަރެންސް 2025' މިއަދު ވިލާ ނޯޓިކާގައި ފަށައިފިއެވެ. ދެ ދުވަހުގެ މުއްދަތަށް ކުރިއަށްދާ މި ކޮންފަރެންސް ރަސްމީކޮށް ފައްޓަވައިދެއްވީ މިނިސްޓަރ އޮފް ހެލްތު އަބްދުالله ނާޒިމް އިބްރާހިމް އެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި މިނިސްޓްރީ އޮފް ހެލްތާއި ދިވެހިރާއްޖޭގެ ޤައުމީ ޔުނިވަރސިޓީ ގުޅިގެން ކުރިއަށްގެންދާ މި ކޮންފަރެންސް ބޭއްވުމުގައި އިންޓަރނޭޝަނަލް އޮފިސް އޮފް މައިގްރޭޝަން (އައި.އޯ.އެމް)، ސާރކް ޑިވެލޮޕްމަންޓް ފަންޑު، އަދި ދުނިޔޭގެ ޞިއްޙަތު ޖަމްއިއްޔާ (ޑަބްލިއު.އެޗް.އޯ) ގެ އެހީތެރިކަން ލިބިފައިވާ ކަމަށް އެޗްޕީއެން ފާހަގަކޮށްފައިވެއެވެ.

މި ކޮންފަރެންސްގެ މައިގަނޑު މަޤްޞަދަކީ، އާންމު ޞިއްޙަތަށް އަސަރު ކުރާ މުހިއްމު ކަންކަމާ ގުޅޭގޮތުން ތަޖުރިބާއާއި މައުލޫމާތު ބަދަލުކޮށް، މަޝްވަރާތަކާއި ކަމާބެހޭ ކަރުދާސްތަކާއި ދިރާސާތައް ހުށަހަޅާ، އެކި ދާއިރާތަކުގެ މާހިރުންގެ ބައިވެރިވުމާއެކު އާންމު ޞިއްޙަތުގެ ކަންކަމަށް ޙައްލު ހޯދުމަށް ޚިޔާލު ބަދަލުކުރުމަށް ފޯރަމެއް ފަހިކޮށްދިނުމެވެ.

މިއަހަރުގެ ކޮންފަރެންސްގެ ތީމަކީ ‘Equitable Access, Reducing Vulnerabilities: Advancing Migrant Health in the Maldives’ އެވެ.

ސަރުކާރުގެ މުއައްސަސާތަކުންނާއި، އަމިއްލަ ކުންފުނިތަކާއި، ޖަމްއިއްޔާ ޖަމާއަތްތަކުން 100އަށް ވުރެ ގިނަ ބޭފުޅުން ބައިވެރިވެވަޑައިގަންނަވާ މި ކޮންފަރެންސްގައި، ޚާއްސަކޮށް ބިދޭސީންގެ ޞިއްޙަތުގެ މައްސަލަތަކަށް ސަމާލުކަން ދެވިގެންދާނެއެވެ.

ދިވެހިރާއްޖޭގައި ދިރިއުޅޭ ކޮންމެ ހަތަރު މީހަކުން އެކަކަކީ ބިދޭސީއެކެވެ. އަދި ރާއްޖޭގެ މަސައްކަތްކުރާ އާބާދީގެ %43އަކީ ބިދޭސީންނެވެ. މިހެންކަމުން، ދިވެހިރާއްޖޭގައި ދިރިއުޅޭ ހުރިހާ އެންމެންގެ ދުޅަހެޔޮކަން ކަށަވަރު ކުރުމަށްޓަކައި، ބިދޭސީންގެ ޞިއްޙަތު ވަރަށް މުހިއްމުކަން ފާހަގަކުރެވެއެވެ.

ބިދޭސީންގެ ދުޅަހެޔޮކަން ކަށަވަރުކުރުމަށް ގިނަ ގޮންޖެހުންތަކެއް ކުރިމަތިވެފައިވާއިރު، ރާއްޖޭގައި ކޮންޓްރޯލްވެފައި ނުވަތަ ނައްތާލެވިފައިވާ ގައިންގަޔަށް އަރާ ބަލިތައް، އެންމެ ގިނަ ބިދޭސީން ރާއްޖެއަށް އަންނަ ޤައުމުތަކުގައި އަދިވެސް ފެތުރެމުންދާކަން އެޗްޕީއޭއިން ފާހަގަކުރެއެވެ.

މީގެ އިތުރުން، ބިދޭސީން ރާއްޖޭގައި ދިރިއުޅޭ އަދި މަސައްކަތްކުރާ މާހައުލުގެ ހާލަތާއި، ވިސާ ނެތި އުޅުމާއި، މަސައްކަތްތެރިންގެ މާލީ ހާލަތު އަދި މުޖުތަމައުގައި އެމީހުން ތަހައްމަލުކުރަންޖެހޭ ތަފާތުކުރުން ފަދަ ކަންކަމަކީ ފުރިހަމަ ޞިއްޙަތެއްގައި ހުރުމަށް އަދި ބޭނުންވާ ޞިއްޙީ ޚިދުމަތްތައް ލިބުމަށް އެޅޭ ހުރަސްތަކެއް ކަމަށްވެސް ބުނެފައިވެއެވެ.

މި ހުރަސްތަކުން އަރައިގަނެ، ރާއްޖޭގައި އުޅޭ ބިދޭސީންގެ ދުޅަހެޔޮކަން ކަށަވަރުކުރުމަށް ކުރަންޖެހޭ ކަންކަން ޤައުމީ ފެންވަރުގައި ވިލަރެސް ކުރުމަށްޓަކައި ސަރުކާރުން މި އަހަރު ވަނީ 'މައިގްރަންޓް ހެލްތު ޕޮލިސީ' ނުވަތަ ބިދޭސީންގެ ޞިއްޙަތުގެ ސިޔާސަތު ތަންފީޒުކުރަން ފަށާފައެވެ.

މި ޕޮލިސީގައި ހިމެނޭ 5 ދާއިރާގެ ތެރެއިން 3 ދާއިރާގައި ހުރި ކަންކަމާމެދު މި ކޮންފަރެންސްގައި މަޝްވަރާކޮށް، ޕޮލިސީ ތަންފީޒު ކުރުމަށް ހަރުދަނާ ހުށަހެޅުންތަކެއް ލިބިގެންދާނެކަމަށް އެޗްޕީއޭ އިން ބުނެފައިވެއެވެ.