އަމާން އުދަރެސްގެ ބައެއް ޔުނިޓްތަކުގެ ފެންބިލް ބޮޑުވި މައްސަލަ ބަލައި، އެކަން ހައްލުކުރުމުގެ މަސައްކަތް ފަށާފައިވާކަމަށް ފަހިދިރިއުޅުން ކޯޕަރޭޝަނުން ބުނެފިއެވެ.

މިކަމާ ގުޅިގެން އެފްޑީސީން ބުނެފައިވަނީ، އަމާން އުދަރެސް ޔުނިޓުތަކުގެ ފެން ބިލްތަކާ ގުޅިގެން ޔުނިޓު ތަކުގައި ދިރިއުޅޭ ފާރަތްތަކުގެ ކަންބޮޑުވުން އެ ކުންފުނީގެ ސަމާލުކަމަށް އައިސްފައިވާކަމަށެވެ. އެގޮތުން މިކަމުގެ އަސްލު ދެނެގަނެ ހައްލުއް ހޯދުމަށް ކުރަންޖެހޭ މަސައްކަތް، ކަމާ ގުޅުންހުރި ފަރާތްތަކާއެކު މިހާރު ކުރަމުންގެންދާަކަމަށް އެފްޑީސީން ބުންޏެވެ.

" ފެން ބިލުގައި މައްސަލަ ހުރިކަމަށް ފާހަގަކުރެވޭ ފަރާތްތަކުން، އެފް.ޑީ.ސީގެ ހޮޓްލައިން ނަންބަރަށް ގުޅުއްވާ ނުވަތަ [email protected] މައްސަލަ ހުށަހެޅުއްވުމަށް އެދެމެވެ" އެފްޑީސީން ނެރުނު ބަޔާނުގައި ބުންޏެވެ.

މިފަހަރު ބިލް ތައްޔާރުވެގެން އާއިރު އަމާން އުދަރެސްގެ ބައެއް ޔުނިޓްތަކުގެ ފެންބިލް ބޮޑުަކަމަށް އެ ޔުނިޓްތަކުގައި އުޅެމުންދާ ބައެއް ފަރާތްތަކުން ވަނީ ބުނެފައެވެ. އެގޮތުން ބައެއް ބިލްތަކަށް 7000 ރުފިޔާ އާ ގާތްކުރާ އަދަދަކުން ބިލްކޮށްފައި ހުއްޓެވެ.

މިކަމާ ގުޅިގެން އެމްޑަބްލިއުއެސްސީގެ މެނޭޖިން ޑިރެކްޓަރު ޢަބްދުލްމަތީން މުޙައްމަދު މިއަދު ބައެއް މީޑިއާތަކުގައި ވިދާޅުވެފައިވަނީ ބޮޑުވި ބިލްތައް ދައްކަންޖެހޭނީ އެފްޑީސީން ކަމަށާއި، ބޮޑުވި މީޓަރުތައް ހުރީ އެފްޑީސީގެ ނަންމަތީގައި ކަމަށެވެ. ފެންބިލް ބޮޑުވެފައިވަނީ ފެން ލިބޭތޯ ބެލުމާއި، އަދިރަސްމީކޮށް ފެން ދޫކުރުމުގެ މަރުހަލާގެ ކަންކަން ކުރިއަށްދިޔައިރު ބޭނުންކޮށްފައި ފެން ބޭނުންކުރުމުންކަމަށް އެމްޑީ ފާހަގަކުރެއްވިއެވެ. 

ގެދޮރުވެރިޔާ ސްކީމްގެ ދަށުން ހުޅުމާލޭ ފޭސް ދޭއްގައި ފަހި ދިރިއުޅުން ކޯޕަރޭޝަނުން ތަރައްޤީކުރި 4،000 ހައުސިން ޔުނިޓްތައް ހައްޤުވެރިންނާ ހަވާލުކުރުމުގެ މަސައްކަތް ފަށާފައިވަނީ ސެޕްޓެމްބަރުމަހުގެ 28 ވަނަ ދުވަހުއެވެ. ފަހިދިރިއުޅުން ކޯޕަރޭޝަނުން އެންމެ ފުރަތަމަ ހަވާލުކުރަން ފަށާފައިވަނީ އަމާން އުދަރެސް ޓަވަރު 14 ގައި ހިމެނޭ އެޕާޓްމަންޓްތަކެވެ.