މީސްމީޑިޔާ އެކްޓިވިސްޓް އަހުމަދު ޝަރީފް (އީގަލް ޝަރީފް)، ނުކުޅެދުންތެރިކަން ހުންނަ މީހަކަށް ފުރައްސާރަކޮށް އާއްމުކުރި ވީޑިއޯ އަކާ ގުޅިގެން ގިނަ ބައެއްގެ ނުރުހުން އޭނާއަށް އަމާޒުވެއްޖެއެވެ. 

ޓިކްޓޮކްގައި އީގަލް ޝަރީފް އިއްޔެ އާއްމު ކުރި ވީޑިއޯއެއްގައި އޭނާ ވަނީ މާފަރުގައި ހުންނަ ފެނަކަ ބްރާންޗުގައި މަސައްކަތްކުރާ ނުކުޅެދުންތެރިކަން ހުންނަ މީހަކަށް ފުރައްސާރަކޮށް، އޭނާ އުޅިއަރުވަން މަސައްކަތްކޮށްފައެވެ. 

އެގޮތުން، އެ މީހާގެ ވީޑިއޯ ކުރަން ފެށުމުން ހިތްހަމަނުޖެހިގެން އެކަން ނުކުރުމަށް އެދުމުންވެސް ހުއްޓާނުލައި އެކަން ކޮށްފައިވާއިރު، އެފަދައިން ކަންކުރާ ނަމަ، އޮފީހަށާއި ކޯޓަށްވެސް އަންގާނެ ކަމަށް އެ މީހާ ބުނުމުން ޝަރީފު ވަނީ މަލާމާތްކުރާ ޒާތަށް އެ ނުކުޅެދުންތެރިކަން ހުންނަ މީހާއަށް ޖަވާބުދާރީ ވެފައެވެ. 

”މިވަގުތު އިންޖީނުގެއާ ހަވާލުވެހުރި އެންމެ އިސްފަރާތް އެ އައީ. ފެނަކައިގެ މާފަރުގައި ހުރި އެންމެ އިސް ފަރާތް. ވަރަށް ރުޅިގަދަވެފައި އެ ފެންނަނީ. ލަފާކުރެވޭ ގޮތަށް ވިއްޔާމުން ފޯނުވެސް އަތުލަފާނެ.“ އީގަލް ޝަރީފް ނުކުޅެދުންތެރިކަން ހުންނަ މީހާއަށް ފުރައްސާރަކޮށް އާއްމުކުރި ވީޑިއޯގައި ބުނެފައިވެއެވެ. 

ވީޑިއޯ ނުކުރުމަށް އެ މުވައްޒަފު އެދުމުންވެސް އީގަލް ޝަރީފުވަނީ އެ މީހާގެ ހަރަކާތްތައް ވީޑިއޯ ކޮށްފައެވެ. 

އީގަލް ޝަރީފުގެ އެ ވީޑިއޯއާ ގުޅިގެން ގިނަ ބަޔަކު ވަނީ ނުރުހުންފާޅުކޮށް ކޮމެންޓް ކޮށްފައެވެ. 

އެގޮތުން، ކޮމެންޓް ކުރި މީހަކު ވަނީ، އެފަދައިން ބުލީ ކުރާ މީހާއަށް ނުވަތަ އާއިލާ މީހަކަށް އެގޮތަށް ބުލީ ކުރާއިރު ބަލަން ކެތްވާނެތޯ ސުވާލުކޮށް، ގޮތެއްފޮތެއް ހުރިނަމަ އެފަދައިން މަލާމާތް ނުކުރާނެ ކަމަށް ބުނެފައެވެ. 

”ތިމާވަރުގެ މީހަކު ނެތްކަމަށް ހެދިގެން މިކަހަލަ ކުދިންނާފޮށި އެކުދިންގެ ޙާލަތަށް ނުބަލާ މި ކުރެވެނީ މާމޮޅުކަމެއްކަން ދައްކާއިރު މި ޝަރީފަށް ހީވަނީބާ މި ފަޟީލީޙަތް ކުރަނީ ރައީސް މުޢިއްޒުއޭ ނުވަތަ ފެނަކަ ވެރިންނޭ. މިކަހަލަ ނާތަހުޒީބު ޢަމަލު ހިންގާ އަދި ޚާއްޞަ އެހީއަށް ބޭނުންވާ ކުދިންނަށް ފުރައްސާރަ ކުރާ މި ޢަމަލު ކުއްވެރިކުރަން. އަދި ކަމާއިބެހޭ ފަރާތްތަކުން މި ޝަރީފުއާއިމެދު ފިޔަވަޅު އެޅުމަށް އެދެން.“ އެހެން މީހަކު ކޮށްފައިވާ ކޮމެންޓެއްގައި ބުނެފައިވެއެވެ. 

މީގެ އިތުރުންވެސް، މީހަކު ވަނީ، ދައުލަތުން ނުކުޅެދުންތެރިކަން ހުންނަ މީހުންނަށް ވަޒީފާ ދެނީ އެމީހުން ބާކީ ނުކޮށް، ދިރިއުޅުން އާރާސްތު ކުރުމަށް އެހީވުމަށްކަން ފާހަގަކޮށްފައެވެ. އެހެންނަމަވެސް، މުޖުތަމައުގެ ބައެެއް މީހުން، ނުކުޅެދުންތެރިކަން ހުންނަ މީހުންނަށް އެ ފުރުސަތު ނުދޭން މަސައްކަތްކޮށް އެމީހުންނަށް ހަޖޫ ޖަހާ ކަމަށް ބުނެފައެވެ.

މީނޫނަސް އެތައް ބަޔަކު ވަނީ އީގަލް ޝަރީފުގެ އެ ޢަމަލާމެދު ނުރުހުން ފާޅުކޮށް، ނުކުޅެދުންތެރިކަން ހުންނަ މީހުންނަށް މުޖުތަޢުގައި ފުރުސަތުތައް ފަހިކޮށްދޭން މަސައްކަތް ކުރާއިރު އެމީހުންނަށް ފުރައްސާރަ ކުރުމަކީ ބަލައިގަނެވޭނެ ކަމެއް ނޫން ކަމަށް ބުނެފައެވެ.