މަސްވެރިކަމުގެ ސިނާއަތު ކުރިއެރުވުމަށް އެމަނިކުފާނުގެ ސަރުކާރުން ބޮޑެތި މަޝްރޫޢުތަކެއް ފެއްޓެވިކަމަށާ، އެ މަޝްރޫޢުތައް ނިންމެވުމަކީ ކޮންމެހެން ކުރަންޖެހޭކަމެއް ކަމަށް، ކުރީގެ ރައީސް އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ، މިއަދު ފާހަގަކުރާ މަސްވެރިންގެ ދުވަހުގެ ތަހުނިޔާ އެންމެހާ މަސްވެރިންނާއި މަސްވެރި އާއިލާތަކަށް އަދި މަސްވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް އަރިސް ކުރައްވައި އެކްސްގައި ކުރެއްވި ޕޯސްޓެއްގައެވެ.
މަސްވެރިކަމުގެ ސިނާއަތު ކުރިއެރުވުމަށް “ކުރީ ސަރުކާރުން” ފަށާފައިވާ ބޮޑެތި މަޝްރޫޢުތައް އަވަހަށް ނިންމުމަކީ ކޮންމެހެން ކުރަންޖެހޭ ކަމެކެވެ.
ކުރީގެ ރައީސް ޞާލިޙް
މިއާއެކު ޞާލިޙް ވަނީ، ފައިސާ ހަމަޖެހިފައިވާ މަޝްރޫޢުތައް ލަސްނުކޮށް ނިންމުމަށް އެދިވަޑައިގެންފައެވެ.
”އެއީ މަސްވެރިކަމުގެ ސިނާއަތަށް ދިމާވެފައިވާ ގިނަކަންތައްތަކަށް ރަނގަޅުބަދަލުތަކެއް ގެނެސްދޭނެ ޕްރޮޖެކްޓްތަކެކެވެ.“ ރައީސް ޞާލިޙް ވިދާޅުވިއެވެ.
ރައީސް ޞާލިޙް މިހެން ވިދާޅުވި ނަމަވެސް އެއީ ކޮން މަޝްރޫޢުތަކެއް ކަން ހާމަކުރައްވާފައެއް ނުވެއެވެ.
ނަމަވެސް އެ ސަރުކާރު ނިމުނު އިރު ބައެއް އައިސްޕްލާންޓުތައް ތަރައްގީކުރުމުގެ މަސައްކަތް ފަށާފައި ހުރިކަން ފާހަގަކޮށްލެވެއެވެ.
މަސްވެރިކަން ކުރިއަރުވަން ފެއްޓެވި މަޝްރޫޢުތައް ނިންމަވަން އެދިވަޑައިގެންނެވި އިރު، މި ސަރުކާރު ފެށިއިރު މަސްވެރިންނަށް ދޭންޖެހޭ ގިނަ އަދަދެއްގެ ފައިސާ ޞާލިޙްގެ ސަރުކާރުން ނުދީ ހުރިކަން މި ސަރުކާރުން ވަނީ ފާހަގަކޮށްފައެވެ. އަދި އެ ބެކްލޮގް ފިލުވައި، މަސްކިރާތާ 48 ގަޑިއިރުތެރޭ މަހުގެ އަގު ދިނުމުގެ މަސައްކަތް ފެށިފައިވާކަން ސަރުކާރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
