މަސްވެރިކަން ކުރިއެރުވުމަށް އެމްޑީޕީ ސަރުާރުން ފެށި މަސައްކަތްތައް ކުރިއަށް ގެންދަންޖެހޭ: ޝާހިދު
މަސްވެރިކަމުގެ ސިނާއަތް ކުރިއެރުވުމަށް ނިމިގެންދިޔަ އެމްޑީޕީގެ ސަރުކާރުން ކުރަން ފެށި މަސައްކަތްތައް ކުރިއަށްގެންދިއުމަށް އެމްޑީޕީގެ ރައީސް އަބްދުﷲ ޝާހިދު ގޮވާލައްވައިފިއެވެ.
މިއަދު ފާހަގަކުރަމުންދާ މަސްވެރިންގެ ދުވަހު އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، މަސްވެރިން ބާނާ މަހަށް ހަމަ އަގު ހޯދައިދީ، މަސްވެރިކަމުގެ ސިނާޢަތު އިތުރު ހަރުފަތަކަށް ގެންދިޔުމަށް އެމްޑީޕީއިން ފަށާފައިވާ މަސައްކަތް މިއަދުގެ ސަރުކާރުން ހުއްޓުމަކަށް ގެނެސްފައި އޮތް އޮތުން ނިމުމަކަށް ގެންނަން ޖެހޭކަމަށެވެ.
ޝާހިދު ވިދާޅުވީ މަސްވެރިކަމަކީ، ޒަމާނުއްސުރެ ދިވެހި އިޤްތިޞާދުގެ ލޭނާރުގެ ގޮތުގައި އޮތް މަސައްކަތް ކަމަށާއި، މި ސިނާއަތް އިޤްތިޞާދުގެ މުހިއްމު ތަނބެއްގެ ގޮތުގައި ދަމަހައްޓަން ޖެހޭކަމަށެވެ. އެގޮތުން މަސްވެރިންނަށާއި، ސިނާޢަތުގައި މަސައްކަތްކުރާ އެހެން ވިޔަފާރިތަކަށް ހައްޤު މިންވަރު ހޯދައިދިނުމަށް ޝާހިދު ވަނީ ސަރުކާރަށް ގޮވާލާފައެވެ.
އެމްޑީޕީ ސަރުކާރުގެ އެންމެ ފަހުދުވަސްކޮޅު އެޕާޓީން ވަނީ މަސްގަންނަ އަގު 25 ރުފިޔާއަށް ބޮޑުކޮށްފައެވެ. އޭގެ ކުރިން މަސް ގަންނަ އަގެއްގެ ގޮތުގައި ކަނޑައަޅާފައިވަނީ 17 ރުފިޔާއެވެ. ސަރުކާރުން މިހާރު މަސް ގަންނަ އަގެއްގެ ގޮތުގައި ކަނޑައަޅާފައިވަނީ 20 ރުފިޔާއެވެ.
ސަރުކާރުން މަސްގަންނަ އަގު ދަށްކޮށްފައިވަނީ، ދައުލަތުން މާލީގޮތުން އުފުލަންޖެހޭ ބުރަ ކުޑަކުރުމަށްކަމަށް މަސްވެރިކަމާބެހޭ ވަޒީރު އަހުމަދު ޝިޔާމް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
