އައްޑޫގައި ދަރިވަރަކާއި ޓީޗަރެއްގެ ދެމެދުގައި ހިނގި މާރާމާރީގެ މައްސަލަ ބަލަނީ
އައްޑޫގައި ދަރިވަރަކާއި އިންޑިއާ ޓީޗަރަކާ ދެެމެދު ހިނގާދިޔަ މާރާމާރީގެ މައްސަލައެއް ބަލަމުންދާ ކަަމަށް އެޑިއުކޭޝަން މިނިސްޓްރީން ބުނެފި އެވެ.
އައްޑޫ ހައި ސްކޫލުގައި ގުރޭޑް 12 ގެ ދަރިވަރަކަށް އިންޑިއާ ޓީޗަރު އަނިޔާ ކުރާ މަންޒަރު ފެންނަ ވީޑިއޯއެއް ވަނީ އާންމުވެފަ އެވެ. ކުލާހުގެ އެތައް ކުދީންނެއް ކުރިމަތީ އެ ދަރިވަރަށް އިންޑިއާ ޓީޗަރަކު ވަނީ އަތް އިސްކޮށް ހަމަލާދީފަ އެވެ. އެ ދަރިވަރުގެ ކަރުގައި ހިފާ އެ ދަރިވަރު ބިންމަައްޗަށް ވައްޓާލާ ވެސް އަނިޔާކޮށްފައިވެ އެވެ.
ބައެއް ފަހަރު ދަރިވަރުވެސް އަތް ފޮޅާލާ ޓީޗަރަށް ހަމަލާ ދެ އެވެ. އެއާއެކު އަނެއްކާ ވެސް ޓީޗަރު ރައްދު ހަމަލާ ދެ އެވެ.
އެ ވީޑިއޯ އާންމުވެ ޓީޗަރަށް ވަރަށް ބޮޑަށް ފާޑުކިޔުން އަމާޒުވެފައިވާއިރު އެޑިއުކޭޝަން މިނިސްޓްރީން ބުނީ އެ މައްސަލަ ސަމާލު ކަމަށް އައިސްފައިވާ ކަމަށެވެ. އަދި ވަގުތުން ފިޔަވަޅު އަޅަން ފަށާފައިވާ ކަމަށެވެ. އިންޑިއާގެ ފިރިހެން ޓީޗަރު މިހާރު ވަނީ ސަސްޕެންޑް ކޮށްފަ އެވެ. އަދި އެ މައްސަލަ އިތުރަށް ބަލަމުންދާ ކަމަށް ބުންޏެވެ.
Advertisement
This content is created and paid for by advertisers and does not involve Voice Journalists
