ރާއްޖޭގައި ފުރަތަމަފަހަރަށް، ޚާއްސަ އިޤްތިޞާދީ ސަރަޙައްދު ކަނޑައެޅުމުގެ ޤާނޫނުގެދަށުން، ސަސްޓެއިނަބަލް ޓައުންޝިޕެއް ޤާއިމް ކުރުމުގެ ހުއްދަ މިއަދު ރަސްމީކޮށް ދީފި އެވެ.

"ޕްރޮޖެކްޓް އޭލާ" ގެ ނަމުގައި ހިންގާ މި މަޝްރޫއުއަކީ ކްރިސްޓަލް ހޯލްޑިންގް ޕްރައިވެޓް ލިމިޓެޑުން ކުރިއަށް ގެންދާ މަޝްރޫއު އެކެވެ. މިއަދު އޮތް ޚާއްސަ ރަސްމިއްޔާތެއްގައި މި މަޝްރޫއު ކުރިއަށް ގެންދިއުމުގެ ހުއްދަ ރަސްމީކޮށް ވަނީ ދީފަ އެވެ.

އެކަމުގެ ލިޔުން އެ ކުންފުންޏާއި ހަވާލުކޮށް ދެއްވީ އިކޮނޮމިކް މިނިސްޓަރު މުޙައްމަދު ސަޢީދެވެ.

މިއީ 790 މިލިއަން އެމެރިކާ ޑޮލަރު ނުވަތަ ރުފިޔާގެ އަގުން ނަމަ 12.2ބިލިއަން ރުފިޔާގެ އަގުގައި، ނ.އަތޮޅުގައި ތަރައްޤީކުރާ ޓައުންޝިޕެވެ.

އެސްއީޒެޑްގެ ފުރަތަމަ މަޝްރޫއަށް ހުއްދަ ދިނުން

މި މަޝްރޫއުއާ ގުޅޭގޮތުން މިނިސްޓަރު ސަޢީދު ވިދާޅުވީ ނޫނު ޓައުންޝިޕް ވެގެންދާނީ މިޒަމާނުގެ ވަސީލަތްތަކާއި ސިފަތަކާއެކު އިންޑިއަން އޯޝަންގެ އިތުރަށް ދުނިޔޭގެ ފެންވަރުގައިވެސް ފާހަގަ ކުރެވޭނެ ތަފާތު މަޝްރޫޢަކަށް ކަމަށެވެ.

މި ޓައުންޝިޕްގައި ދުނިޔޭގެ ފެންވަރުގައި ޚިދުމަތްދޭ ސިއްޙީ އަދި ދުޅަހެޔޮ ކަމުގެ ފަރުވާލިބޭ ވަސީލަތް ޤާއިމް ކުރުމުގެ އިތުރަށް، ދުނިޔޭގެ ފެންވަރުގެ ޓޫރިޒަމް ސްކޫލަކާއި، %60 އިއާދަކުރަނިވި ހަކަތައިން ކަރަންޓު އުފެއްދޭނެ ގާބިލްކަން ހުރުން ލާޒިމު ވާނެ ކަމަަށް ވެސް ވިދާޅުވި އެވެ.

މީގެއިތުރަށް، ދަނޑުވެރިކަމުގެ ވަސީލަތާއި، ޒަމާނީ ޓެކްނޮލޮޖީއާއެކު އެކުއަރކަލްޗަރ، މެރިކަލްޗަރގެ ޒޯނެއް ހިމެނޭނެ ކަމަަށް މިނިސްޓަރު ވިދާޅުވި އެވެ.

އެސްއީޒެޑްގެ ފުރަތަމަ މަޝްރޫއަށް ހުއްދަ ދިނުން

ފަތުރުވެރިކަމުގެ ކޮމްޕޯނަންޓްތަކުގެ އިތުރުން އިޖްތިމާއީ މުހިންމު އެސެޓުތަކެއް ތަރައްޤީ ކުރެވިގެންދާ މި މަޝްރޫޢަކީ، ސަރުކާރަށް އާމުދަނީ ވަންނާނެ މުހިންމު ޓެކްސްތައް ކަމުގައިވާ ޖީއެސްޓީ، ޓީޖީއެސްޓީ، ޓޫރިޒަމް ލީސްރެންޓް އަދި ގްރީން ޓެކްސް ވެސް ސަރުކާރަށް ލިބޭގޮތަށް ޤާނޫނަށް ބަދަލުގެނެވި އެސް.އީޒެޑަށް ހުއްދަ ދީފައިވާ މަޝްރޫއެއް ކަމަށާ ރާއްޖޭގެ ޓެކްސް ބޭސް ފުޅާކޮށް، އާމުދަނީ ސަރުކާރަށް ވައްދައިދޭނެ ބިޔަ މަޝްރޫޢެއް ކަމަށް ވެސް މިނިސްޓަރު ވިދާޅުވި އެވެ.

“ހަމަ އެހެންމެ، ރާއްޖޭގައި ތިބެގެން، ދުނިޔޭގެ ފެންވަރުގެ ހޮސްޕިޓާލިޓީ ސްކޫލެއްގައި ތަމްރީނުވެ، ޒުވާނުންނަށް އޭގެ މަންފާ އެންމެ ފުރިހަމަ ގޮތުގައި ގެނެސްދޭނެ މަޝްރޫޢެއް،” މިނިސްޓަރު ވިދާޅުވި އެވެ.

މިމަޝްރޫޢު 2028 އަށްނިންމާލެވޭނެ ކަމަށ އެ ޓައުންޝިޕުގައި އިންވެސްޓްކޮށް ޑިވެލޮޕް ކުރާފަރާތުން ސަރުކާރަށް މަޢުލޫމާތުދޭނެ ކަމަށް ސައީދު ވިދާޅުވި އެވެ.

އަދި ވިދާޅުވީ ސްޕެޝަލްއިކްނޮމިކް ޤާނޫނަށް ހަޤީޤީމާނާގައި ޢަމަލުކުރަންފަށައި އެޤާނޫނަށް ގެންނަންޖެހޭ އިސްލާޙުތައްވެސް ވަނީ ގެނެސްފައި ކަމަށެވެ. މިނިސްޓަރު ސައީދު ވަނީ ރަޢީސް މުޢިއްޒުގެ ތަރައްޤީގެ މެނިފެސްޓޯ ޙަޤީޤަތަކަށްވަމުން އައުމަކީ ރައްޔިތުންނާއި ޤައުމަށް ލިބިގެންދާ ނުހަނު ބޮޑު ކުރިއެރުމެއް ކަމަށް ވެސް ވިދާޅުވެފަ އެވެ.