ކުޑަ ކުދިންނަށް ޚާއްސަކޮށްގެން ”ޢިލްމުވެށި“ އިން ލޯބި ހަދިޔާތަކެއް ދޫކުރަންފަށައިފިއެވެ. 

”އިލްމުވެށި“ އަކީ ކިޔަވާ ކުދިންނަށް ޚާއްސަކޮށް ޕްރީސުކޫލު އަދި ފައުންޑޭޝަން ސްޓޭޖުގެ އުމުރުގެ ކުދިންނަށް ޚާއްސަކޮށްގެން ތަފާތު ވޯކްޝީޓާއި، މަސައްކަތު ފޮތާއި، އަދި ވީޑިއޯވެސް ތައްޔާރުކުރަމުންދާ ޕޭޖެކެވެ. 

ކުޑަކުދިން އުފާވެރިކަމާ، ޝައުގުވެރިކަމާއެކު އުނގެނި، ކަންކަން ދަސްކުރުމަށް  މަގުފަހިކޮށްދިނުމަށް ޢިލްމުވެށިން އަންނަނީ ތަފާތު އެކި މަސައްކަތްތައް ކުރަމުންނެވެ. 

އަހަރެމެން އެންމެ ކުޑައިރުން ފެށިގެން ކިޔައި ދަސްކޮށް، އަދުގެ ޖީލުތަކަށްވެސް ފޯރުކޮށްދެމުން އަންނަ ރައިމްސް ލަކާއި، ލަވަތަކާއި ބަނދި ފަދަ ތަކެތީގެ އެނިމޭޓެޑް ވީޑިއޯ ހެދުމުގެ މަސައްކަތް ޢިލްމުވެށިން ފަށާފައިވާއިރު މިހާރު އެއިން ބައެއް ރައިމްސްތައް އިލްމުވެށީގެ ޔޫޓިޔުބް ޗެނަލާއި މީސްމީޑިއާގެ މަންސަތަކުގައި ވަނީ އާންމުވެސް ކޮށްފައެވެ.

އެގޮތުން މިހާތަނަށް 5 ރައިމްސްގެ ވީޑިއޯ ނެރެފައިވާއިރު އޭގެ ތެރޭގައި، ކުދިކުދި ތަރިތައް، ފައިދިގު މަކުނު އަދި އައިޝާގެ ފަޅޯދަނޑު ފަދަ ރައިމްސް ހިމެނެއެވެ.

އިލްމުވެށިން ގެނެސްދޭ އެންމެ ލޯބި އެއް ހަދިޔާ އަކީ އަކުރުތައް ތުއްތު ކުދިންނަށް ފަސޭހައިން ދަސްކޮށްދިނުމަށް ފަށާފައިވާ ޚާއްސަ ކާޓޫން ސީރީޒްއެވެ. ”ހ ށ“ ސީރީޒްގެ ނަމުގައި ފަށާފައިވާ މި ސީރީޒްގައި ކޮންމެ އަކުރަކަށްވެސް ވަކި ކާޓޫނެއް ގެނެސްދިނުމަށް ވަނީ ނިންމާފައެވެ. އެގޮތުން، މިހާތަނަށް "ހ" އާއި "ށ"  އަކުރުގެ ކާޓޫނު އާންމުކޮށްފައިވާއިރު ކޮންމެ ކާޓޫނެއްގައިވެސް، އެ އަކުރަކާއި އެ އަކުރުން ފެށޭ ނުވަތަ ނިމޭ ތަކެތި ކުދިންނަށް ދަސްކޮށްދެއެވެ. 

މި ސީރީޒްގެ އެންމެ ޚާއްސަ އެއް ކަމަކީ ސީރީޒްގެ މެއިން ކެރެކްޓަރަކަށް އެނިމޭޓެޑްކޮށް ހަދާފައިވާ އަކުރު އުޅުމެވެ. އެގޮތުން ހ އަކުރުގެ ކާޓޫން، “ހ ހިނގާލަން ދިޔުން“ ގައި ހ އުޅޭއިރު ”ށ ނެތްނަމަ“ ކާޓޫނުގެ މެއިން ކެރެކްޓާއަކަށް އުޅެނީ ށ އަކުރެވެ. މިއީ ކުދިންނަށް އަކުރު ދަސްކޮށްދީ، ސިކުނޑީގައި ރަނގަޅަށް ހަރުލާފައި ބެހެއްޓުމަށް އެހީވެދިނުމަށް ކުރެވިފައިވާ ކަމެއްކަން އިލްމުވެށިން ފާހަގަކުރެއެވެ. 

ހ ށ ސީރީޒްއާއި ރައިމްސްގެ އިތުރުންވެސް ކުދިންނަށް ރިވެތި އަޚްލާޤު ދަސްކޮށްދެވޭ ކާޓޫން ޢިލްމުވެށިން ގެނެސްދެމުންދާނެ ކަމަށް އެފަރާތުން ބުނެއެވެ.

ޢިލްމުވެށިން އެނިމޭޓެޑް ވީޑިއޯތަކުގެ އިތުރުން، ކުޑަކުދިންގެ ކިޔެވުމަށް އެހީތެރިވެދިނުމަށް ޕީޑީއެފް ވޯކްޝީޓްސްވެސް ވިއްކައެވެ. އަދި ބައެއް ވޯކްޝީޓްތައް ހިލޭވެސް ލިބެން ހުންނަކަން ފާހަގަކޮށްފައިވެއެވެ. ޕީޑީއެފް ފައިލްތައް ގަންނަން ބޭނުންވާ ފަރާތްތަކުން ޢިލްމުވެށީގެ އިންސްޓަގްރާމް ނުވަތަ ފޭސްބުކް ޕޭޖަށް މެސެޖް ކޮށްލުމުން އެ ފައިލްތައް ލިބިގެންދާނެ ކަމަށާ، އަދި ހިލޭ ލިބޭ ވޯކްޝީޓްތަކުގެ ޕީޑީއެފް ފައިލްތައް ޢިލްމުވެށީގެ ވައިބާ ޗެނަލުން ފަސޭހަކަމާއެކު ޑައުންލޯޑް ކުރެވޭނެ ކަމަށް ބުނެފައިވެއެވެ.

ޢިލްމުވެށި އިން ވިއްކާ ޕީޑީއެފް ވޯކްޝީޓްގެ ޕޯސްޓަރެއް

ވޯކްޝީޓްގެ އިތުރުން ޢިލްމުވެށި އިން ވަރަށް އަވަހަށް ”ތާނަ އަކުރު މަޖާ“ ނަމުގައި އަކުރު ދަސްކޮށްދޭ މަސައްކަތު ފޮތެއްވެސް ނެރުމަށް ތައްޔާރުވަމުންދާ ކަމަށް އެފަރާތުން ބުނެފައިވެއެވެ. 

ޢިލްމުވެށިގެ މީސްމީޑިއާ މަންސަތަކުގެ ލިންކުތައް ތިރީގައި މިވަނީއެވެ. 

ޔޫޓިޔުބް: https://www.youtube.com/@ilmveshi

ވައިބާަ ޗެނަލް: https://invite.viber.com/?

ފޭސްބުކް: facebook.com/ilmveshi

އިންސްޓަގްރާމް: https://www.instagram.com/ilmveshi

ޓިކްޓޮކް: https://www.tiktok.com/@ilmveshi