ޗައިނާގެ ވިޔަފާރިވެރިންނަށް އިންޑިއާއިން ވިސާގެ ލުއިތަކެއް
ޗައިނާގެ ވިޔަފާރިވެރިންނާއި ޓެކްނީޝަނުން އިންޑިއާއަށް އެތެރެވުމަށް ވިސާ ނަގަން އޮންނަ ހަރުކަށި އުސޫލުތަކަށް ދޫދީ، ފަސޭހައިން ވިސާ ލިބޭނެ އިންތިޒާމު އެގައުމުން ހަމަޖައްސައިފިއެވެ.
2020 ވަނަ އަހަރު ސަރަހައްދީ ރޮނގުގައި ހިނގި ކުރިމަތިލުންތަކަށްފަހު ޗައިނާގެ ރައްޔިތުންނަށް އިންޑިއާއަށް އެތެރެވުމަށް ގިނަ ހުރަސްތަކެއް ހުއްޓެވެ. އެހެންނަމަވެސް ދެގައުމުގެ ދެމެދުގައި ގުޅުން މަޑުމަޑުން ރަނގަޅުވެ، ވިޔަފާރީގެ ގުޅުންތައް މިހާރު ވަނީ އަނެއްކާވެސް އިއާދަކުރަން ފަށާފައެވެ. އެގޮތުން ދެގައުމުގެ މެދުގައި ސީދާ ވައިގެ ދަތުރުފަތުރުވެސް މިހާރު އަނެއްކާވެސް ވަނީ ފަށާފައެވެ.
ޗައިނާގެ ވިޔަފާރިވެރިންނާއި ސިނާޢީ މަސައްކަތްކުރާ ފަރާތްތަކަށް އިންޑިއާއަށް އެތެރެވުމަށް ބިޒްނަސް ވިސާ ދޫކުރަން މިހާރު ނަގާނީ 4 ވަރަކަށް ހަފްތާ ކަމަށް އިންޑިއާގެ އޮފިޝަލުންނާއި ހަވާލާދީ ރޮއިޓަރސް ނިއުސް އެޖެންސީއިން ވަނީ ރިޕޯޓްކޮށްފައެވެ. މިއާއެކު އިންޑިއާގެ އެކި ކާރުޚާނާތަކަށް ބޭނުންވާ ތަމްރީނު ލިބިފައިވާ ތަޖުރިބާކާރު ޓެކްނީޝަނުން ލިބި، ޖުމްލަ އުފެއްދުންތެރިކަން އިތުރުވާނެކަމަށް އަންދާޒާކުރެވެއެވެ.
އެމެރިކާއިން ޗައިނާ އަދި އިންޑިއާއާއިން އެގައުމަށް އެތެރެކުރާ މުދަލުން ނަގާ ޓެރިފްގެ ނިސްބަތް ބޮޑުކޮށް، މުޅި ދުނިޔޭގެ ވިޔަފާރީގެ ނިޒާމަށް އަރުވާލި ލޮޅުމާއެކު، އިންޑިއާއާއި ޗައިނާއިން ގެންދަނީ ދެގައުމުގެ އަވަށްޓެރިކަމުގެ ބޭނުން ހިފައި، ވިޔަފާރީގެ ގުޅުން ބަދަހިކުރަމުންނެވެ.
Advertisement
This content is created and paid for by advertisers and does not involve Voice Journalists
